Macaafa Ermiyaas Raajichaa 35
35
Fakkeenya Warra Rekaabotaa Isaaniif Kennuu Isaa
(2Mot 10:15-16)
1Bara Yehoyaaqiim ilmi Yosiyaas biyya Yihudaa irratti mootii ture, dubbiin Waaqayyo biraa gara ana Ermiyaas dhufe kanatti fufee jira*; 2inni,<<Gara warra Rekaabotaa dhaqiitii isaanii wajjin dubbadhu; gara mana qulqullummaatti isaan fidi, kutaa tokkottis galchiitii daadhii waynii isaan obaasi!>> jedhe*. 3Kana irratti ani achumaan gara Yaazaaniyaa ilma Ermiyaas Habazneyaa dhaqee obboloota isaa fi ilmaan isaa hundumaa, guutummaa maatii warra Rekaabotaa nan fide; 4gara mana qulqullummaattis ol isaan galchee, kutaa mana ilmaan Haannaan raajichaa ilma Gidaaliyaa keessas isaan nan teessise; Haannaan kun nama Waaqayyoo ture; kutaan manichaa sunis isa kan warra gurguddootaatti aana ture; kutaan manaa inni kan warra gurguddootaas isa kan Ma'aseyaa ilma Shaalum isa balbala eeguu gara irraadhaan jiru turee dha; 5isaan erga taa'anii ani immoo daadhii waynii qodaatti naqee, xoofoo itti dhuganii wajjin Rekaabota dura dhaabee,<<Daadhii waynii kana dhugaa!>> isaaniin nan jedhe.#1 1:3; 2Mot 23:34-36 2 2Mot 10:15-16; 1Sen 2:55
6Isaan garuu deebisanii,<<Lakkii! Abbaan keenya Yonaadaab ilmi Rekaab,<<Isin, sanyiin keessanis bara baraan daadhii waynii hin dhuginaa!>> jedhee waan nu abboomeef, nuyi daadhii waynii hin dhugnu! 7Akkasumas,<<Biyya keessa jirtan kana keessa bara dheeraa akka jiraattanitti, bara jireenya keessanii hundumaatti dunkaana keessa jiraadhaa malee, mana hin ijaarratinaa, maasii baafattanii sanyii hin facaafatinaa! Muka waynii hin dhaabbatinaa, homaas hin qabaatinaa!>> jedhee ture. 8Nuyi abboommii abbaan keenya Yonaadaab ilmi Rekaab nu abboome in eegne; kanaaf nuyi, dubartoonni keenya, ilmaan keenyaa fi intaloonni keenya takkaa daadhii waynii hin dhugne, 9mana itti gallu hin ijaarranne, muka wayniis hin dhaabbanne, maasii baafannees sanyii hin facaafanne. 10Nuyi dunkaana keessa in jiraanne, wanta abbaan keenya Yonaadaab nu abboome hundumaas in raawwanne. 11Garuu yeroo Nebukadnezaar mootiin Baabilon biyya kana qabate, nuyi,<<Kottaa gara Yerusaalemitti ol in baanaa!>> waliin jennee loltoota warra Baabilonii fi loltoota warra Sooriyaa jalaa baqannee dhufnee as Yerusaalem keessatti hafne>> jedhan.
12Ergasii immoo dubbiin Waaqayyoo gara ana Ermiyaas in dhufe; 13Waaqayyo gooftaan maccaa, Waaqayyo inni kan Israa'el,<<Dhaqiitii namoota Yihudaa fi warra Yerusaalem keessa jiraataniin,<<Isin maaliif gorsa koo fudhachuu, anaafis abboomamuu diddan ree?>> jedhi! 14Yonaadaab ilmi Rekaab, sanyiin isaa daadhii waynii akka hin dhugne yommuu abboome, sanyiin isaa dubbii isaatiif abboomamanii hamma har'aatti iyyuu daadhii waynii hin dhugan; isaan egaa abbaa isaaniitiif in dhaga'u; ani immoo si'a baay'ee keessa deddeebi'ee isinitti himeen ture, isin garuu anaaf hin dhageenye*; 15ani deddeebisee raajota warra hojjetoota koo ta'an hundumaa isinitti ergee,<<Tokkon tokkon keessan karaa keessan isa hamaa irraa deebi'aa, hojii keessan tolfadhaa, waaqayyolii ormaa duukaa buutanii isaaniif hin hojjetinaa! Yommus isin biyya isa ani abboota keessaniif, isiniifis kenne keessa in jiraattu>> isiniin jedheen ture; isin garuu wanta ani isinitti hime hin dhageenye, dhaga'uus hin barbaanne*. 16Sanyiin Yonaadaab ilma Rekaab abboommii isa abbaan isaanii isaaniif kenne in eegan; isin garuu anaaf dhaga'uu in diddan. 17Kanaafis sabni Yihudaa fi warri Yerusaalem keessa jiraatan hundinuu yommuun isaanitti dubbadhe, dhaga'uu waan didaniif, yommuun isaan waames owwaachuu waan didaniif, kunoo, ani Waaqayyo gooftaan maccaa, Waaqayyo inni kan Israa'el, wanta hamaa isan fiduudhaaf dubbadhe isaanitti nan fida>> jedhe*.#14 25:4 15 7:9; 7:25-26; Mat 23:37 17 7:13-15
18Kana booddee ani Ermiyaas warra Rekaabotaatiin,<<Waaqayyo gooftaan maccaa, Waaqayyo inni kan Israa'el,<<Isin wanta abbaan keessan Yonaadaab isin abboome waan eegdaniif, akka inni isin barsiisetti waan jiraattaniif, wanta inni isin ajaje hundumaas waan gootaniif, 19sanyii Yonaadaab ilma Rekaab keessaa namni ana dura dhaabatee anaaf hojjetu hin dhabamu!>> jedha>> nan jedhe; kana Waaqayyo gooftaa maccaa, Waaqayyo isa kan Israa'eltu dubbate.
Currently Selected:
Macaafa Ermiyaas Raajichaa 35: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
