LEEWAAWOOTA 19
19
ADDI ADDI SEERA
1Kaaliiqi Musera, 2«Israeelete manni baalunkura, ‹Ani Kaaliiqi Magani'ne Qullaawahona, ki'neno Qullaawoota ikke. 3Mittu mittunku anna'nenna ama'ne ayirrisse; Fooliishshote Barra agadhe. Ani Kaaliiqi Magano'neeti.
4«‹Kaphu magannawa alba higginoonte; woy daashshinoonni siwiillanni umi'nera maganna seekkidhinoonte. Ani Kaaliiqi Magano'neeti.
5«‹Mittimmate kakkalo anera shiqishshinanni yannara, adheemmo gede kuloommo'ne seeri garinni shiqishshe. 6Kakkalo shiqishshini barra woy layinki barra intona; sayikki barri geeshsha iillanno maala baalanka giirre hunnona. 7Sayikki barra intiro battete; anino diadheemmo. 8Sayikki barri geeshsha iillino maala itannohu baalu, anera uyinoonniha batteessinona xa'mamanno. Hakko manchino manni'ya ledo dikiiramanno.
9«‹Baatto'nenni gide gamba assidhinanni yannara, jajji'nera qaccuwate nooha mudhitinoonte; qarmeno xinqidhinoonte. 10Woyinete xaro xinqidhinoonte; giggilinohano xinqidhinoonte; buxanetenna wole gobba mannira agurrensa. Ani Kaaliiqi Magano'neeti.
11« ‹Moortinoonte; kaphitinoonte; mimmito'ne dogginoonte.
12« ‹Ane su'minni beebbatenni xaartinoonte; tennenni ane Magani'ne su'ma shollishshinoonte. Ani Kaaliiqaati.
13« ‹Manna hanaaqqinoonte; gantine adhitinoonte; loosino'ne manchi hunkii ki'newa hashsha galoonke. 14Macciweelo xontinoonte; illiweeloho albaanni sarraaqannore wortinoonte; Magano'ne waajje. Ani Kaaliiqaati.
15« ‹Halaale dawissinoonte; buxichoho godowa hossinoonte; dureessa waajjitinoonte; manna taashshitine la'e. 16Mannu su'ma hunate mannu mereero doyitinoonte. Affinoonnire kayinni maaxxinikkinni coyidhe. Ani Kaaliiqaati.
17« ‹Rodii'nera koma amaddinoonte; barshesi beeqqitinannikki gede olliicho'ne bunshesira xawoho seejjesi. 18Ayeno rabbissinoonte; woy koma amaddinoonte; manna umi'ne gede assitine baxxe. Ani Kaaliiqaati.
19« ‹Woga'ya agadhe; fiixa xaaddinokki saada mimmitoho badhe sa'anno gede assitinoonte; mitto darga 2 dani gide wixidhinoonte; lamurinni gannoonni imaana uddidhinoonte.
20« ‹Mittu manchi woleho huuccinoonni borojjicho ledo siimu xaadooshshe assiro, hatti borojjichono wondoonnita woy wolaphitinota ikka hoogguro, mancho qorichinshona. Kayinnilla, beetto wolaphitinokkita ikkitino daafira lamenka dishinanni. 21Manchu sao hoolate kakkalora ikkannoha mitto ge'rechu goco Kaaliiqira Xaadu Dukkani nafarira haa're abbona. 22Qeesichuno sao hoolate kakkalo gocinni, manchu loosino saora Kaaliiqi albaanni saosi agursiisona; saosino agurantannosi.
23« ‹Kana"aani gobba iillitine aye haqqeno kaasidhiniro, baatto battaabbino daafira, 3 diri gedensaanni keeraa'mita geeshsha ise fushshitino laalcho ittinoonte. 24Shoolki diro laalo baala Kaaliiqira qullaawa galatu kakkalo ikkitanno. 25Ontikki diro kayinni, laalcho ittinanni; hatto assitiniro jajji'ne bati'ranno. Ani Kaaliiqi Magano'neeti.
26« ‹Mundee giddo noo maala mittono ittinoonte; kiiltinoonte; bitidhinoonte; 27umo qooxo mudhitinoonte; ereeda'neno haransidhinoonte. 28Reyino mannira biso bicidhinoonte; huduuxxitinoonte. Ani Kaaliiqaati.
29« ‹Meya beetto'ne hayyaatu mine baashaabbe shollitanno gede assitinoonte; hatto assitiniro ki'neno wole magannawa higginanni; baattoteno batte wo'mitanno. 30Fooliishshote Barra'ya agarre; Qullaawa Darga'yano ayirrisse. Ani Kaaliiqaati.
31« ‹Battaabbinannina, ekera coyishshiishannoha woshshidhinoonte; qaallichunniwa hadhinoonte. Ani Kaaliiqi Magano'neeti.
32« ‹Jawaho ka'ine darga uuyye; geerra ayirrisse; Magano'ne waajje. Ani Kaaliiqaati.
33« ‹Giddo'ne hee'rannoha wole gobba manna tulteessitinoonte. 34Giddo'ne hee'rannoha wole gobba manna fiixi'ne gede assitine la'e; umi'ne gede assitine baxxensa; ki'neno Gibitsete wole gobba manna ikkitine heedhinita qaagge. Ani Kaaliiqi Magano'neeti.
35« ‹Safaraasinchunni woy keenaasinchunni woy bikkaasinchunni manna hanaaqqinoonte. 36Halaalaanchu bikkaasinchi, halaalaanchu safaraasinchinna halaalaanchu keenaasinchi heero'ne. Gibitsete gobbanni fushshoommo'nehu ani Kaaliiqi Magano'neeti. 37Woga'yanna seera'ya baala agarre; wonshe. Ani Kaaliiqaati› yiino yite kulinsa» yii.
Currently Selected:
LEEWAAWOOTA 19: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
