Macaafa Ermiyaas Raajichaa 36
36
Baaruk Macaafa Ermiyaas Raajichaa Sabaaf Dubbisuu Isaa
1Yehoyaaqiim ilmi Yosiyaas mootiin Yihudaa mootii ta'ee waggaa afuraffaa isaatti dubbiin kanatti fufee jiru Waaqayyo biraa gara ana Ermiyaas in dhufe*; 2inni,<<Wanta akka macaafa maramuu fudhadhuutii dubbii ani waa'ee Israa'elii fi waa'ee Yihudaa, akkasumas waa'ee saba warra kaanii hundumaa bara mootummaa Yosiyaasii jalqabee hamma ammaatti sitti dubbadhe hundumaa irratti caafi*! 3Sabni Yihudaa tarii wanta hamaa isa ani isaanitti fiduuf yaade kana hundumaa yommuu dhaga'an, adduma addaan karaa isaanii isa hamaattii in deebi'u ta'a; anis yakka isaanii fi cubbuu isaanii isaaniif nan dhiisa>> naan jedhe*.#1 25:1 2 1:2; 25:3 3 18:11; 26:3
4Ani immoo achumaan Baaruk ilma Neriiyaa ofitti waamee, dubbii Waaqayyoo isan ofii dhaga'e hundumaa afaaniin isatti nan hime; Baarukis wanta akka macaafa maramuu sanatti in caafe*. 5Kana booddee immoo Baarukin abboomeen,<<Ani mana qulqullummaa akkan hin linneef dhowwameera*; 6egaa ati dhaqiitii dubbii Waaqayyoo isa ani amma sitti himee, wanta akka macaafa maramuutti si caafsise kana guyyaa soomiitti mana qulqullummaa keessatti saba kanaaf, warra mandaroota Yihudaa keessaa dhufan hundumaafis dubbisi! 7Isaan tarii wanti Waaqayyo aariidhaa fi dheekkamsaan isaan irratti dubbate guddaa ta'uu isaa beekanii karaa isaanii isa hamaattii deebi'anii kadhataaf fuula Waaqayyoo duratti lafa in dha'u ta'a>> jedhe.#4 32:12; 45:1 5 20:1-2
8Baaruk ilmi Neriiyaa akkuma Ermiyaas raajichi isa abboome in godhe; dubbii Waaqayyoo isa wanta akka macaafa maramuu keessatti caafame sana mana qulqullummaa keessatti in dubbise; 9Yehoyaaqiim ilmi Yosiyaas mootiin Yihudaa, mootii ta'ee waggaa shanaffaa isaatti, waggicha keessaa ji'a salgaffaatti, sabni Yerusaalem keessa jiraatan hundinuu, warri mandaroota Yihudaa warra kaan keessaa gara Yerusaalem dhufan hundinuus yeroo itti soomuudhaan Waaqayyo duratti dhi'aatan in labsan. 10Yommus Baaruk dubbii Ermiyaas raajii dubbate isa wanta akka macaafa maramuu keessatti caafame sana kutaa mana qulqullummaa keessaa kutaa isa kan Gemaariyaa ilma Shaafaan caaftichaa, isa oobdii gara olii balbala karra mana qulqullummaa isa haaraa dura jiru sana keessaa saba hundumaaf in dubbise*.#10 26:24; 2Mot 22:3
11Miikaayaan ilmi Gemaariyaa akaakayyuun Shaafaan dubbiin Waaqayyoo inni wanta akka macaafa maramuu keessatti caafame sun hundinuu utuu dubbifamuu yommuu dhaga'e, 12ka'ee gara mana mootichaatti gad bu'ee kutaa manichaa keessaa isa kan caaftichaatti in lixe; kunoo, gurguddoonni biyyaa, Eliishaamaan inni caaftichi, Delaayaan ilmi Shemaa'iyaa, Elnaataan ilmi Akbor, Gemaariyaan ilmi Shaafaan, Zedeqiiyaan ilmi Hanaaniyaa, gurguddoonni warri kaan hundinuus achitti walitti qabamanii turan*. 13Miikaayaan wanta Baaruk macaaficha keessaa sabaaf dubbise dhaga'ee hunduma isaa isaanitti in hime; 14kana irratti gurguddoonni biyyaa sun Yehudii ilma Netaaniyaa akaakayyuu Shelemiiyaa, abaabayyuu Kuush erganii,<<Dhaqiitii, Baarukiin,<<Macaaficha maramu isa sabaaf dubbifte sana fidii kottu!>> jedhiin!>> jedhan; achumaan Baaruk ilmi Neriiyaa macaaficha maramu sana harkatti qabatee in dhufe. 15Jarris Baarukiin,<<Maaloo taa'ii nuuf dubbisi!>> jedhan; innis isaaniif in dubbise.#12 26:22
16Erga inni dubbicha hundumaa isaaniif dubbisee raawwatee, sodaatanii wal ilaalanii, Baarukiin,<<Nuyi wanta kana hundumaa mootichatti in himna>> jedhan; 17itti fufanii immoo,<<Mee wanta kana attamitti akka caafuu dandeesse nutti himi, Ermiyaastu sitti himee si caafsise moo?>> jedhanii, Baarukin in gaafatan. 18Inni immoo deebisee,<<Eyyee, isatu tokko tokkoon anatti himnaan ani immoo wanta akka macaafa maramuu kana keessatti qalamiidhaan caafe>> jedhe. 19Yommus gurguddoonni biyyaa sun Baarukiin,<<Atii fi Ermiyaas dhaqaatii, iddoo namni isin hin argine dhokadhaa!>> jedhan.
Mootichi Macaaficha Gubuu Isaa
20Gurguddoonni biyyaa sun macaaficha maramu sana kutaa manaa isa kan Eliishaamaa caaftichaa keessa kaa'anii, ofii isaaniitii immoo dubbicha mootichatti himuudhaaf gara mana mootummaa in dhaqan. 21Mootichi immoo macaaficha maramu sana akka fiduuf Yehuudin erge; innis macaaficha kutaa manaa isa kan Eliishaamaa caaftichaa keessaa fidee mooticha bukkee dhaabatee, gurguddoota biyyaa hundumaaf, mootichaafis in dubbise; 22yeroon sun waggicha keessaa ji'a salgaffaa yeroo dhaamochaa waan tureef, mootichi mana ji'a gannaa keessatti ibidda beddee irratti bobeessaniifii isa bukkee taa'ee in qaqaammata ture. 23Akkuma Yehuudiin macaafa maramu sana keessaa arraba lama yookiis sadii dubbiseen mootichi immoo qarabaa isa warri caaftonni ittiin bir'ii qaraniin irraa muree hamma macaafichi gubatee dhumutti ibidda isa beddee irratti boba'u sana keessa in bubuusa ture; 24mootichii fi hojjetoonni isaa, warri dubbii kana dhaga'an hundinuu hin sodaanne, gadda irraa kan ka'es uffata isaanii hin tarsaafne; 25isaan keessaa Elnaataan, Delaayaan, Gemaariyaanis macaaficha maramu sana akka hin gubneef mooticha kadhatanii turan; inni garuu isaaniif hin dhageenye. 26Mootichi itti fufee iyyuu Yeraami'el ilma mootii, Seraayaa ilma Azri'el akkasumas Shelemiiyaa ilma Abdi'el ergee, Baaruk isa caaftichaa fi Ermiyaas raajicha qabsiisuudhaaf in abboome; Waaqayyo garuu akka isaan hin argine in godhe*.#26 15:21
27Mootichi macaaficha maramu isa ani afaaniin Baarukitti himee caafsise sana erga gubee booddee, ammas dubbiin Waaqayyoo gara koo in dhufe; 28inni,<<Wanta akka macaafa maramuu kan biraa fudhadhuutii, dubbii macaafa isa duraa isa Yehoyaaqiim mootiin Yihudaa gube sana keessa ture deebisii irratti caafi*! 29Akkasuma immoo Yehoyaaqiim mootii Yihudaatiin,<<Ati Ermiyaasiin:- Mootiin Baabilon dhufee biyya kana akka balleessu, namaa fi horiis achi keessaa akka fixu, maaliif caafte>> jettee, macaaficha maramu sana in gubde>> jedhiin!>> jedhe*. 30Kana irratti Waaqayyo waa'ee Yehoyaaqiim mootii Yihudaa dubbatee,<<Sanyii isaa keessaa namni tokko illee teessoo Daawit irra kan taa'u hin argamu; reeffi isaa bakkeetti darbatamee, ho'a aduu fi qorra halkanii keessatti in gatama*; 31sababii isaan anaaf abboomamuu didaniif, sababii jal'ina isaaniitiifis jedhee, ani isa, sanyii isaa fi hojjetoota isaa nan adaba; waan hamaa ani isaan irratti fiduudhaaf yaade hundumaa isaan irratti, warra Yerusaalem keessa jiraatan irratti, saba Yihudaa hundumaa irrattis nan fida>> jedhe*.#28 30:1-2 29 25:8-11; 7:20; 9:9-10 30 22:19,30 31 7:13
32Kana booddee ani Ermiyaas wanta akka macaafa maramuu kan biraa tokko fuudhee Baaruk ilma Neriiyaa isa caaftichatti nan kenne; akkuma ani macaafa maramu isa Yehoyaaqiim mootiin Yihudaa gube sana itti himee caafsisetti, ammas Baarukin nan caafsise; akkasumas dubbii macaafa isa duraa keessatti caafamee wajjin kan wal fakkaatu baay'eetu itti dabalame*.#32 32:12
Currently Selected:
Macaafa Ermiyaas Raajichaa 36: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
