FULO 19

KAALIIQI MANNISI LEDO EINO GONDOORO

1Israeele Gibitsetenni fultuhunni sayikki aganira umi barra Siina Ilaali mule noo halalla iillitu. 2Hakkiira dagginohu Refidiiminni ka'eeti; hakkiira iillituhu gedensaanni ilaalaho albaanni baxxisidhu. 3Museno Maganu ledo xaadara ilaalu iimira fuli; Kaaliiqino ilaalu iima hee're woshshe, «Yaiqoobi sirchira Israeelete: 4Gibitse assummotanna, ki'neno caacurresi qoolunni hanqafe duqqanno allamurchi gede asse abboommo'neta affinoonni. 5Xaano anera hajajantinironna gondooro'ya agadhitiniro, baatto baalate aana noo manniwiinni baxxitine ki'ne ane manna ikkitinanni; 6anera qullaawoota ikkitine gashshooti'yara qeesimmatenni soqqantinannie yii. Konneno Israeelete manni baalaho kulatto» yiisi. 7Muse ilaalu aaninni dirre geerra woshshe gamba asse, Kaaliiqi yiinosire baala kulinsa. 8Mannuno mitto afoo ikke, «Kaaliiqi hajajinoha baala assineemmo» yee dawari. Museno mannu coy'rino coye Kaaliiqira egensiisi. 9Kaaliiqi Musera, «Mannu ate ledo hasaawanna macciishshanno gedenna wo'manka woyite yaatto coye baala ammananno gede tunsino gomichi giddo hee're atewa dayemmo» yiisi.

Museno mannu yiinota Kaaliiqira kuli. 10Kaaliiqi Musera, «Mannunniwa marte techonna ga'a keeraa'mitanno gedenna imaanansano hayishshidhanno gede kulinsa. 11Sayikki barra mannu wo'munku la"anna Siina Ilaali aanira dirreemmo daafira qixxaawona. 12Mannaho sa"annokki gede danna worte, ilaalu iimira giddannokki gedenna mulira nafa shiqqi yaannokki gede kuli; ilaala kisannohu reyanno. 13Ilaala kisannoha mannano ikko moyicho kinnatenni ganne woy bagadunni qanse shino ikkinnina ayino angatenni kisoonke. Ilaalu iimira fula dandiinannihu, buudu xurumba ufuunfanni woyite callaati» yiisi.

14Muse ilaalu iiminni dirre, mannu keeraa'mannonna imaana hayishshi'ranno gede kulinsa. 15Qoleno, «Sayikki barrira qixxaabbe; meyatenniwano shiqqi yitinoonte» yiinsa.

16Sayikki barra beleqonna banqo tunsino gomichonna lowoha buudu xurumbi luulo macciishshini; qachaho noo manni baalunku waajje huxi'ri. 17Muse manna Maganu ledo xaadisate noo qachinni haa're fushshe, ilaalu lekkaalloonni masse uurrisi. 18Kaaliiqi giiratenni dirrino daafira, Siina Ilaala wiliile guggushshitu; ilaalu aaninni ka'anno wiliile boosonni fultannota labbanno; ilaaluno gudisame huxi'ri. 19Buudu xurumbi luuli lowo geeshsha bati'ranno woyite Muse coyi'ri; Maganuno belequnni dawarisi. 20Kaaliiqi Siina Ilaali aanira dirre, Muse ilaalu umi aanira maranno gede woshshisi; Museno kae mari. 21Kaaliiqi Musera, «Dirrite, ane la"ara danna qaafe sae lowo manni goofannokki gede kulinsa. 22Anewa shiqqanno qeese nafa, gudeemmonsakki gede insanaa keereensidhona» yiisi.

23Muse Kaaliiqira, « ‹Ilaalu gaangaawira danna wortine anera baxxinoha asse"e› yoottonke daafira, mannu ilaalu aanira digiddanno» yii.

24Kaaliiqi, «Dirrite Aarooni haadhe amo; qeesootunna mannu kayinni reyannona worroonni danna saoonke; giwe sairo kayinni gudeemmonsa» yiisi. 25Museno dirre konne coye mannaho kuli.

Currently Selected:

FULO 19: QulMax

Highlight

Copy