1 ၵေႃးရိၼ်ႇထူႉ 15
15
ၸဝ်ႈယေႇသူႉလုၵ်ႉၵႃႈတၢင်းတၢႆၶိုၼ်းလိပ်း
1ပီႈၼွင်ႉၶဝ်ဢိူၺ်း၊ ၵဝ်သမ်ႉႁႂ်ႈသူလႆႈငိၼ်းတြႃးသတၢင်းသိူဝ်းပျေႃႇဢၼ်ၵဝ်လႆႈႁေႃးလၢတ်ႈယဝ်ႉတီႈသူ၊ ဢၼ်သူၶၢမ်ႇဢဝ်လႄႈ၊ ဢိင်ပိုင်ႈၸပ်းၸွမ်းၼၼ်ႉထႅင်ႈဢေႃႈ။- 2လွင်ႈဢၼ်ၵဝ်ႁေႃးလၢတ်ႈမႃးယဝ်ႉၼၼ်ႉ၊ ပေႃးသူယင်းဢမ်ႇယုမ်ႇဢဝ်လၢႆလၢႆလွၵ်ႇလွၵ်ႇၵူၺ်းလႄႈၸႂ်ၸပ်းၸႂ်ၸွႆးယူႇၸိုင် သူႁွတ်ႈထိုင်တၢင်းဢၼ်ၵႄႇၶျွတ်ႈဢဝ် ၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉဢေႃႈ။
3လွင်ႈတၢင်းဢၼ်ၵဝ်ဢၢပ်ႈပၼ်တီႈသူဢွၼ်တၢင်းၼၼ်ႉ ၵႃႈၼင်ႇဢၼ်ၵဝ်ၶၢမ်ႇဢဝ်ၼၼ်ႉၸမ်ႉ၊ ၸဝ်ႈၶရိၸ်ႈၶၢမ်ႇတၢင်းတၢႆၵွပ်ႈပိူဝ်ႈဢပႅတ်ႈႁဝ်း မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။- 4သၢင်းၵျူဝ်ႇသေယဝ်ႉ၊ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ မၼ်းၸဝ်ႈလုၵ်ႉၶိုၼ်းမႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။- 5ၵေႇၽႃႉႁၼ်မၼ်းၸဝ်ႈသေယဝ်ႉ၊ ၶဝ်သိပ်းသွင်ပႃးလႆႈႁၼ်ဢေႃႈ။- 6လိုၼ်းၼၼ်ႉမၼ်းၸဝ်ႈထၢင်ႇသႃးပေႃႇမႃးတီႈပီႈၼွင်ႉ ႁႃႈပၢၵ်ႇလိူဝ်လိူဝ်မိူဝ်ႈလဵဝ်ၵၼ်ဢေႃႈ။ ၼႂ်းၶဝ်ၼၼ်ႉၵူၼ်းၼမ်ၼႃႇ ဢသၢၵ်ႈယင်းလိပ်းယူႇတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။ ၵမ်ႈၽွင်ႈၵေႃႈၼွၼ်းလပ်းယဝ်ႉ။- 7လိုၼ်းၼၼ်ႉထၢင်ႇသႃးပေႃႇမႃးတီႈယႃႇၵုပ်ႈဢေႃႈ။ လိုၼ်းၼၼ်ႉထၢင်ႇသႃးပေႃႇမႃးတီႈတမၢၼ်ႇၸဝ်ႈတင်းသဵင်ႈတင်းလူင်ဢေႃႈ။- 8လိုၼ်းလင်သုတ်းပိူၼ်ႈ၊ ထၢင်ႇသႃးပေႃႇမႃးတီႈၵဝ်ဢၼ်ပဵၼ်ၸိူဝ်ႉၼင်ႇၵေႃႉဢၼ်ၵိူတ်ႇလဵင်ႉမႃး ၶိင်ႇဢမ်ႇထုၵ်ႇမိူဝ်ႈဢမ်ႇထုၵ်ႇၼၼ်ႉဢေႃႈ။- 9ၵဝ်ၼႆႉပဵၼ်တမၢၼ်ႇၸဝ်ႈဢၼ်တႅမ်ႇယေႃႈသေပိူၼ်ႈ၊ ဢမ်ႇထိူၵ်ႈလႆႈၶၢမ်ႇတၢင်းဢၼ်ႁွင်ႉႁဵၵ်ႈတမၢၼ်ႇၸဝ်ႈၵွပ်ႈပိူဝ်ႈဢၼ် ၼိၵ်ႈၸၢၵ်ႈငႅၼ်းသႄးၸိူဝ်းၸဝ်ႈၽြႃးပဵၼ်ၸဝ်ႈမိူဝ်ႈဢွၼ်ၼႆႉၼၼ်ႉဢေႃႈ။- 10ၵူၺ်းၵႃႈ ၵွပ်ႈပိူဝ်ႈၵျေးၸူးၽြႃးပဵၼ်ၸဝ်ႈၵူၺ်းလႄႈ ၵဝ်ပဵၼ်ၸိူဝ်ႉၼင်ႇဢၼ်ၵဝ်ပဵၼ်ယူႇၼႆႉဢေႃႈ။ ၵျေးၸူးၸဝ်ႈဢၼ်ၵဝ်လႆႈၶၢမ်ႇဢဝ်ၼၼ်ႉၵေႃႈ၊ လႆႈၶၢမ်ႇဢဝ်လၢႆလၢႆဢမ်ႇၸႂ်ႈ၊ ၵဝ်ႁဵတ်းတၢင်းဢၼ်ၵျူဝ်းၸႃးၼမ်ၼႃႇသေတမၢၼ်ႇၸဝ်ႈတင်းသဵင်ႈတင်းလူင်ဢေႃႈ။ ပိၵ်ႉသမ်ႉဝႃႈၸိူဝ်ႉၼင်ႇၼႆသေၵေႃႈ၊ ၵဝ်ၵျူဝ်းၸႃးဢမ်ႇၸႂ်ႈ။ ၵျေးၸူးၽြႃးပဵၼ်ၸဝ်ႈဢၼ်မီးယူႇလူၺ်ႈၵၼ်တင်းၵဝ်ၼၼ်ႉၵျူဝ်းၸႃးဢေႃႈ။- 11ပိူဝ်ႈၼႆလႄႈ ပဵၼ်ၵဝ်သေဢမ်ႇဝႃႈ၊ ပဵၼ်ၶဝ်သေဢမ်ႇဝႃႈ၊ ႁဝ်းႁေႃးလၢတ်ႈၸိူဝ်ႉၼင်ႇၼႆဢေႃႈ။ ၸိူဝ်ႉၼင်ႇၼႆၵေႃႈသူယုမ်ႇမၢတ်ႈဢေႃႈ။
လွင်ႈႁဝ်းတၵ်းလုၵ်ႉၵႃႈတၢင်းတၢႆၶိုၼ်းလိပ်း
12တေႃႈလဵဝ်ၼႆႉ ပေႃးႁေႃးလၢတ်ႈလွင်ႈဢၼ် ၸဝ်ႈၶရိၸ်ႈလုၵ်ႉၵႃႈတၢင်းတၢႆၶိုၼ်းလိပ်းတီႈသူၸိုင်၊ ႁဵတ်းသင်လႄႈၼႂ်းသူၵမ်ႈၽွင်ႈလၢတ်ႈလႄႈဝႃႈ၊ ၶဝ်ၸိူဝ်းဢၼ်တၢႆယဝ်ႉၼၼ်ႉဢမ်ႇမီးတၢင်းဢၼ်လုၵ်ႉၶိုၼ်း၊ ဝႃႈၼင်ႇၼႆၼင်ႇႁိုဝ်။- 13ပေႃးၶဝ်ၸိူဝ်းဢၼ်တၢႆယဝ်ႉၼၼ်ႉဢမ်ႇမီးတၢင်းဢၼ်လုၵ်ႉၶိုၼ်းၸိုင်၊ ၸဝ်ႈၶရိၸ်ႈဢမ်ႇလုၵ်ႉၶိုၼ်း။- 14ပေႃးၸဝ်ႈၶရိၸ်ႈဢမ်ႇလုၵ်ႉၶိုၼ်းၸိုင်၊ တၢင်းဢၼ်ႁဝ်းႁေႃးလၢတ်ႈၼႆႉဢမ်ႇမီးဢၵျူဝ်း၊ တၢင်းဢၼ်သူယုမ်ႇမၢတ်ႈၵေႃႈဢမ်ႇမီးဢၵျူဝ်း။- 15လိူဝ်သေၼၼ်ႉဢမ်ႇၵႃး၊ ႁဝ်းၼႆႉပဵၼ်ၵူၼ်းၶၢမ်ႇသၢၵ်ႈသေႇဢၼ်ဢမ်ႇမၢၼ်ႇဢမ်ႇမႅၼ်ႈလူၺ်ႈလွင်ႈတင်းၽြႃးပဵၼ်ၸဝ်ႈဢေႃႈ။ လွင်ႈမၼ်းၸမ်ႉ ႁဝ်းပဵၼ်ၵူၼ်းၶၢမ်ႇသၢၵ်ႈသေႇလူၺ်ႈလွင်ႈတင်းၽြႃးပဵၼ်ၸဝ်ႈလွင်ႈဢၼ်မၼ်းၸဝ်ႈႁႂ်ႈၸဝ်ႈၶရိၸ်ႈလုၵ်ႉၶိုၼ်းၼၼ်ႉဢေႃႈ။ ပေႃးၶဝ်ၸိူဝ်းဢၼ်တၢႆယဝ်ႉၼၼ်ႉ ဢမ်ႇမီးတၢင်းဢၼ်လုၵ်ႉၶိုၼ်းၸိုင် မၼ်းၸဝ်ႈဢမ်ႇႁႂ်ႈၸဝ်ႈၶရိၸ်ႈလုၵ်ႉၶိုၼ်း။- 16ပေႃးၶဝ်ၸိူဝ်းဢၼ်တၢႆယဝ်ႉၼၼ်ႉဢမ်ႇမီးတၢင်းဢၼ်လုၵ်ႉၶိုၼ်းၸိုင်၊ ၸဝ်ႈၶရိၸ်ႈဢမ်ႇလုၵ်ႉၶိုၼ်း။- 17ပေႃးၸဝ်ႈၶရိၸ်ႈဢမ်ႇလုၵ်ႉၶိုၼ်းၸိုင်တၢင်းဢၼ်သူယုမ်ႇမၢတ်ႈၼၼ်ႉဢမ်ႇမီးဢၵျူဝ်း။ သူယင်းမီးယူႇၼႂ်းဢပႅတ်ႈတူႉၸရိူၵ်ႈဢေႃႈ။- 18လိူဝ်သေၼၼ်ႉ၊ ၶဝ်ၸိူဝ်းဢၼ်ၼွၼ်းလပ်းၼႂ်းၸဝ်ႈၶရိၸ်ႈၼၼ်ႉႁွတ်ႈထိုင် တၢင်းဢၼ်သုမ်းဢၼ်ၸွမ်းယဝ်ႉ။- 19ပေႃးႁဝ်းဢိင်ၸဝ်ႈၶရိၸ်ႈသေလႄႈ မီးတၢင်းဢၼ်မုင်ႈထႃႈမွင်းထႃႈၼႂ်းၽဝႃႉတေႃႈလဵဝ်ၼႆႉၵူၺ်းၸိုင် ႁဝ်းပဵၼ်ၵေႃႉဢၼ်ယဵင်ႈၶႅၼ်းၽၢၼ်ၼႃႇသေပိူၼ်ႈ ၼႂ်းၵူၼ်းတင်းသဵင်ႈတင်းလူင်ဢေႃႈ။
20တေႃႈလဵဝ်ၼႆႉၸမ်ႉ၊ ၸဝ်ႈၶရိၸ်ႈလႆႈၶၢမ်ႇတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းယဝ်ႉလႄႈ ပဵၼ်မၢၵ်ႇဢၼ်မၢၵ်ႇဢွၼ်တၢင်းၼႂ်းၶဝ်ၸိူဝ်းဢၼ် ၼွၼ်းလပ်းၼၼ်ႉဢေႃႈ။- 21ပိူဝ်ႈဢၼ်ပဵၼ်ၼင်ႇၼႆလႄႈ၊ ၸိူဝ်ႉၼင်ႇဢၼ်တြႃးတၢင်းတၢႆတႄႇယူႇၵွပ်ႈပိူဝ်ႈၵူၼ်းၼၼ်ႉ၊ တြႃးတၢင်းဢၼ်ၶဝ်ၸိူဝ်းဢၼ်တၢႆယဝ်ႉ တၵ်းလုၵ်ႉၶိုၼ်းၼၼ်ႉတႄႇဝႆႉမီးယူႇၵွပ်ႈပိူဝ်ႈၵူၼ်းဢေႃႈ။- 22ၸိူဝ်ႉၼင်ႇဢၼ်ၵူၼ်းၵႃႈမီးတင်းသဵင်ႈတင်းလူင် ႁွတ်ႈထိုင်တၢင်းတၢႆၵွပ်ႈပိူဝ်ႈဢႃႇတၢမ်ႇၼၼ်ႉ၊ ၵူၼ်းၵႃႈမီးတင်းသဵင်ႈတင်းလူင် တၵ်းလႆႈႁွတ်ႈထိုင်တၢင်းဢၼ်ဢသၢၵ်ႈလိပ်း ၵွပ်ႈပိူဝ်ႈၸဝ်ႈၶရိၸ်ႈဢေႃႈ။- 23ၼႂ်းဝႃႈၼၼ်သေၵေႃႈ ၵူၼ်းၵူႈၵေႃႉတၵ်းလႆႈၸွမ်းၵႃႈၼင်ႇဢၼ်ဢလႄႉၵမ်းၽႂ်ၵမ်းမၼ်းမီးၼၼ်ႉဢေႃႈ။ ၸဝ်ႈၶရိၸ်ႈပဵၼ်မၢၵ်ႇဢၼ်မၢၵ်ႇဢွၼ်တၢင်းဢေႃႈ။ လိုၼ်းၼၼ်ႉ မိူဝ်ႈဢၼ်ၸဝ်ႈၶရိၸ်ႈပေႃႇမႃးၼၼ်ႉၸိုင်၊ ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၸဝ်ႈၶရိၸ်ႈၼၼ်ႉ တၵ်းႁွတ်ႈထိုင်တၢင်းဢၼ်လိပ်းဢေႃႈ။
24မိူဝ်ႈၼၼ်ႉ ၸဝ်ႈၶရိၸ်ႈတၵ်းပႄႇပႅတ်ႈဢၼ်ထွတ်ႈဢၼ်မျၢတ်ႈ၊ ဢႃႇၼႃႇတၼ်းၶူဝ်းၵူႈၸိူဝ်ႉၵူႈပိူင်သေလႄႈ ၶိုၼ်းဢၢပ်ႈမိူင်းတူဝ်ၸဝ်ႈၵဝ်ႇပၼ်တီႈၽြႃးပဵၼ်ၸဝ်ႈဢၼ်ဝႃႈပေႃႈၸဝ်ႈၼၼ်ႉယဝ်ႉ၊ ၵမ်ႇၽႃႇၸင်ႇတၵ်းသုတ်းသဵင်ႈဢေႃႈ။- 25ၸဝ်ႈၶရိၸ်ႈၼၼ်ႉ တေႃႇထိုင်ႁွတ်ႈၸူဝ်ႈဢၼ်ဢမ်ႇပႆႇၶျႃးရၢၼ်ႇသူႇတင်းသဵင်ႈတင်းလူင် ဝႆႉၵႃႈတႂ်ႈတိၼ်မၼ်းၸဝ်ႈၼၼ်ႉၸိုင်တၵ်းလႆႈဢုပ်ႉပိူင်ႇဢေႃႈ။- 26ၶုၼ်တၢႆ ဢၼ်ပဵၼ်ရၢၼ်ႇသူႇလိုၼ်းလင်သုတ်းၼၼ်ႉတၵ်းလႆႈႁွတ်ႈထိုင်တၢင်းဢၼ်သုမ်းဢၼ်ၸွမ်းဢေႃႈ။- 27မၼ်းၸဝ်ႈတၵ်းၶျႃးလွင်ႈတၢင်း ၵႃႈမီးတင်းသဵင်ႈတင်းလူင် ဝႆႉၵႃႈတႂ်ႈတိၼ်မၼ်းၸဝ်ႈဢေႃႈ၊ မိူဝ်ႈဢၼ်ဝႃႈ လွင်ႈတၢင်း ၵႃႈမီးတင်းသဵင်ႈတင်းလူင် ၶျႃးဝႆႉမီးယူႇၵႃႈတႂ်ႈတိၼ်မၼ်းၸဝ်ႈ၊ ဝႃႈၼင်ႇၼႆၼၼ်ႉၸိုင်၊ လွင်ႈဢၼ်ၸဝ်ႈဢၼ် ဢဝ်လွင်ႈတၢင်းၵႃႈမီးတင်းသဵင်ႈတင်းလူင်ၶျႃးဝႆႉၵႃႈတႂ်ႈတိၼ်မၼ်းၸဝ်ႈၼၼ်ႉၵိုတ်းဝႆႉယူႇၼၼ်ႉၸိုင်ထၢင်ႇသႃးယူႇဢေႃႈ။- 28မိူဝ်ႈဢၼ်လွင်ႈတၢင်းၵႃႈမီးတင်းသဵင်ႈတင်းလူင် ၶျႃးဝႆႉမီးယူႇၵႃႈတႂ်ႈတိၼ်မၼ်းၸဝ်ႈၼၼ်ႉၸိုင်၊ လုၵ်ႈၸဝ်ႈၼၼ်ႉ တူဝ်ၸဝ်ႈၵဝ်ႇ တၵ်းႁပ်ႉတုင်းဢဝ် တၢင်းဢၼ်ဢုပ်ႉဢၼ်ပိူင်ႇၸဝ်ႈဢၼ်ဢဝ်လွင်ႈတၢင်းၵႃႈမီးတင်းသဵင်ႈတင်းလူင် ၶျႃးဝႆႉၵႃႈတႂ်ႈ တိၼ်မၼ်းၸဝ်ႈၼၼ်ႉဢေႃႈ။ လွင်ႈမၼ်းၸမ်ႉ ပဵၼ်လွင်ႈၼင်ႇႁိုဝ်ၽြႃးပဵၼ်ၸဝ်ႈတၵ်းလႆႈပဵၼ်တင်းသဵင်ႈတင်းမူတ်းဢေႃႈ။- 29ပေႃးၶဝ်ၸိူဝ်းဢၼ်တၢႆယဝ်ႉၼၼ်ႉ ဢမ်ႇမီးတၢင်းဢၼ်လုၵ်ႉၶိုၼ်းလႃးလႃးၸိုင်ၶဝ်ၸိူဝ်းဢၼ်ၶၢမ်ႇပပ်ႉတီႉၸမ်ႇ ပုၼ်ႈတၢင်တူဝ်ၶဝ်ၸိူဝ်းဢၼ်တၢႆယဝ်ႉၼၼ်ႉ တၵ်းလႆႈႁဵတ်းၸိူဝ်ႉၼင်ႇႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶဝ်ၶၢမ်ႇပပ်ႉတီႉၸမ်ႇ ပုၼ်ႈတၢင်တူဝ်ၶဝ်ၸိူဝ်းဢၼ်တၢႆယဝ်ႉၼၼ်ႉၼင်ႇႁိုဝ်။
30ႁဝ်းၵေႃႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ လႆႈႁူပ်ႉလႆႈထူပ်းတၢင်းဢၼ်ၽေးတုၵ်ႉၶႃႉႁွတ်ႈမႃးၵူႈၼႃႇရီႇၼင်ႇႁိုဝ်။- 31ၵဝ်ၼႆႉလႆႈၶၢမ်ႇတၢင်းတၢႆၵူႈဝၼ်းဝႃႈၼႆ၊ ၵဝ်ဢဝ်တၢင်းဢၼ်ၵဝ်ဢုပ်ႇဝၢဝ်းသိူဝ်းပျေႃႇ ၵွပ်ႈပိူဝ်ႈလွင်ႈသူၼႂ်းၸဝ်ႈႁဝ်း ယေႇသူႉၶရိၸ်ႈၼၼ်ႉ တိူင်ႇလႄႈႁတ်းဝႃႈဢေႃႈ။- 32ပေႃးၶဝ်ၸိူဝ်းဢၼ်တၢႆယဝ်ႉၼၼ်ႉ ဢမ်ႇမီးတၢင်းဢၼ်လုၵ်ႉၶိုၼ်းၸိုင်၊ ပိၵ်ႉသမ်ႉၵဝ်လႆႈတိုၵ်းၵၼ်တင်းတူဝ်ထိူၼ်ႇၵႃႈၼႂ်းဝဵင်းဢေးၽႅတ်ႈမိူဝ်ႈဢွၼ်ၼႆႉၼၼ်ႉ ၸွမ်းၼင်ႇလေႃးၵီႇဝေႃးႁႃႇရႃႉသေၵေႃႈ၊ တၵ်းမီးဢၵျူဝ်းၵႃႈသင်။ ၵိၼ်တႃႉႁဝ်း။ ၶူပ်းတႃႉႁဝ်း။ မိူဝ်ႈၽုၵ်ႈႁဝ်းတၵ်းလႆႈတၢႆဢေႃႈ။
33ယႃႇပေဢဝ်ဢၼ်ပႅၵ်ႇဢၼ်ပိူင်ႈ၊ တၢင်းဢၼ်ႁဵတ်းၵေႃႉသေႈလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇလီၼၼ်ႉ ၸၢင်ႈႁႂ်ႈထုင်းၸၢမ်ႇတၢင်းၵမ်တၢင်းၵျၢင်ႉႁေႈႁၢႆးၵႂႃႇဢေႃႈ။- 34တိုၼ်ႇမႃးတီႈတြႃးတႃႉ၊ ယႃႇပေႁဵတ်းဢပႅတ်ႈတူႉၸရိူၵ်ႈ၊ ၵူၼ်းၵမ်ႈၽွင်ႈဢမ်ႇႁူႉၸၵ်းၽြႃးပဵၼ်ၸဝ်ႈ။ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်ၵဝ်ဝႃႈႁႂ်ႈသူဢူၵ်းဢၢႆဢေႃႈ။
တူဝ်ၶၼ်ႇထႃႇဢၼ်လုၵ်ႉၶိုၼ်းလိပ်းမႃး
35သေၵေႃႉသေၵူၼ်းတၵ်းထၢမ်လႄႈဝႃႈ၊ ၶဝ်ၸိူဝ်းဢၼ်တၢႆယဝ်ႉၼၼ်ႉတၵ်းလုၵ်ႉၶိုၼ်းၸိူဝ်ႉၼင်ႇႁိုဝ်။ တၵ်းပႃးတင်းတူဝ်ၸိူဝ်ႉၼင်ႇႁိုဝ်သေလႄႈပေႃႇမႃး၊ ဝႃႈၼင်ႇၼႆဢေႃႈ။- 36ၵူၼ်းမိူၵ်ႈဢိူၺ်း၊ ပေႃးမဵတ်ႉဢၼ်မႂ်းၽုၵ်ႇသွမ်ႈၼၼ်ႉဢမ်ႇလူႉၸိုင်မၼ်းဢမ်ႇၸၢင်ႈလိပ်း။- 37လိူဝ်သေၼၼ်ႉ မိူဝ်ႈဢၼ်ၽုၵ်ႇသွမ်ႈမဵတ်ႉၼၼ်ႉၸိုင် မႂ်းၽုၵ်ႇသွမ်ႈတူဝ်ဢၼ်တၵ်းပဵၼ်မႃးၵမ်းလိုၼ်းၼၼ်ႉဢမ်ႇၸႂ်ႈ။ ပဵၼ်မဵတ်ႉၶဝ်ႈၵျုင်ႇသေဢမ်ႇဝႃႈ၊ ပဵၼ်မဵတ်ႉၶဝ်ႈတၢင်ႇၸိူဝ်ႉတၢင်ႇပိူင်သေဢမ်ႇဝႃႈ၊ မႂ်းၸၢင်ႈၽုၵ်ႇသွမ်ႈမဵတ်ႉမၼ်းၵူၺ်းၵူၺ်းဢေႃႈ။- 38ၽြႃးပဵၼ်ၸဝ်ႈၸွမ်းၵႃႈၼင်ႇဢၼ်ဢလူဝ်ႇၸဝ်ႈမီးၼၼ်ႉပၼ်တူဝ်ဢေႃႈ။ တီႈမဵတ်ႉႁင်းၽႂ်ႁင်းမၼ်းၼၼ်ႉၵေႃႈမဵဝ်းလႂ်မဵဝ်းၼၼ်ႉမၼ်းၸဝ်ႈပၼ်တူဝ်ဢေႃႈ။
39ၼိူဝ်ႉၵႃႈမီးတင်းသဵင်ႈတင်းလူင် ပဵၼ်မဵဝ်းလဵဝ်ၵူၺ်းဢမ်ႇၸႂ်ႈ။ ၼိူဝ်ႉၵူၼ်းမဵဝ်းၼိုင်ႈ၊ ၼိူဝ်ႉသတ်းမဵဝ်းၼိုင်ႈ၊ ၼိူဝ်ႉပႃမဵဝ်းၼိုင်ႈ၊ ၼိူဝ်ႉၼူၵ်ႉမဵဝ်းၼိုင်ႈ မီးဝႆႉႁင်းၽႂ်ႁင်းမၼ်းဢေႃႈ။- 40ႁၢင်ႈၽၢင်တူဝ်ၵၢင်ႁၢဝ်တင်းလၢႆၵေႃႈမီးဢေႃႈ။ ႁၢင်ႈၽၢင်တူဝ်လိၼ်မိူင်းတင်းလၢႆၵေႃႈမီးဢေႃႈ။ မုၼ်သရေႇႁၢင်ႈၽၢင်တူဝ်ၵၢင်ႁၢဝ်ပဵၼ်မဵဝ်းၼိုင်ႈဢေႃႈ။ မုၼ်သရေႇႁၢင်ႈၽၢင်တူဝ်လိၼ်မိူင်းပဵၼ်မဵဝ်းၼိုင်ႈဢေႃႈ။- 41မုၼ်သရေႇၵၢင်ဝၼ်းမဵဝ်းၼိုင်ႈ၊ မုၼ်သရေႇလိူၼ်မဵဝ်းၼိုင်ႈ၊ မုၼ်သရေႇလၢဝ်မဵဝ်းၼိုင်ႈမီးဝႆႉႁင်းၽႂ်ႁင်းမၼ်းဢေႃႈ။ မုၼ်သရေႇလၢဝ်တင်းလၢႆမီးဢၼ်ပႅၵ်ႇဢၼ်ပိူင်ႈၵၼ်ႁင်းၽႂ်ႁင်းမၼ်းဢေႃႈ။
42လွင်ႈတၢင်းဢၼ်ၶဝ်ၸိူဝ်းဢၼ်တၢႆယဝ်ႉလုၵ်ႉၶိုၼ်းၼၼ်ႉ ပဵၼ်မိူၼ်ၸိူဝ်ႉၼင်ႇၼၼ်ဢေႃႈ။ တူဝ်ၼႆႉမိူဝ်ႈဢၼ်ၽုၵ်ႇသွမ်ႈၸိုင် မီးသၽေႃးဢၼ်ၸၢင်ႈတူႇၸၢင်ႈၼဝ်ႈဢေႃႈ။ မိူဝ်ႈဢၼ်လုၵ်ႉၶိုၼ်းၸမ်ႉ၊ တႄႇယူႇၼႂ်းတၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈဢေႃႈ။- 43မိူဝ်ႈဢၼ်ၽုၵ်ႇသွမ်ႈၸိုင်မုၼ်သရေႇလူႉဢေႃႈ။ မိူဝ်ႈဢၼ်လုၵ်ႉၶိုၼ်းၸမ်ႉ၊ ပျေႉၸုမ်ႇတင်းမုၼ်သရေႇဢေႃႈ။ မိူဝ်ႈဢၼ်ၽုၵ်ႇသွမ်ႈၸိုင်ဢမ်ႇမီးႁႅင်း။ မိူဝ်ႈဢၼ်လုၵ်ႉၶိုၼ်းၸမ်ႉ၊ ပျေႉၸုမ်ႇတင်းႁႅင်းဢေႃႈ။- 44မိူဝ်ႈဢၼ်ၽုၵ်ႇသွမ်ႈၸိုင်ပဵၼ်တူဝ်ၸႃႇတီႉပၵတီႉဢေႃႈ။ မိူဝ်ႈဢၼ်လုၵ်ႉၶိုၼ်းၸမ်ႉ၊ ပဵၼ်တူဝ်ဝီႉၺႃႇၼႃႉဢေႃႈ။ ပေႃးမီးတူဝ်ၸႃႇတီႉပၵတီႉမဵဝ်းၼိုင်ႈၸိုင် မီးဝီႉၺႃႇၼႃႉမဵဝ်းၼိုင်ႈဢေႃႈ။
45ဢၼ်ၵျၢမ်းလိၵ်ႈမႃးလႄႈဝႃႈၸမ်ႉ၊ ဢႃႇတၢမ်ႇဢၼ်ပဵၼ်မႃးဢွၼ်တၢင်းၼၼ်ႉပဵၼ်သတ်ႉတဝႃႇ ဢၼ်ဢသၢၵ်ႈလိပ်းယူႇဢေႃႈ၊ ဝႃႈၼင်ႇၼႆဢေႃႈ။ ဢႃႇတၢမ်ႇဢၼ်ပဵၼ်မႃးၵမ်းလိုၼ်းၸမ်ႉ၊ ပဵၼ်ဝီႉၺိၺ်ႇဢၼ်ၸၢင်ႈႁႂ်ႈဢသၢၵ်ႈလိပ်းယူႇဢေႃႈ။- 46တူဝ်ဝီႉၺႃႇၼႃႉပဵၼ်ဢွၼ်တၢင်းဢမ်ႇၸႂ်ႈ။ တူဝ်ၸႃႇတီႉပၵတီႉပဵၼ်ဢွၼ်တၢင်းဢေႃႈ။ ၵမ်းလိုၼ်းတူဝ်ဝီႉၺႃႇၼႃႉၸင်ႇပဵၼ်ဢေႃႈ။- 47ၵူၼ်းဢွၼ်တၢင်းၸိုင်ၵွပ်ႈပိူဝ်ႈဢၼ်ပဵၼ်မႃးၵႃႈတီႈလိၼ်လႄႈ ပဵၼ်ၵူၼ်းလိၼ်ဢေႃႈ။ ၵူၼ်းတူႉတီႉယႃႉၸမ်ႉ၊ ပဵၼ်ၸဝ်ႈဢၼ်ပဵၼ်မႃးၵႃႈတီႈၵၢင်ႁၢဝ်ဢေႃႈ။- 48ၵူၼ်းလိၼ်တင်းလၢႆလႆႈပဵၼ်ၸိူဝ်ႉၼင်ႇၵူၼ်းလိၼ်ၼၼ်ႉဢေႃႈ။ ၵူၼ်းၵၢင်ႁၢဝ်တင်းလၢႆ လႆႈပဵၼ်ၸိူဝ်ႉၼင်ႇၵူၼ်းၵၢင်ႁၢဝ်ၼၼ်ႉဢေႃႈ။- 49ၸိူဝ်ႉၼင်ႇဢၼ်ႁဝ်းလႆႈဢဝ်ပုင်ႇႁၢင်ႈၽၢင်ၵူၼ်းလိၼ်ၼၼ်ႉ ႁဝ်းတၵ်းလႆႈဢဝ်ပုင်ႇႁၢင်ႈၽၢင်ၵူၼ်းၵၢင်ႁၢဝ်ဢေႃႈ။
50ပီႈၼွင်ႉၶဝ်ဢိူၺ်း၊ ၵဝ်ဝႃႈၸမ်ႉ၊ ၼိူဝ်ႉလိူတ်ႈၵူၼ်းၸိုင်ဢမ်ႇၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈလႆႈ။ လွင်ႈတၢင်းဢၼ်ၸၢင်ႈတူႇၸၢင်ႈၼဝ်ႈၸိုင်ဢမ်ႇၶၢမ်ႇဢမူၺ်ႇလွင်ႈတၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈၼၼ်ႉလႆႈ။- 51ၵဝ်တၵ်းၼႄပျႃးတၢင်းဢၼ်လိုၵ်ႉဢၼ်လမ်ႇဢၼ်ၼိုင်ႈလူးၵွၼ်ႇဢေႃႈ။ ႁဝ်းၵႃႈမီးတၵ်းလႆႈၼွၼ်းလပ်းဢမ်ႇၸႂ်ႈ။- 52ၵူၺ်းၵႃႈမိူဝ်ႈဢၼ်ပဝ်ႇၶရႃႇဢၼ်လိုၼ်းလင်သုတ်းၼၼ်ႉၸိုင်၊ ၵမ်းဢွၼ်ႇၼိုင်ႈ၊ ၸူဝ်ႈၽႅပ်ႉတႃပွၵ်ႈၼိုင်ႈၵူၺ်း၊ ႁဝ်းၵႃႈမီးတၵ်းလႆႈႁွတ်ႈထိုင်တၢင်းဢၼ်ၶၢႆႉပုတ်ႈဢေႃႈ။ မိူဝ်ႈဢၼ်ႁွတ်ႈထိုင်ၶိင်ႇဢၼ်တၵ်းပဝ်ႇၶရႃႇၼၼ်ႉၸိုင်၊ ၶဝ်ၸိူဝ်းဢၼ်တၢႆယဝ်ႉၼၼ်ႉတၵ်းလုၵ်ႉၶိုၼ်း တႄႇယူႇၼႂ်းလွင်ႈတၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈလႄႈ ႁဝ်းၵႃႈမီးတၵ်းႁွတ်ႈထိုင်တၢင်းဢၼ်ၶၢႆႉပုတ်ႈဢေႃႈ။- 53လွင်ႈတၢင်းဢၼ်ၸၢင်ႈတူႇၸၢင်ႈၼဝ်ႈတေႃႈလဵဝ်တႂ်ႈတႃၼႆႉ တၵ်းလႆႈၶဝ်ႈၼႂ်းလွင်ႈတၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈဢေႃႈ။ လွင်ႈတၢင်းဢၼ်ၸၢင်ႈတၢႆတေႃႈလဵဝ်တႂ်ႈတႃၼႆႉ တၵ်းလႆႈၶဝ်ႈၼႂ်းလွင်ႈတၢင်းဢၼ်ဢမ်ႇၸၢင်ႈတၢႆဢေႃႈ။- 54မိူဝ်ႈဢၼ်လွင်ႈတၢင်းဢၼ်ၸၢင်ႈတူႇၸၢင်ႈၼဝ်ႈၼႆႉၶဝ်ႈႁွတ်ႈၶဝ်ႈထိုင်ၵႃႈၼႂ်းလွင်ႈတၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈလႄႈ လွင်ႈတၢင်းဢၼ်ၸၢင်ႈတၢႆၼႆႉ ၶဝ်ႈႁွတ်ႈၶဝ်ႈထိုင်ၵႃႈၼႂ်းလွင်ႈတၢင်းဢၼ်ဢမ်ႇၸၢင်ႈတၢႆၼၼ်ႉၸိုင်၊ ၵႂၢမ်းဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ တၢင်းတၢႆၸိုင်တူၵ်းၸူမ်ၵႃႈၼႂ်းတၢင်းဢၼ်ပႄႉၼႅင်ႇယဝ်ႉ၊ ဝႃႈၼင်ႇၼႆၼၼ်ႉတၵ်းပျေႉၸုမ်ႇဢေႃႈ။- 55ၶုၼ်တၢႆဢိူၺ်း၊ ၵွင်ႉႁႅၼ်ႇဢၼ်မႂ်းဢဝ်ၸီႈၼၼ်ႉၸမ်ႉ၊ မီးၵႃႈလႂ်။ ၶုၼ်တၢႆဢိူၺ်း၊ တၢင်းဢၼ်မႂ်းပႄႉၼႅင်ႇၼၼ်ႉၸမ်ႉ၊ မီးၵႃႈလႂ်။- 56ၵွင်ႉႁႅၼ်ႇဢၼ်ၶုၼ်တၢႆဢဝ်ၸီႈၸမ်ႉ၊ ပဵၼ်တူႉၸရိူၵ်ႈဢပႅတ်ႈဢေႃႈ၊ တၼ်းၶူဝ်းတူႉၸရိူၵ်ႈဢပႅတ်ႈၸမ်ႉ၊ ပဵၼ်ပိင်းၺၢပ်ႈတြႃးဢေႃႈ။- 57ၵျေးၸူးၽြႃးပဵၼ်ၸဝ်ႈဢၼ်ပၼ်ဢၶႂၢင်ႉတၢင်းဢၼ်ပႄႉၼႅင်ႇၵွပ်ႈပိူဝ်ႈၸဝ်ႈႁဝ်းယေႇသူႉၶရိၸ်ႈ တီႈႁဝ်းၼၼ်ႉယႂ်ႇၼႃႇလူင်လၢင်ဢေႃႈ။
58ၵွပ်ႈႁွႆးၼႆႉလႄႈ ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ သူပွင်ႁဵတ်းဢမူႉၸဝ်ႈၽြႃးလႄႈ ႁူႉလွင်ႈဢၼ်ဢၵျူဝ်းသူယႂ်ႇၼႃႇၼၼ်ႉသေယဝ်ႉ၊ ပျေႉၸုမ်ႇတင်းၸႂ်ဢၼ်တႄႇဝႆႉယူႇ၊ ယင်းဢမ်ႇၶၢႆႉဢမ်ႇပုတ်ႈယူႇသေလႄႈ ဢွၼ်ၵၼ်ၵႆႉၵျူဝ်းၸႃးႁဵတ်းဢမူႉၸဝ်ႈၽြႃးတႃႉ။
Currently Selected:
1 ၵေႃးရိၼ်ႇထူႉ 15: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
