LAYINKI QORONTOOSI 4

DORU UDUUNNICHI GIDDO NOO MIINJA

1Tenne soqqansho Maganu maaronni afi'noommo daafira wolqa diba'neemmo. 2Saalfachishannoha go'le noo coye facci assine agurroommo; dixagarreemmo; Maganu qaale diqadaawulleemmo. Halaale xawinse kulankenni, mannu baalu tii"ira yine umonke Maganu albaanni reqecci assineemmo. 3Danchu Duduwinke go'linoha ikkiro nafa, go'lannohu ba'annoriraati. 4Ammantinokkiri Maganu lawishsha ikkinohunniha Kiristoosiha Danchu Duduwi xawaabba ayirrinyunniha affannokki gede, wodanansa tenne gobba magani beeshshino. 5Yesuusi Kiristoosi Mooticha ikkinota kulleemmo ikkinnina ninke umonke dikulleemmo. Yesuusira yine ninke ki'nera borojje ikkineemmo. 6«Tunsichoho caabbichu xawo» yiino Magani, Kiristoosi daninni xawannoha Maganu ayirrinye afate xawaabba aankera caabbichosi wodaninke giddo xawisino.#Kal 1:3 lai.

7Tini jawa wolqa Maganunnite ikkinnina ninketa ikkitinokkita leellishate, kuni miinji doru uduunnichi giddo no. 8Ninke wo'munku raginni miicammoommo; ikkeennano dishenteemmo. Garuno bainonke; hexxo kayinni dimudhineemmo. 9Xiiwammoommo; ikkirono dihawammeemmo. Ganne tunganninke; ikkeennano diba'neemmo. 10Yesuusi heeshsho ninke aana leeltanno gede, wo'manka woyite mannimmanke aana Yesuusi reyo duqqine ha'rammeemmo. 11Yesuusi heeshsho reyanno manninatinke aana leeltanno gede, xa lubbotenni hee'noommori wo'manka woyite Yesuusi daafira yine reyote sa'ne aamammeemmo. 12Kunnira, reyosi ninke aana heeshshosi qolte ki'ne aana loossanno.

13Ikkollana, «Ammanoommo daafira coyi'roommo» yine borreessinoonninte gede, ninkerano mittu ammanate ayyaani noonke daafira ammanneemmo; kunnira coyi'neemmo. 14Mooticha Yesuusa reyotenni kayisino Magani ninkeno Yesuusi ledo kayise ki'ne ledo albisira shiqishannonketa egenninoommo.#Far 116:10 lai. 15Tini ki'nera qiniite ikkitu elto lowo mannira baqaqqu bikkinni, Maganu ayirrinyira galatu lexxanno.

AMMANATE HEESHSHO

16Kunnira, wolqa diba'neemmo. Gobbayidi manninatinke ba"annoha ikkiro nafa, giddoyidi manninatinke barru barrunkunni haaroo'manno. 17Kuni shetisannonkehu shiimu sa"anno qarri, hakko qarrira aliidiha dhaggeeffantanniha hegere ayirrinye haa're daannonke. 18Ninke illetenni leellannoha ikkikkinni leellannokkiha illachinsheemmo. Illetenni leellannohu shiima yannalla keeshshanno; illete leellannokkihu kayinni hegereho.

Currently Selected:

LAYINKI QORONTOOSI 4: QulMax

Highlight

Copy