FULO 20

TONNE HAJAJO

(Mar 5:1-21)

1Kaaliiqi kunnira woroonni noo qaale coyi'ri yannara, 2«Gibitsete gobbanni borojjimmate giddonni fushshummo'nehu Kaaliiqi Magani'ne aneeti.

3«Ane agurranna wolu magani hee'roonke'ne.

4«Gordohono ikko baattote, baattote woroonni wayi giddo noorichinnino ikkiro magansi'rate yitine ayee misileno seekkidhinoonte. 5Kaphu magannara kumbuultinoonte; insano magansidhinoonte. Ani hinaasaancho Maganootina, gibbannoerira sasenna shoole ilama geeshsha annuwate cubbo oosote iillisheemmo. 6Baxxannoerenna hajajo'ya ayirrissannore kayinni kume ilama geeshsha bagamannokki baxillinni baxeemmonsa.

7«Ane Magani'ne Kaaliiqi su'ma doogimale kayissinoonte; doogimale su'ma'ya kayisannohu dikeeraawanno.

8«Fooliishshote Barra wolu barriwiinni baddine qullaawa assitine ayirrisse. 9Looso'ne baala 6 barrinni loosidhe; 10lamalki barri kayinni, Magani'ne Kaaliiqira Fooliishshote Barraatina ki'ne, ooso'nenna seenni'ne, borojji'ne, saada'nenna, gobba'nera hee'rannohu wole gobba mannino kunni barrinni looso loosi'roonke. 11Ani 6 barrinni gordonna gobba, baaranna giddosi noore baala kalaqe lamalki barra fooliishshi'roommo; ani Kaaliiqi Fooliishshote Barra maassi'roommohunna qullaawa assoommohu kunni daafiraati.

12«Magani'ne Kaaliiqi aanno'ne baatto aana diri'ne seedanno gede anna'nenna ama'ne ayirrisse.

13«Shitinoonte;

14«Foortinoonte;

15«Moortinoonte;

16«Kaphunni naqqassinoonte;

17«Wolu manchi mine yortinoonte; galtesi, borojjesi, handosinna harrichosi woy wolu afi'rinore mittoreno yortinoonte» yii.

MANNU MAGANUNNIWA SHIQQI YAA WAAJJI

(Mar 5:22-33)

18Mannu baalunku beleqonna banqo, buudu xurumbi luulonna ilaalu wiliilanna afe waajje huxi'ranni fafe uurre, 19Musera, «Maganu coyi'riro reyineemmona, isi coyi'roonkenke; ninke macciishshineemmona ati coyi'rinke» yii.

20Museno mannaho, «Kaaliiqi iso ayirrissine cubbo loossinannikki gede assa'neralla dayinona waajjitinoonte» yii. 21Mannu fafe uurre hee'reenna, Muse Kaaliiqi noowa kolishshu gomichiwa shiqqi yii.

KAKKALLANNI DARGI DAAFIRA UYINOONNI SEERA

22Kaaliiqi Muse, «Israeelete mannira, ‹Ani Kaaliiqi gordoho hee're coyi'roommo'neta affinoonni. 23Ane agurranna wole maganna heedhoonke; birrunninna culkunni seekkinoonnita kaphu maganna magansidhinoonte. 24Anera kakkalote darga bushshunni seekke"e; shilqonnitanna mittimmate kakkalo boottannitanna ge'reewunnita hakkiicho kakkalle"e; su'mi'ya qaagamanno gede hedoommo darga baalaho daye maassi'reemmo'ne. 25Kakkallanni darga kinchunni seekkitinara hasidhiniro boccinoonte; siwiilunni kissiniro lagaawanno daafira, kakkalote dargira di"ikkanno. 26Hakkiira fultinanni woyite teedi'ne leellannona, kakkallanni dargira dirima seekkitinoonte› yiino yite kulinsa» yee hajajisi.

Currently Selected:

FULO 20: QulMax

Highlight

Copy