Macaafa Ermiyaas Raajichaa 34

Ermiyaas Gara Zedeqiiyaatti Ergamuu Isaa

1Yeroo Nebukadnezaar mootiin Baabilon loltoota isaa hundumaa fi mootummoota biyya lafaa irra jiran warra harka isaa jalatti abboomamanii fi saba hundumaa wajjin Yerusaalemii fi mandaroota naannoo ishee jiran hundumaa loluu jalqabetti, dubbiin kanatti fufee jiru Waaqayyo biraa gara ana Ermiyaas in dhufe*. 2Waaqayyo inni kan Israa'el,<<Dhaqiitii Zedeqiiyaa mootii Yihudaatiin, Waaqayyo,<<Ani mandarattii kana harka mootii Baabilonitti dabarsee nan kenna, inni immoo ibiddaan ishee in guba; 3atis qabamtee harka isaatti in kennamta malee, isa jalaa ba'uu hin dandeessu; ati mootii Baabilon argitee isa dura dhaabattee isaa wajjin dubbachuuf jirta; kana booddee immoo booji'amtee biyya Baabilonitti in geeffamta>> jedheera*. 4Yaa Zedeqiiyaa mootii Yihudaa! Mee dubbii Waaqayyoo dhaga'i! Waaqayyo,<<Ati billaadhaan hin ajjeefamtu, 5ati nagaatti utuu jirtuu in duuta; akkuma dur namoonni abboota kee mootota warra si dura turaniif godhan akkasuma ulfina keetiif ibidda qabsiisanii:- Wayyoo, yaa gooftaa koo! jedhanii siif in boo'u; ani Waaqayyo kana dubbadheera>> jedhi!>> jedhe*.#1 52:4; 2Mot 25:1-2 2-3 32:3-5; 21:10 4-5 21:7; 52:11; 22:18; 2Sen 16:14; 21:19

6Ergasii ani Ermiyaas gara Yerusaalem dhaqee wanta kana hundumaa Zedeqiiyaa mootichatti nan hime; 7yeroo sana loltuun mootii Baabilon mandaroota warra biyya Yihudaa keessaa hafan Yerusaalem, Laakiishii fi Asekaatti in duulan; Laakiishii fi Asekaan mandaroota biyya Yihudaa keessaa masaraa cimaa qabuu waan turaniif utuu hin qabamin turan.

Garboota Luba Baasanii Deebi'anii Gaabbuu Isaanii

8Zedeqiiyaan mootichi garboonni luba akka ba'aniif labsiin akka labsamu namoota Yerusaalem keessa jiran hundumaa wajjin kakuudhaan erga waliif galee booddee, dubbiin Waaqayyo biraa gara ana Ermiyaas in dhufe; 9akka waliif galtee sanaatti, namni garbicha yookiis garbittii sanyii warra Ibrootaa qabu hundinuu luba isaan in baasa; namni tokko illee Yihudii akka isaatti akka garbichaatti yookiis akka garbittiitti akka hin qabaanneef dhowwameera*. 10Kanaaf gurguddoonni biyyaa guutummaa namoota waliif galtee sana keessa turanii wajjin, dubbii irratti waliif galan kanaaf abboomamanii garboota isaanii dhiirotaa fi dubartoota luba baasuudhaaf, deebisaniis garboota akka isaan hin godhanne murtoo in godhan; akkasittis luba isaan in baasan. 11Yeroo yartuu booddee garuu gaabbanii warra luba baasanii turan sana deebifatanii garba in godhatan.#8-9 2Mot 4:1; Nah 5:5,8

12Kana irratti dubbiin Waaqayyoo gara ana Ermiyaas in dhufe; 13inni saba kanaan,<<Waaqayyo gooftaan inni kan Israa'el,<<Ani abboota keessan biyya Gibxii keessaa harka garbummaa jalaa yommuun baase, kakuu isaaniif galeen ture; 14ani isaaniin:- Isin adduma addaan nama Ibrootaa isa isinitti of gurgure, waggaa ja'a erga hojjechiifattanii, waggaa torbaffaatti luba isa baasaa! jedheen ture; abboonni keessan garuu isan isaanitti dubbadhe hin dhageenye, dhaga'uu isaas hin barbaanne*. 15Isin garuu amma deebitanii wanta ana duratti qajeelaa ta'e gootaniittu; isin tokkon tokkon keessan Ibroota keessaa isa garbicha godhattanii turtan amma luba baaftaniittu; mana qulqullummaa isa kan kootii keessattis ana duratti waa'ee kanaaf kakuu galtaniittu; 16amma garuu deebitanii maqaa koo xureessitaniittu; tokkon tokkon keessan garbicha keessanii fi garbittii keessan warra iddoo barbaadan akka dhaqaniif luba baaftanii turtan, deebiftanii immoo garboota akka isiniif ta'aniif giddisiiftaniittu. 17Kanaaf isin hundumti keessan anaaf abboomamtanii Ibroota akka keessanii luba baasuu waan diddaniif, ani kunoo, isin billaadhaan, dha'ichaan, beelaanis akka rukutamtaniif gara isaaniitti gad isin nan baasa; mootummoota biyya lafaa irra jiran hundumaa birattis wanta namni ilaalee sodaatu isin nan godha*.#14 Bau 21:2-4; Er 7:26; Lew 25:39-41; Kes 15:12 17 15:4

18<< <Namoota dibicha gorra'anii iddoo lama lamatti kutanii isa gidduu darbuudhaan fuula koo duratti kakatanii, deebi'anii immoo kakuu sana cabsan ani akkuma dibicha isaan gorra'anii sana isaan nan godha; 19gurguddoota Yihudaa fi Yerusaalem, hojjetoota mana mootummaa keessaa ergaman, lubootaa fi namoota biyya sanaa warra dibichicha iddoo lamatti kutanii gidduu darban hundumaa akkasuma nan godha. 20Ani harka diinota isaanii warra lubbuu isaanii balleessuu barbaaddanitti dabarsee isaan nan kenna; reeffi isaanii allaattota qilleensa keessa balali'aniif, bineensota caakkaa hundumaafis nyaata in ta'a*. 21Zedeqiiyaa mootii Yihudaa fi gurguddoota isaa harka diinota isaanii warra lubbuu isaanii balleessuu barbaadan keessa nan buusa; loltoota mootii Baabilon warra amma isin irraa deebi'an kanattis dabarsee isaan nan kenna*. 22Kunoo! Isaan gara mandarattii kanaatti akka deebi'an nan godha; isaanis mandarattii lolanii qabatanii in gubu; ani mandaroota Yihudaa onsee, kan namni tokko illee keessa hin jiraanne nan godha>> jedhe>> jedhi! Kana Waaqayyotu dubbate*.#20 12:9; 7:33 21 37:5 22 37:8; 32:2,24

Currently Selected:

Macaafa Ermiyaas Raajichaa 34: MacQul

Highlight

Copy

Compare