FULO 21

BOROJJE ASSINE AMANDANNI GARA

(Mar 15:12-18)

1Kaaliiqi Musera, «Israeelete mannira kulattonsa seeri konneeti: 2Ibiraawicha ikkinoha borojjimmate hidhittoro, 6 diro soqqamohena; lamalki diro asalu nookkihu gede assite borojjimmatenni fushshisi. 3Callichisi dayinoha ikkiro callichisi ha'rona; galtesi ledo dayinoha ikkiro kayinni iseno adhe ha'rona. 4Galtesi mootichisi haa'rinosita ikkituronna oosono iltinosiha ikkiro, isenna oosose mootichisiwa gatteenna isi callichisi ha'rona. 5Borojjichu kayinni, ‹Mooticha'ya ate, galte'yanna ooso'ya baxeemmo'ne daafira fule diha'reemmo› yiiro, 6#Lew 25:39-46 lai. mootichisi magansi'nanniwa haa're masse, waalchunniwa shiqqi asse maccasi gontimunni qaseenna, lubbotenni noo geeshsha borojjichosi ikkona.

7«Mittu manchi meya beettosi borojjimmate hiriro, labballu gede borojjimmatenni fultoonke. 8Shiima yanna gedensaanni galte assi're hidhinoti, mootichase hagiirsiisa hoogguro kayinni, annise woxxosena; wole gobba mannira hira dihasiissanno. Hatto assiro eino sheemaati diigamanno. 9Beettisira galte assi'rate hasi'riro kayinni, umisi beetto gede asse kiirosena. 10Mittu manchi layinki galte adhiro, umitera sagale, imaananna galtimma xeisoonkese. 11Konne sasenka coye wonshannosekkiha ikkiro kayinni, asalu nookkite gede asse borojjimmatenni fushshosena.

BUNSHE ASSANNO MANNA QORICHISHATE WORROONNI SEERA

12«Manna gane shaanno mancho shinona. 13Shaate hede ikkikkinni danotenni manna shiinohu, maaxantinara qixxeesseemmo dargira xooqona. 14Kayinnilla egenne xagarrotenni manna shaannoha, xooqe kakkalo'ya dargira mariro nafa, hakkiinni fushshitine shiiyye.

15«Annasi woy amasi ganannohano shinona.

16«Manna moore hirannoha, woy hirara yee haa're minesi maaxi'rannoha shinona.

17«Annasi woy amasi xonannohano shinona.

18«Lamu manchi giwanteenna, ku'u ko'onne kinchunni woy tuntummotenni ganiro, ganaminohu kayinni reyikkinni gatiro, ganinoha shinoonke. 19Ganame uttaawe goxinowiinni tirate bordunni irkisi're xawo fuliro, ganinosi manchi ganamasinni kainohunni xeinosire riqiwosina; jawaata geeshshano towatosina.

20«Labbaaha woy meya borojjichosi gane shaannoha qorichinshona. 21Gannoonni manchi mittunna lamu barri giddo reya hoogiro kayinni qorichishamoonke; borojjichosi hooga umise isira qorichaho.

22«Lamu manchi giwantanni heedhe, godowinni noo mancho affukkinni ganteenna umose ka'uro wole gawajjo kayinni iilla hooggusero, ganise manchi ayiddaannise ku'lannore oona; aannoreno geerru coyi'rona. 23Mancho gawajjantinoha ikkiro, lubbote darga shiinoha shinona. 24#Lew 24:19-20; Mar 19:21; Mat 5:38 lai. Ille huninoha ikkiro illesi hunnona; hinko hiiqqinoha ikkiro hinkosi hiiqqinona; anga hiiqqinoha ikkiro angasi hiiqqinona; lekka hiiqqinoha ikkiro lekkasi hiiqqinona. 25Giirinoha giirrona; madiissinoha madiissinona; ganinoha ganne qollona.

26«Borojjichisira woy borojjichosira ille gane huninohu, illete darga borojjimmatenni fushshe agurona. 27Borojjichisira woy borojjichosira hinko gane hiiqqinohu, hinkote darga borojjimmatenni fushshe agurona.

JAJJU AYIDDI ANNIMMA

28«Bootu manna qase shiiro, kinnatenni ganne shinona; maalasino intoonke. Bootu anna kayinni kinsoonke. 29Bootu albaanni qasannoha ikkinota anfe, ‹Hoo'li› yine kulleennanni, bootu anni kayinni afanni wore agureenna manna shiiro, booto kinnatenni ganne shinona; bootu annano shinona. 30Shii'rino ayiddi guma itara hasi'rannoha ikkiro kayinni, yinoonnisi geeshsha oona. 31Bootu meya woy labbaa beetto qasiro, yoo mitto garaantilla. 32Bootu labbaaha woy meya borojjicho qase shiiro, bootu anni borojjichu annira 30 kinchu birra oona. Booto kayinni kinnatenni ganne shinona.

33«Mittu manchi bale fane aguriro, woy bale ume tuikkinni agureenna bootu woy harrichu giddo uwiro, 34balete anni reyitu saada umisira gatisi're, annaho saadasi fushshitanno waaga oona. 35Mittu manchi booti wolunniha qase shiiro, lubbotenni noo booto hirte woxe taalo beeqqitona. Reyi booti maalano beeqqitona. 36Bootu albanni qasamannoha ikkinota anfoonniha ikkironna, bootu annino wore agurinoha ikkiro, qase shii booti anni reyi booto umisira gatisi're, lubbotenni nooha shii'rihura oosina.

Currently Selected:

FULO 21: QulMax

Highlight

Copy