LAYINKI QORONTOOSI 3

1Galagalle ninkenee jacca hananfoni? Woy kayinni mitu mitu gede ki'newiinni woy ki'nera borreessinoonniti irkote borro hasiissanke ikka? 2Mannu baalu egenninorinna nabbawannori, wodaninkera borreessantine heedhinoonniri sokkanke ki'neeti. 3Ninke soqqanshonni dagginoonniri ki'ne, Kiristoosi sokka ikka'ne xawoho. Tenne sokka heeshshote Magani Ayyaaninni ikkinnina kuulunni diborreessinoonni. Mannu wodani giddo ikkinnina bocame kinchi aana diborreessinoonni.#Ful 24:12; Erm 31:33; Hiz 11:19; 36:26 lai.

4Togo yineemmohuno ninke Kiristoosi widoonni Magano addaxxineemmohuraati. 5Soqqamate wolqa aannonkehu Maganoho ikkinnina ninke uminkenni mittore nafa assate guunte dianfeemmo. 6Haaru Gondoori soqqamaano ikkineemmo gede wolqa uyinonkehu isooti. Kunino borreessinoonni seerinni ikkikkinni Qullaawu Ayyaani kaa'lonniiti. Borreessinoonni seeri reyo abbanno; Qullaawu Ayyaani kayinni heeshsho aanno.#Erm 31:31 lai.

7Seera bocame kinna aana borreessinoonni; Seera uyini yanna xawaabbi agure ho'liha nafa ikkiro, Israeelootu Muse alba qasse la"a didandiitino. Reyo abbanno Seeri togoo ayirrinyinni daannoha ikkiro,#Ful 34:29 lai. 8Qullaawu Ayyaaninni soqqama roore ayirrado di"ikkitino? 9Manna saote kiirranni soqqansho hakkeeshshi ayirrinye afidhannoha ikkiro, keeraa'mate soqqansho roore ayirrinye hiitto afi'ra hoogganno? 10Albi ayirrinye xaahu ledo taashshine la'nanni woyite, albi ayirrinyi mite nafa diyinanniho. 11Hakku ba"anno coyi kageeshshi ayirrinye afi'rannoha ikkiro, hegere geeshsha hee'rannohu hiitto roore ayirrinye diafi'ranno!

12Togoo hexxo noonke daafira, ruxxi yinummokkinni coyi'neemmo. 13Ninke, xawanni noohu albisi galagale darga higanni hee'reenna Israeele la'annosikki gede alba diphi Muse gedeere di"ikkinoommo.#Ful 34:33 lai. 14Insa wodani addinta dillaawino. Techo geeshsha nafa Albi Gondooro nabbabbanno woyite, wodanansa hakku guggu'laasinchi diwe no. Hatto ikkannohu, hakku guggu'laasinchi Kiristoosi callu hoolannoha ikkinohuraati. 15Techo geeshsha Muse maxaaffa nabbabbanno yanna baalate wodaninsara hakku guggu'laasinchi no. 16Mannu Mootichu widira higanno woyite kayinni, hakku guggu'laasinchi ho'lanno.#Ful 34:34 lai. 17Mootichu Ayyaanaho. Mootichu Ayyaani noowa wolapho no. 18Ninke baalunku diphinoommokki albinni Mootichu ayirrinye xawinseemmo. Ayyaana ikkino Mooticha lawate ayirrinyunni ayirrinyu widira hinge soorrammeemmo.

Currently Selected:

LAYINKI QORONTOOSI 3: QulMax

Highlight

Copy