1 ၵေႃးရိၼ်ႇထူႉ 12
12
သူႉၵျေးၸူးဢၼ်ဝီႉၺိၺ်ႇၸဝ်ႈပၼ်
1ပီႈၼွင်ႉၶဝ်ဢိူၺ်း၊ ၼင်ႇႁိုဝ်သူတၵ်းဢမ်ႇႁူႉလွင်ႈၵျေးၸူးဝီႉၺိၺ်ႇတင်းလၢႆလႄႈယူႇၸိုင်၊ ၵဝ်ဢမ်ႇမီးဢလူဝ်ႇ။- 2သူႁူႉလွင်ႈဢၼ်မိူဝ်ႈဢၼ်သူပဵၼ်ၵူၼ်းသႃႇသၼႃႇပႃႉၼၼ်ႉ သူပဵၼ်ၵေႃႉဢၼ်ပႃးၵႂႃႇၵႃႈတီႈရုၵ်ႈထူႉဢၼ်ဢမ်ႇၸၢင်ႈလၢတ်ႈၵႂၢမ်းလႆႈၼၼ်ႉ ၵႃႈၼင်ႇဢၼ်သူလႆႈၶၢမ်ႇတၢင်းဢၼ်ၸူဝ်းဢဝ်ၼၼ်ႉယူႇဢေႃႈ။- 3ပိူဝ်ႈၼႆလႄႈ လွင်ႈၼင်ႇႁိုဝ်သူတၵ်းႁူႉလွင်ႈဢၼ်ပႃးတင်းဝီႉၺိၺ်ႇၽြႃးပဵၼ်ၸဝ်ႈႁေႃးလၢတ်ႈယူႇလႄႈ ၽူႈလႂ်သေၵေႃႉဢမ်ႇၵိၼ်ႇဢမ်ႇလႃႇယေႇသူႉလႆႈဢိၵ်ႇတင်းလွင်ႈဢၼ်ပေႃးဢမ်ႇဢိင်ဝီႉၺိၺ်ႇဢၼ်မူတ်းၸၢင်ႇၸဝ်ႈၸိုင် ၽူႈလႂ်သေၵေႃႉဢမ်ႇလၢတ်ႈဢမ်ႇဝႃႈ ယေႇသူႉပဵၼ်ၸဝ်ႈၽြႃးဢေႃႈ၊ ဝႃႈၼင်ႇၼႆၼၼ်ႉလႆႈၼၼ်ႉၸိုင်ၵဝ်ပၼ်သတီႉဢေႃႈ။
4ပိၵ်ႉသမ်ႉသူႉၵျေးၸူးၸဝ်ႈ မီးတၢင်းဢၼ်ဢမ်ႇမိူၼ်ၵၼ်လၢႆၸိူဝ်ႉလၢႆပိူင်သေၵေႃႈ၊ မီးဝီႉၺိၺ်ႇၸဝ်ႈပႃးလဵဝ်ၵူၺ်းဢေႃႈ။- 5ပိၵ်ႉသမ်ႉဢမူႉတၢင်းဢၼ်ထမ်ႇမႃႉသြႃႇပွင်ႁဵတ်းၼၼ်ႉ မီးတၢင်းဢၼ်ဢမ်ႇမိူၼ်ၵၼ်လၢႆၸိူဝ်ႉလၢႆပိူင်သေၵေႃႈ၊ မီးၸဝ်ႈပႃးလဵဝ်ၵူၺ်းဢေႃႈ။- 6ပိၵ်ႉသမ်ႉဢမူႉတၢင်းဢၼ်ႁဵတ်းပဵၼ်ၼၼ်ႉ မီးတၢင်းဢၼ်ဢမ်ႇမိူၼ်ၵၼ် လၢႆၸိူဝ်ႉလၢႆပိူင်သေၵေႃႈ၊ မီးၽြႃးပဵၼ်ၸဝ်ႈပႃးလဵဝ်ၵူၺ်းဢၼ်ႁဵတ်းပဵၼ် ၵႃႈဢၼ်ႁဵတ်းပဵၼ်ၵႃႈၼႂ်းၵူၼ်းတင်းသဵင်ႈတင်းလူင်ဢေႃႈ။- 7ပုၼ်ႈဢၵျူဝ်းၸိုင်မၼ်းၸၢင်ႈပၼ်ဝီႉၺိၺ်ႇၸဝ်ႈတီႈၵူၼ်းၵူႈၵေႃႉႁင်းၽႂ်ႁင်းမၼ်းထၢင်ႇထၢင်ႇသႃးသႃးဢေႃႈ။- 8ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ ၸွမ်းလူၺ်ႈဝီႉၺိၺ်ႇၸဝ်ႈလႄႈမၼ်းၸဝ်ႈပၼ်ပိင်ႇၺႃႇတြႃးတီႈၵူၼ်းၵေႃႉၼိုင်ႈဢေႃႈ။ ၸွမ်းလူၺ်ႈဝီႉၺိၺ်ႇၸဝ်ႈၼၼ်ႉလႄႈ မၼ်းၸဝ်ႈပၼ်တြႃးတၢင်းဢၼ် ၶုတ်းမူင်ႇၸီးၸွင်ႈႁူႉလႆႈတီႈၵူၼ်းၵေႃႉၼိုင်ႈဢေႃႈ။- 9ၸွမ်းလူၺ်ႈဝီႉၺိၺ်ႇၸဝ်ႈၼၼ်ႉလႄႈ မၼ်းၸဝ်ႈပၼ်တၢင်းဢၼ်ယုမ်ႇမၢတ်ႈတီႈၵူၼ်းၵေႃႉၼိုင်ႈဢေႃႈ။ ၸွမ်းလူၺ်ႈဝီႉၺိၺ်ႇၸဝ်ႈၼၼ်ႉလႄႈ မၼ်းၸဝ်ႈပၼ်ဢၶႂၢင်ႉတၢင်းဢၼ်ႁႂ်ႈတၢင်းၶႆႈတၢင်းပဵၼ်ႁၢႆတီႈၵူၼ်းၵေႃႉၼိုင်ႈဢေႃႈ။- 10မၼ်းၸဝ်ႈပၼ်ဢၶႂၢင်ႉဢၼ်ၸၢင်ႈၼႄပျႃးတၼ်းၶူဝ်းၼၼ်ႉတီႈၵေႃႉၼိုင်ႈ၊ ဢၶႂၢင်ႉဢၼ်ၸၢင်ႈႁဵတ်းပရေႃးၽႅတ်ႈၼၼ်ႉတီႈၵေႃႉၼိုင်ႈ၊ ဢၶႂၢင်ႉဢၼ်ၸၢင်ႈၸၵ်းၽႄလႄႈႁူႉၸႂ်ဝီႉၺိၺ်ႇတင်းလၢႆၼၼ်ႉ တီႈၵေႃႉၼိုင်ႈ၊ ဢၶႂၢင်ႉဢၼ်ၸၢင်ႈလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉတီႈၵေႃႉၼိုင်ႈ၊ ဢၶႂၢင်ႉဢၼ်ၸၢင်ႈၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇၼၼ်ႉတီႈၵေႃႉၼိုင်ႈဢေႃႈ။- 11ဢၶႂၢင်ႉၵႃႈမီးၸိူဝ်းၼၼ်ႉၸိုင် ဝီႉၺိၺ်ႇၸဝ်ႈပႃးလဵဝ်ၵူၺ်း ႁဵတ်းပဵၼ်လႄႈမၼ်းၸဝ်ႈမႅင်ႇပၼ်ဢၶႂၢင်ႉတီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်း ၵႃႈၼင်ႇဢၼ်ဢလူဝ်ႇၸဝ်ႈမီးၼၼ်ႉဢေႃႈ။
ဢၢင်ႇၵႃႇၼမ်ၼႃႇၼႂ်းတူဝ်ၶၼ်ႇထႃႇဢၼ်လဵဝ်
12ဢူႉပမႃႇၸမ်ႉ၊ ၸိူဝ်ႉၼင်ႇဢၼ်ၼႂ်းတူဝ်ဢၼ်ၼိုင်ႈမီးဢၢင်ႇၵႃႇၼမ်ၼႃႇလႄႈ ဢၢင်ႇၵႃႇတူဝ်ဢၼ်ၼိုင်ႈၵႃႈမီးတင်းသဵင်ႈတင်းလူင်ၼမ်ၼႃႇယူႇသေလႄႈ ပဵၼ်တူဝ်ဢၼ်လဵဝ်ၵူၺ်းၼၼ်ႉ၊ မိူၼ်ၼင်ႇၼၼ်ၸဝ်ႈၶရိၸ်ႈပဵၼ်ဢေႃႈ။- 13လွင်ႈမၼ်းၸမ်ႉပဵၼ်ၵူၼ်းယူႉတႃႉသေဢမ်ႇဝႃႈ၊ ပဵၼ်ၵူၼ်းႁေႇလသႃႉသေဢမ်ႇဝႃႈ၊ ပဵၼ်ၶႃႈသေဢမ်ႇဝႃႈ၊ ပဵၼ်ၵူၼ်းလွတ်ႈသေဢမ်ႇဝႃႈ၊ ႁဝ်းၵႃႈမီးတင်းသဵင်ႈတင်းလူင်လႆႈၶၢမ်ႇပပ်ႉတီႉၸမ်ႇၵႃႈၼႂ်းတူဝ်ဢၼ်လဵဝ်ၵူၺ်းၼႂ်းဝီႉၺိၺ်ႇၸဝ်ႈပႃးလဵဝ်ၵူၺ်းဢေႃႈ။ ႁဝ်းၵႃႈမီးတင်းသဵင်ႈတင်းလူင်လႆႈၵိၼ်တီႈဝီႉၺိၺ်ႇၸဝ်ႈပႃးလဵဝ်ၵူၺ်းဢေႃႈ။
14တူဝ်ၸိုင်မီးဢၢင်ႇၵႃႇဢၼ်လဵဝ်ၵူၺ်းဢမ်ႇၸႂ်ႈ။ မီးၼမ်ၼႃႇဢေႃႈ။- 15ပေႃးတိၼ်ဝႃႈ၊ ၵွပ်ႈပိူဝ်ႈဢၼ်ၵဝ်ဢမ်ႇၸႂ်ႈမိုဝ်းလႄႈၵဝ်ဢမ်ႇၸၢပ်ႈသႅင်ႇၵၼ်တင်းတူဝ်၊ ဝႃႈၼင်ႇၼႆၸိုင်၊ ၵွပ်ႈပိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉလႄႈဢမ်ႇၸၢပ်ႈသႅင်ႇတႄႉႁိုဝ်။- 16ႁူၵေႃႈပေႃးဝႃႈ၊ ၵွပ်ႈပိူဝ်ႈဢၼ်ၵဝ်ဢမ်ႇၸႂ်ႈတႃလႄႈၵဝ်ဢမ်ႇၸၢပ်ႈသႅင်ႇၵၼ်တင်းတူဝ်၊ ဝႃႈၼင်ႇၼႆၸိုင်၊ ၵွပ်ႈပိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉလႄႈ ဢမ်ႇၸၢပ်ႈသႅင်ႇတႄႉႁိုဝ်။- 17ပေႃးတင်းတူဝ်တင်းၶိင်းပဵၼ်မၢၵ်ႇတႃၵူၺ်းၵူၺ်းၸိုင်၊ တၢင်းဢၼ်ငိၼ်းလႆႈတၵ်းမီးၵႃႈလႂ်။ ပေႃးတင်းတူဝ်တင်းၶိင်းပဵၼ်ႁူၵူၺ်းၵူၺ်းၸိုင်တၢင်းဢၼ်ၼူမ်လႆႈတၵ်းမီးၵႃႈလႂ်။
18တေႃႈလဵဝ်ၸမ်ႉ၊ ၽြႃးပဵၼ်ၸဝ်ႈၼၼ်ႉ ၸီႇယၢင်ႇၶၢၼ်းဝႆႉဢၢင်ႇၵႃႇတင်းလၢႆႁင်းၽႂ်ႁင်းမၼ်း ၵႃႈၼႂ်းတူဝ်ၵႃႈၼင်ႇဢၼ်မၼ်းၸဝ်ႈမီးဢလူဝ်ႇဢေႃႈ။- 19လိူဝ်သေၼၼ်ႉပေႃးဢၢင်ႇၵႃႇၵႃႈမီးတင်းသဵင်ႈတင်းလူင်ပဵၼ်ဢၢင်ႇၵႃႇဢၼ်လဵဝ်ၵူၺ်းၸိုင်တူဝ်တၵ်းမီးၵႃႈလႂ်။- 20တေႃႈလဵဝ်ၼႆႉပိၵ်ႉသမ်ႉဢၢင်ႇၵႃႇၼမ်ၼႃႇသေၵေႃႈ၊ မီးတူဝ်ဢၼ်လဵဝ်ၵူၺ်းဢေႃႈ။- 21ၵဝ်ဢမ်ႇလူဝ်ႇမႂ်းဝႃႈၼႆမၢၵ်ႇတႃဢမ်ႇလႆႈဝႃႈတီႈမိုဝ်း။ ႁူဝ်ၵေႃႈဢမ်ႇလူဝ်ႇသူဝႃႈၼႆဢမ်ႇလႆႈဝႃႈတီႈတိၼ်။- 22လိူဝ်သေၼၼ်ႉဢမ်ႇၵႃး၊ ဢၢင်ႇၵႃႇဢၼ်မိူၼ်ၼင်ႇႁၢင်ႈႁႅင်းတၵ်းလဵၵ်ႉတၵ်းၵေႇၼၼ်ႉ ယဵင်ႈၶႅၼ်းမီးတီႈတၵ်းသုင်းတၵ်းသွင်ႇဢေႃႈ။- 23တီႈဢၢင်ႇၵႃႇဢၼ်မိူၼ်ၼင်ႇႁၢင်ႈသရေႇတၵ်းၵေႇတၵ်းမၢင်တင်းလၢႆၼၼ်ႉၵေႃႈ ႁဝ်းၸၢင်ႈပၼ်သရေႇဢၼ်ယဵင်ႈၶႅၼ်းယႂ်ႇဢေႃႈ။ ဢၢင်ႇၵႃႇဢၼ်ဢမ်ႇသၢင်ႇထုၵ်ႇတင်းလၢႆၼၼ်ႉ လႆႈၶၢမ်ႇတၢင်းဢၼ်ယဵင်ႈၶႅၼ်းသၢင်ႇထုၵ်ႇဢေႃႈ။- 24ဢၢင်ႇၵႃႇဢၼ်သၢင်ႇထုၵ်ႇတင်းလၢႆၼၼ်ႉ ဢမ်ႇလူဝ်ႇတၢင်းဢၼ်သၢင်ႇထုၵ်ႇတၢင်ႇၸိူဝ်ႉတၢင်ႇဢၼ်ထႅင်ႈ။- 25လွင်ႈၼင်ႇႁိုဝ်တၵ်းဢမ်ႇမီးတၢင်းဢၼ်ၽၢတ်ႇၽႄၵၼ်ၼႂ်းတူဝ်ၶၼ်ႇထႃႇလႄႈဢၢင်ႇၵႃႇတင်းလၢႆတၵ်းႁဵတ်းသတီႉတၢၼ်ႇၽႂ်တၢၼ်ႇမၼ်းၸိုင် ၽြႃးပဵၼ်ၸဝ်ႈႁႂ်ႈတူဝ်ၶၼ်ႇထႃႇၵိုင်ႇၵၼ်လႅပ်ႈၵၼ်လႄႈ ပၼ်သရေႇဢၼ်ယဵင်ႈၶႅၼ်းၼမ်တီႈ ဢၢင်ႇၵႃႇဢၼ်ယုတ်ႈၸိူဝ်းၼၼ်ႉဢေႃႈ။- 26ပိူဝ်ႈၼႆလႄႈပေႃးဢၢင်ႇၵႃႇဢၼ်ၼိုင်ႈလႆႈၶၢမ်ႇတုၵ်ႉၶႃႉတၢင်းၽၢၼ်ၸိုင်၊ ဢၢင်ႇၵႃႇၵႃႈမီးတင်းသဵင်ႈတင်းလူင်လႆႈၶၢမ်ႇလူၺ်ႈၵၼ်ဢေႃႈ။ ပေႃးဢၢင်ႇၵႃႇဢၼ်ၼိုင်ႈလႆႈၶၢမ်ႇတၢင်းဢၼ်မုၼ်သရေႇယႂ်ႇၼမ်ၸိုင်၊ ဢၢင်ႇၵႃႇၵႃႈမီးတင်းသဵင်ႈတင်းလူင်လႆႈသိူဝ်းပျေႃႇလူၺ်ႈၵၼ်ဢေႃႈ။
27သူပဵၼ်တူဝ်ၸဝ်ႈၶရိၸ်ႈဢေႃႈ။ ပဵၼ်ဢၢင်ႇၵႃႇမၼ်းၸဝ်ႈႁင်းၽႂ်ႁင်းမၼ်းဢေႃႈ။- 28ၽြႃးပဵၼ်ၸဝ်ႈၶၢၼ်းဝႆႉတမၢၼ်ႇၸဝ်ႈတင်းလၢႆ ၼႂ်းဢရႃႇပထမႃႉ၊ ပရေႃးၽႅတ်ႈတင်းလၢႆၼႂ်းဢရႃႇတူႉတီႉယႃႉ၊ သြႃႇတင်းလၢႆၼႂ်းဢရႃႇတႃႉတီႉယႃႉ၊ လိုၼ်းၼၼ်ႉၶဝ်ၸိူဝ်းဢၼ်ၼႄပျႃးတၼ်းၶူဝ်း၊ လိုၼ်းၼၼ်ႉၶဝ်ၸိူဝ်းဢၼ်လႆႈဢၶႂၢင်ႉဢၼ်ႁႂ်ႈတၢင်းၶႆႈတၢင်းပဵၼ်ႁၢႆ၊ ၶဝ်ၸိူဝ်းဢၼ်ပွင်လူၺ်ႈၸိူဝ်းၸဝ်ႈ၊ ၶဝ်ၸိူဝ်းဢၼ်ၸီႇယၢင်ႇဢုပ်ႉပိူင်ႇ၊ ၶဝ်ၸိူဝ်းဢၼ်ၸၢင်ႈလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉၼႂ်းၸိူဝ်းၸဝ်ႈဢေႃႈ။- 29ၶဝ်ၵႃႈမီးတင်းသဵင်ႈတင်းလူင်ပဵၼ်တမၢၼ်ႇၸဝ်ႈႁိုဝ်။ ၵႃႈမီးတင်းသဵင်ႈတင်းလူင်ပဵၼ်ပရေႃးၽႅတ်ႈႁိုဝ်။ ၵႃႈမီးတင်းသဵင်ႈတင်းလူင်ပဵၼ်သြႃႇႁိုဝ်။ ၵႃႈမီးတင်းသဵင်ႈတင်းလူင်ၼႄပျႃးတၼ်းၶူဝ်းလႆႈႁိုဝ်။- 30ၵႃႈမီးတင်းသဵင်ႈတင်းလူင်လႆႈဢၶႂၢင်ႉဢၼ်ႁႂ်ႈတၢင်းၶႆႈတၢင်းပဵၼ်ႁၢႆႁိုဝ်။ ၵႃႈမီးတင်းသဵင်ႈတင်းလူင်ၸၢင်ႈလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ႁိုဝ်။ ၵႃႈမီးတင်းသဵင်ႈတင်းလူင်ၸၢင်ႈၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇၼၼ်ႉႁိုဝ်။- 31သူဢွၼ်ၵၼ်မီးဢလူဝ်ႇၶႂ်ႈလႆႈသူႉၵျေးၸူးၸဝ်ႈဢၼ်မျၢတ်ႈသေပိူၼ်ႈၼၼ်ႉၼႃႇလူင်လၢင်တႃႉ။ ၵူၺ်းၵႃႈၵဝ်တၵ်းၼႄပျႃးသဵၼ်ႈတၢင်းဢၼ်ယဵင်ႈၶႅၼ်းမျၢတ်ႈၼႃႇၼၼ်ႉတီႈသူလူးၵွၼ်ႇဢေႃႈ။
Currently Selected:
1 ၵေႃးရိၼ်ႇထူႉ 12: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
