MACAAFA FAARFANNAA 19
19
Ulfinni Waaqayyoo Karaa Uumamaa Mul'achuu Isaa
(Geggeessituu warra faarfatootaaf; faarfannaa Daawit)
1Bantiiwwan waaqaa ulfina Waaqayyoo himaa jiru,
wanti bantii waaqaa jalaan mul'atus
hojii harka isaa in labsa*.
2Guyyaan guyyaa isatti aanutti kana in dabarsa,
halkanis halkan isatti aanutti
waa'ee kanaa in beeksisa.
3Isa kanaaf jechi, dubbiinis hin jiru,
sagaleen isaaniis hin dhaga'amu;
4haa ta'u iyyuu malee, wanti isaan dabarsan
guutummaa biyya lafaatti in ba'e;
wanti isaan himanis andaara lafaa in ga'e;
gooftichi achi bantii waaqaa keessatti
biiftuudhaaf godoo in dhaabe*.
5Isheen akka dhirsa misirroo
diinqa isaatii ba'utti in baati;
akka nama jagnaattis
adeemsa ishee raawwachuutti in gammaddi.
6Andaara bantii waaqaa isa gara tokkootii baatee,
naannoftee andaara isaa isa gara kaaniitti in lixi;
ifa ishee isa gubaa duraa kan dhokatus hin jiru.#1 Rom 1:20 4 Rom 10:18
Seerri Waaqayyoo Nama In Gammachiisa
7Seerri Waaqayyoo guutuu dha, lubbuu namatti in deebisa;
wanti seerri Waaqayyoo dhugaa ba'u amanamaa dha,
inni wallaalota iyyuu beektota in godha.
8Ajaji Waaqayyoo qajeelaa dha,
garaa namaa in gammachiisa;
abboommiin Waaqayyoo qulqulluu dha,
ija namaa in ibsa.
9Waaqayyoon sodaachuun yaada qullaa'aa dha,
bara baraan jabaatee in dhaabata;
akka namni ittiin geggeeffamuuf
wanti Waaqayyo kennu dhugaa dha,
guutummaan isaas qajeelaa dha.
10Inni Waaqayyo kennu kun warqee caalaatti,
warqee baqfamee qullaa'e baay'ee caalaattis,
ilaalamuun kan ta'uu dha;
damma caalaa,
nadhii dhaaba dammaa keessaa coccophu caalaas in miyaa'a.
11Garbichi kee isaan in gorfama;
namni isa eegus bu'aa guddaa qaba.
12Wanta utuu hin beekin irraa kaate
eenyutu hubachuu danda'a ree>>
Balleessaa koo isa na duraa dhokate
kana anatti hin ilaalin*!#12 Lak 15:22-29; Iyo 42:3-6
13Waan of gad dhiisuudhaan hojjetan irraas
garbicha kee eegi;
wanti kun ana irratti hin mo'in!
Yoos hir'inni ana irratti hin argamu;
xurii cubbuu guddaa irraas nan oola*.
14Yaa Waaqayyo kattaa koo fi furii ko,
wanti ani si duratti afaan kootiin dubbadhu,
garaa koottis yaadu fudhatamaa anaaf haa ta'u!#13 Fak 1:10-15
Currently Selected:
MACAAFA FAARFANNAA 19: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
