MACAAFA FAARFANNAA 41
41
Kadhata Nama Dhukkubsatee Fira Dhabee
(Geggeessituu warra faarfatootaaf; faarfannaa Daawit)
1Namni isa dadhabaadhaaf yaadu haa gammadu!
Waaqayyo guyyaa hamaatti isa in oolcha*;
2Waaqayyo isa in eega, jireenyas in kennaaf;
biyya keessattis <<Isa gammade>> in jedhama,
yaa gooftaa ati,
gojomii diinota isaatti dabarsitee isa hin kennitu.
3Waaqayyo siree dhukkubaa irratti ol isa in qaba,
fayyisees siree dhukkubaa irraa isa in kaasa.#1 Fak 14:21; Mat 5:7
4Ani immoo,<<Yaa Waaqayyo, anaaf oo'i,
ani si duratti cubbuu hojjedheera, na fayyisi!>>
jedhee kadhadheera.
5Diinonni koo hamaa ana irratti in dubbatu,
<<Inni yoom du'a,
maqaan isaas yoom lafa irraa bada?>> in jedhu.
6Namni ana ilaaluu dhufu,
sobee anaa wajjin in haasa'a,
garaa isaatti immoo dubbii hamaa kuufatee
karaatti ba'ee isa in odeessa;
7warri ana jibban hundinuu
waa'ee koo walitti in hasaasu,
wanta hamaa yaadanii ana irratti in qopheessu.
8Isaan,<<Dubbii gadheetu isa irra ga'e,
lafa ciisees deebi'ee hin ka'u>> in jedhu.
9Namni garaa kootii, inni ani amanadhe,
inni buddeena koo nyaate illee
ana dhiituuf miilla ol fudhate*.#9 55:12-14; Yoh 13:18; HoE 1:16
10Yaa Waaqayyo, ati faara anaaf toli,
diinota kootiif dugda akkan baasutti
lafan ciisee ana kaasi!
11Yeroo diinonni koo sagalee mo'ichaa
ana irratti dhageessisuu dadhaban,
anatti gammaduu kee ani kanaan nan beeka.
12Ani balleessaa malee waanan argamuuf,
ati ol qajeelchitee na qabda,
bara baraanis of dura na dhaabda.
13Waaqayyo gooftaan Israa'el,
maqaan isaa baraa hamma bara baraatti haa eebbifamu!
Ameen! Ameen*!#13 72:18; 89:52; 106:48
Currently Selected:
MACAAFA FAARFANNAA 41: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
