LEEWAAWOOTA 18
18
SEERIMALE SIIMU XAADOOSHSHE
1Kaaliiqi Musera, 2«Israeelootaho, ‹Ani Kaaliiqi Magano'neeti; 3heedhinoonni gobba manni Gibitsennihu assannore assitinoonte; haa're masseemmo'ne gobbahu Kana"aani manni assannoreno assitinoonte; wogansano ha'runsitinoonte. 4Seera'yanna woga'ya seekkitine agadhe. Ani Kaaliiqi Magano'neeti. 5Woga'yanna seera'ya agadhe; konne assitiniro, lubbotenni heedhinanni. Ani Kaaliiqi Magano'neeti.
6«‹Ayino fiixisi ledo siimu xaadooshshe assoonke. Ani Kaaliiqaati. 7Amakki ledo siimu xaadooshshe assite annakki shollishshooti; iltinoheta amakkino shollishshooti. 8Annikki galte ledo siimu xaadooshshe assitooti. Kuni coyi annakki shollishanno. 9Rodookki ledo siimu xaadooshshe assitooti; mine ilantinote ledono ikko gobba ilantino beetto amakkite woy annikkite ledo siimu xaadooshshe assitooti. 10Beettikki beetto woy beettokki beetto ledo siimu xaadooshshe assitooti; kuni coyi umokki shollishannoho. 11Annikki galte annikkira iltino beetto rodookkiitina, ledose siimu xaadooshshe assitooti. 12Adakki ledo siimu xaadooshshe assitooti; annikkira maalu fiixaatina. 13La'lamakki ledo siimu xaadooshshe assitooti; amakkira maalu fiixaatina. 14Wosiilikki galte ledo siimu xaadooshshe assite, wosiilakki shollishshooti; iseno amakkiitina. 15Beettikki beetto ledo siimu xaadooshshe assitooti; ise atera beettikki galteeti. 16Rodiikki galte ledo siimu xaadooshshe assitooti; kuni coyi rodookki shollishannohona. 17Amate ledonna beettote ledo siimu xaadooshshe assitooti; beettise beetto ledonna beettose beetto ledono siimu xaadooshshe assitooti; insa maalu fiixakki ikkara dandaannona, kuni makki'nannireeti. 18Galtekki lubbotenni heedheenna, rodoose ginase assite adhitooti.
19«‹Godowu daye hee'reennase siimu xaadooshshe assate meyatenniwa martooti. 20Manni galte ledo siimu xaadooshshe assite, umokki batteessitooti. 21Oosokki giddonni mittono Molooki yinanni maganira kakkallara uyitooti; togo assatenni ane Maganikki su'mano shollishshooti. Ani Kaaliiqaati. 22Meyate ledo siimu xaadooshshe assinanninte gede, labbaahu ledono hattoo xaadooshshe assitooti. Kuni Maganu giwanno coyeti. 23Labbaahano ikko meyati saadate ledo siimu xaadooshshe assitine umo'ne batteessitinoonte. Tini akkimalete.
24«‹Kunni baalunkunni mitturinnino umo'ne batteessitinoonte; albi'nenni shorreemmo daga kunni coyi baalunkunni battaabbinote. 25Baatto nafa gattukkinni battaabbino; anino cubbisera yee qorichishoommose. Kunnira, aanase hee'ranno manna tuffino. 26Ki'ne kayinni, woga'yanna seera'ya agadhe; ki'ne gobbate ilantinoonnirinna giddo'ne heedhannori wole gobba mannino konne busha coye assitinoonte. 27Ki'nera albaanni baattote aana hee'rino manni konne busha coye assino daafira, baatto battaabbino. 28Ki'neno baatto batteessitiniro, albi manna tuffunte gede ki'neno tuffanno'ne. 29Tenne batte assannohu baalu, manni'ya ledo kiiramoonke.
30«‹Hajajo'ya agadhe; ki'nera albaanni baattote aana heedhannori assitino bunshe giddonni mitte bunsheno assitinoonte; kurinni umo'ne batteessitinoonte. Ani Kaaliiqi Magano'neeti› yiino yite kulinsa» yii.
Currently Selected:
LEEWAAWOOTA 18: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
