Macaafa Hisqi'el Raajichaa 21
21
Billaan Waaqayyoo Akka Isaanitti Dhufu Dubbachuu Isaa
1Dubbiin Waaqayyoo gara koo dhufee, 2<<Yaa mucaa namaa! Fuula kee gara Yerusaalemitti deebisiitii iddoo qulqullaa'aa irratti lallabi! Biyya Israa'el irrattis raajii dubbadhu! 3Waaqayyo, biyya Israa'eliin,<<Kunoo! Ani siin nan morma, billaa koos mann'ee isaa keessaa nan luqqifadha, isa qajeelaa, isa jal'aas si keessaa nan kuta; 4isa qajeelaa, isa jal'aas si keessaa waanan kutuuf, billaan koo gara mirgaatii hamma gara bitaatti foon kan uffate hundumaa irratti mann'ee isaa keessaa in luqqifama. 5Egaa foon kan uffate hundinuu, ani Waaqayyo billaa koo mann'ee isaa keessaa akkan luqqifadhe haa beeku! Inni si'achi mann'ee isaatti hin deebi'u>> jedhe.
6<<Yaa mucaa namaa! Ati hamma mudhiin si citutti aadi! Isaan durattis gadda keessa ba'ee namatti hadhaa'uun aadi! 7Yommuu isaan <<Ati maaliif aadda?>> siin jedhan, ati immoo <<Oduu waanan dhaga'eefan aada, yommuu wanti kun dhufu, onneen hundinuu na'ee in baqa, harki hundinuu in bushaa'a, lubbuun hundinuu in gaggaba, jilbi hundinuus bishaan in ta'a. Kunoo, kun in dhufa, in raawwatamas>> jedhiin>> Waaqayyo gooftaan kana dubbateera.
8Dubbiin Waaqayyoo gara koo dhufee, 9<<Yaa mucaa namaa! Ati raajii dubbadhu!>> jedhe;
<<Waaqayyo,<<Billaan! Billaan
morodameera, qarameeras,
10inni akka qaluuf qarameera,
akka balaqqeessa'uufis morodameera;
yookiis uleen mootummaa
inni kan ilma kootii,
ulee mootummaa warra kaan hundumaa
waan tuffateef in gammannaa ree*>>
11Billichis morodamuudhaaf kennamee,
qabannaatti akka toluufis qopheeffameera,
inni morodamee qaramee,
harka isa ittiin ajjeesuutti kennameera.
12Yaa mucaa namaa! Billaan kun saba koo fi
gurguddoota Israa'el
hundumaatti in dhufa;
gurguddoonnis saba koo wajjin
billaa dura in buufamu,
kanaafis mudhii kee rurrukutii,
iyyii wawwaadhu*!>>
13<<Qoramni dhuguma in dhufa; ati maaliif ulicha tuffatte ree>> inni fiixaan hin ba'uu ree?>> jedhe Waaqayyo gooftaan.#8-10 21:14-16,19-21; 5:1-2 12 Er 4:19
14<<Yaa mucaa namaa! Raajii dubbadhu, harkas rukutadhu!
Billaan nama qalu inni namoota baay'ee qalu
karaa hundumaan
isaan marsee jira;
billichi si'a lama, si'a sadiis
isaan haa rukutu!
15Onneen isaanii baqee, baay'een isaanii
karra isaanii hundumaa duratti
akka gufataniif,
ani billaa isa nama qalu
isaan dura kaa'eera;
kunoo kaa, billichi
akka balaqqeessa'uuf morodameera,
ittiin qaluudhaafis luqqifameera.
16Yaa billaa nana! Gara mirgaatti,
gara bitaattis,
garuma qarri kee itti gara galee
jirutti muri!
17Anis immoo harka koo walitti nan rukuta
aariin koos ana irraa in gala;
ani Waaqayyo kana dubbadheera>> jedhe.
Billaan Mootii Baabilon Akka Dhufu Himuu Isaa
18Ammas dubbiin Waaqayyoo gara koo dhufee, 19<<Yaa mucaa namaa! Billaan mootii Baabilon akka irra dhufuuf ati karaa lama argisiisi! Karaan kun biyyuma tokko keessaa ka'uutu irra jira; iddoo inni itti mandarichatti jal'atu irras muka milikkitaa dhaabi! 20Karaa billaan Raabaa isa kan ijoollee Amoonotaatti dhufu tokko, karaa billaan biyya Yihudaa, mandara Yerusaalem ishee dallaa dhagaa qabdu irratti dhufus tokko argisiisi! 21Mootiin Baabilon hooda dubbachuudhaaf mataa wal ga'ii karaa irra in dhaabata, xiyyoolii gad in naqa, waaqayyolii tolfamoo warra mana keessaa in gaafata, tiruu horii qalamees in ilaala. 22Wanti gara mirga isaa bu'u hooda Yerusaalem irratti dubbatamuu dha; innis akka wanta ittiin masaraa jigsan dhaaban, qaluudhaaf akka itti ajajan, iyya lolaas akka itti dhageessisan, akka itti wanta ittiin masaraa jigsan karra dura dhaaban, akka itti wanta marsaadhaaf barbaachisu itti hojjetanii koobii itti hojjetan in hima. 23Kunis warra isaa wajjin ka'uudhaan walii galan duratti hooda sobaa in fakkaata; inni garuu yakka isaanii isaan yaadachiisee isaan in booji'aa?>> jedhe*.#23 Lew 26:33; 2Mot 25:1
24Kanaafis Waaqayyo gooftaan,<<Sababii yakki keessan akka yaadatamu gootaniif, irra-dadarbaan keessan mul'ateefis, wanta hojjettan hundumaan cubbuun keessan in mul'ate; kana wanta gootaniif isaan isin in qabatu. 25Ati yaa guddaa Israa'el isa xuraa'aa fi jal'aa nana! Yaa isa guyyaan kee, guyyaan itti sitti faradamu ga'ee!>> jedhe.
26Waaqayyo gooftaan,<<Marata of irraa baasi! Gonfoos of irraa fuudhi! Wanti akka amma jiru kanatti hafu hin jiru; inni gad deebi'aan ol in kaafama; inni ol ka'aan gad in deebifama. 27Badiisa! Badiisa! Badiisa nan fida; kunis hamma abbaan firdii sun dhufee, ani isatti kennutti hin ta'u>> jedhe.
28Yaa mucaa namaa!
Ati waa'ee warra Amoon,
waa'ee yeelloo isaaniis raajii dubbadhu! Waaqayyo gooftaan,
<<Billaan! Billaan
akka qaluuf luqqifameera,
akka fixuuf, akka bakakkaas
akka ibsuuf morodameera;
29utuma isaan mul'ata sobaa
siif arganii,
hooda sobaas siif himanii,
morma reeffa warra jal'ootaa
warra guyyaan isaanii,
guyyaan itti isaanitti
faradamu ga'e irra,
billaan in kaa'ama.
30Ati billaa kee mann'ee isaatti deebisi!
Ani iddoo ati itti uumamtetti,
biyya hundee dhaloota keetii keessatti
sittis nan farada;
31ani aarii koo si irratti nan roobsa,
ibidda dheekkamsa koos sitti nan bobeessa;
harka namoota warra akka bineensaa keessa,
warra nama balleessuutti beekamanii
keessas sin buusa.
32Ati irbaata ibiddaa in taata,
dhiigni kee biyyicha keessatti in dhangala'a,
deebitees hin yaadatamtu;
ani Waaqayyo kana dubbadheera>> jedhe.
Currently Selected:
Macaafa Hisqi'el Raajichaa 21: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
