Macaafa Hisqi'el Raajichaa 20

Abboomamuu Diduu Saba Israa'el

1Kana booddees waggaa torbaffaatti, ji'a shanaffaatti, ji'icha keessaa guyyaa kurnaffaatti, jaarsolii Israa'el keessaa jarri tokko Waaqayyoon gaafachuudhaaf dhufanii fuula koo dura taa'an*; 2yommus dubbiin Waaqayyoo gara koo dhufee, 3<<Yaa mucaa namaa! Wanta Waaqayyo gooftaan jedhu jaarsolii Israa'elitti dubbadhu! Isaaniinis,<<Waaqayyo gooftaan, isin waa na gaafachuudhaaf dhuftanii ree>> Ani jiraataa dha! Ani akka isin waa na gaafattan hin godhu>> jedhe>> jedhi! Waaqayyo gooftaan kana dubbateera*. 4<<Yaa mucaa namaa! Ati isaanitti in faradda mitii ree>> Isaanitti in faradda mitii ree>> Wanta ciiggaasisaa abboonni isaanii hojjetan akka isaan beekan godhi*! 5Isaaniinis,<<Waaqayyo gooftaan:- Gaafan Israa'elin fo'adhe harka koo ol fuudheen mana sanyii Yaaqoobiif kakadhe; yommuun biyya Gibxiitti isaanitti mul'adhe, harka koo ol fuudheen:- Ani Waaqayyo gooftaa keessan jedhee, isaaniif kakadhe*; 6ani gaafas biyya Gibxii keessaa isaan baasee, gara biyya isa hundumaa caalaa miidhaguutti, isa aannanii fi damma baasutti, isa ani isaaniif ilaalee qopheessetti isaan galchuudhaaf harka koo ol fuudhee isaaniif nan kakadhe>> jedhe*. 7Ani isaaniin,<<Tokkon tokkon keessan wanta ciiggaasisaa isa iji keessan duukaa jiru sana gataa?! ani Waaqayyo gooftaa keessan waanan ta'eef, waaqayyolii tolfamoo warra Gibxiinis of hin xureessinaa!>> nan jedhe*.#1 8:1; 24:1 3 14:3 4 22:2; 23:36 5 Bau 6:7-8 6 Bau 3:8 7 Iya 24:14,23

8Isaan garuu ana irratti in ka'an, anaaf dhaga'uus hin barbaanne; tokkon tokkon isaanii wanta ciiggaasisaa isa iji isaanii duukaa jiru sana hin ganne, waaqayyolii tolfamoo warra Gibxiis hin dhiifne; yommus ani biyya Gibxii keessatti aarii koo isaanitti ba'uudhaaf dheekkamsa koo isaan irratti nan dhangalaasa jedheen ture*. 9Garuu sabni lafa irraa warri isaan gidduu isaanii jiraachaa turan, utuma ilaalanii ani ijoollee Israa'el biyya Gibxii baasuudhaan itti beekameen ture; kanaaf maqaan koo saba lafa irraa sana duratti akka hin xuroofneef jedhee kana nan godhe*. 10Kanaafan biyya Gibxii keessaa isaan baasee, lafa onaatti isaan fide. 11Akka namni eegee ittiin jiraatuuf ani seerrata koo fi wanta ana duratti qajeelaa ta'e isaaniif nan kenne*. 12Akkasuma immoo ani Waaqayyo isa isaan qulqulleessu akkan ta'e akka beekaniif, anaa fi isaan gidduuttis milikkita akka ta'uuf Sanbata koo isaaniif nan kenne*.#8 23:2-4 9 20:14,22; 36:20-23 11 Lew 18:5; Luq 10:28; Rom 10:5 12 Bau 20:8-11; 31:13-17; His 20:20

13Haa ta'u iyyuu malee, manni Israa'el immoo lafa onaa keessatti ana didee in ka'e; isaan seerrata koo isa namni eegee ittiin jirraatu, duukaa hin buune, wanta na duratti qajeelaa ta'es in tuffatan; Sanbata koos baay'ee in xureessan; yommus ani lafa onaa keessatti isaan balleessuudhaaf dheekkamsa koo isaan irratti nan dhangalaasa jedheen ture*. 14Garuu sabni lafa irraa warri isaan gidduu isaanii jiraachaa turan utuma ilaalanii achii isaan nan baase; kanaafis maqaan koo saba lafa irraa sana duratti akka hin xuroofneef jedhee kana nan godhe*. 15Akkasuma immoo biyya isa hundumaa caalaa miidhagu, isa aannanii fi dammi keessaa yaa'u isa ani isaaniif kenne sanatti akkan isaan hin galchine lafa onaa keessatti harka koo ol fuudhee nan kakadhe*. 16Kunis immoo sababii garaan isaanii waaqayyolii tolfamoo isaanii duukaa bu'ee, wanta na duratti qajeelaa ta'e tuffatanii, seerrata koo duukaa bu'uu dhiisanii, Sanbata koos xureessaniif ta'e. 17Haa ta'u iyyuu malee, ani garaa isaaniif laafeen isaan balleessuu dhiise; lafa onaa keessattis isaan hin fixne.#13 Bau 16:26-29; His 22:8 14 20:9; Lak 14:12-16 15 Lak 14:30

18Ani lafa onaa keessatti ijoollee isaaniitiin,<<Seerrata abboota keessanii duukaa hin bu'inaa, wanta isaan duratti qajeelaa ta'es hin eeginaa, waaqayyolii tolfamoo warra kan isaaniitiinis of hin xureessinaa! 19Ani Waaqayyo gooftaa keessan, seerrata koo duukaa bu'aa, wanta na duratti qajeelaa ta'es eegaa! 20Anaa fi isin gidduutti milikkita akka ta'uuf, Sanbata koo qulqullinatti eegaa! Isinis ani Waaqayyo gooftaa keessan akkan ta'e in beektu>> nan jedhe.

21Isaan garuu ana didanii in ka'an; isaan seerrata koo isa namni eegee ittiin jiraatu duukaa hin buune, wanta na duratti qajeelaa ta'e hin eegne; Sanbata koos in xureessan; yommus ani lafa onaa keessatti aarii koo isaanitti ba'uudhaaf dheekkamsa koo isaan irratti nan dhangalaasa jedheen ture. 22Garuu saba lafa irraa warra ani utuma isaan ilaalanii achii isaan baase duratti maqaan koo akka hin xuroofneef jedhee harka koo nan deebifadhe. 23Ergasii immoo saba lafa irraa gidduu akkan isaan facaasu, biyya adda addaa keessas akkan isaan tamsaasu, lafa onaa keessatti harka koo ol fuudhee nan kakadhe*; 24kunis immoo sababii iji isaanii waaqayyolii tolfamoo warra kan abboota isaanii duukaa ilaalee, wanta ana duratti qajeelaa ta'e eeguu dhiisee, seerrata koo tuffatee, Sanbata koos xureesseef ta'e. 25Ani kana irrattan seerrata gaarii hin ta'inii fi firdii isaan ittiin jiraachuu hin dandeenye isaaniif kenne; 26kennaa isaanii isa isaan angafa karra saaqu hundumaa aarsaa dhi'eessaniin isaan nan xureesse; naasuus isaanitti nan fide; ani Waaqayyo akkan ta'e isaan akka beekaniif kana nan godhe*.#23 Lew 26:33 26 16:20-21

27Kanaafis yaa mucaa namaa! Mana Israa'elitti dubbadhu! Isaaniinis,<<Waaqayyo gooftaan,<<Abboonni keessan kanaan na gananii na salphisan; 28biyyan isaaniif kennuudhaaf harka koo ol fuudhee kakadhetti yommuun isaan galche, isaan immoo lafuma gaara ol ka'aa fi muka baala qabu arganitti, achitti aarsaa isaanii in dhi'eessan; achittis kennaa tuttuqee na aarsu in kennan; akkasuma immoo ixaana fooliin isaa garaa nama ciibsu aarsanii, kennaa dhugaatiis in dhangalaasan>> jedhe>> jedhi! 29Kana booddees ani isaaniin,<<Inni isin gara <<Baamaa>> dhaqxan kun maali?>> nan jedhe; kanaaf hamma har'aatti maqaan isaa <<Baamaa>> jedhamee waamame; [<<Baamaa>> jechuun <<Iddoo ol ka'aa>> jechuu dha].

30Kanaaf mana Israa'elitti dubbadhu!<<Waaqayyo gooftaan,<<Isinis akkuma abboota keessanii of xureessituu ree>> Akkuma isaaniis wanta ciiggaasisaa duukaa buutanii ejjituu ree>> 31Kennaa keessan yommuu dhi'eessitan, ilmaan keessanis qalma gubamuuf yommuu dhi'eessitan, amma iyyuu isin waaqayyolii tolfamoo keessan kana hundumaan of xureessaa jirtu; egaa akka isin waa na gaafattan nan godhaa ree, yaa mana Israa'el>> Ani jiraataa dha! Ani akka isin waa na gaafattan hin godhu>> jedhe>> jedhi! Waaqayyo gooftaan kana dubbateera. 32Inni isin,<<Kottaa akka saba lafa irraa, akka gosoota biyya sanaa mukaa fi dhagaatti in saganna>> jettan, matumaa fiixaan hin ba'u*.#32 1Sam 8:20; Er 2:27; Bau 23:24

33Waaqayyo gooftaan dubbatee,<<Ani jiraataa dha! Ani harka jabaadhaan, irree ol fuudhamaadhaan, dheekkamsa dhangalaasuudhaanis isin irratti nan mo'a*; 34ani harka jabaadhaan, irree ol fuudhamaadhaan, dheekkamsa dhangalaasuudhaan saba warra kaan gidduudhaa, biyya isin itti bittimfamtan keessaas walitti qabee isin nan fida; 35ani lafa onaa isa kan saba warra kaaniitti isin nan geessa, achittis fuula koo duratti isinitti nan farada*. 36Akkuman lafa onaa isa kan biyya Gibxii keessatti abboota keessanitti farade, akkasuma immoo isinitti nan farada>> jedhe*. 37Waaqayyo gooftaan dubbatee,<<Ani ulee tikaa jala isin nan dabarsa, hidhaa kakuuttis isin nan galcha. 38Warra ana didanii ka'an, warra irra-daddarbanii anaan mormanis isin gidduudhaa baasee isin nan qulleessa; biyya isaan galaa ta'anii keessa jiraatan keessaa isaan nan baasa, garuu biyya Israa'elitti hin galan; yommus ani Waaqayyo akkan ta'e isin in beektu>> jedhe.#33 Kes 4:34 35 Hos 2:16 36 Lak 14:22-23

39Isin yaa mana Israa'el!<<Waaqayyo gooftaan,<<Anaaf yoo hin dhageessan ta'e immoo, tokkon tokkon keessan dhaqaatii, waaqayyolii tolfamoo keessaniif hojjedhaa! Garuu si'achi kennaa keessanii fi waaqayyolii tolfamoo keessaniin maqaa koo isa qulqulluu hin xureessinaa! 40Guutummaan mana Israa'el biyya sanatti tulluu koo isa qulqullaa'aa, tulluu Israa'el isa ol ka'aa irratti anaaf in hojjetu; anis achitti isaan nan simadha; achittis ani kennaa addaan kennitan, wanta jalqaba argattan, aarsaa keessan isa qulqullaa'aas isin irraa nan barbaada>> jedha>> jedhe; Waaqayyo gooftaan kana dubbateera*. 41<<Saba warra kaan gidduudhaa yommuun isin fidu, biyya isin itti bittimfamtan keessaa yommuun walitti isin qabu, akka foolii garaa nama ciibsuutti isin nan simadha; saba lafa irraa durattis qulqullummaa koo isin gidduutti nan argisiisa*. 42Yommuun biyya isa ani abboota keessaniif kennuudhaaf harka koo ol fuudhee kakadhee biyya Israa'elitti isin galchu, ani Waaqayyo akkan ta'e isin in beektu. 43Achittis akka itti jiraachaa turtanii fi hojii keessan isa ittiin of xureessitan hundumaa in yaadattu; wanta hamaa hojjettan hundumaafis of in jibbitu*. 44Isin yaa mana Israa'el!<<Ani akka jireenya keessanii isa hamaatti akka hojii keessan isa manca'aattis utuu hin ta'in, maqaa kootiif jedhee kana yommuun isiniif godhu, ani Waaqayyo akkan ta'e isin in beektu>> jedhe>> Waaqayyo gooftaan kana dubbateera*.#40 17:23; Far 48:2; His 44:30 41 28:25 43 36:31-32 44 36:20-23; 20:9,14,22

Biyya Gara Mirgaa Irratti Raajii Dubbachuu Isaa

45Yommus dubbiin Waaqayyoo gara koo dhufee, 46<<Yaa mucaa namaa! Fuula kee gara mirgaatti deebisiitii, biyya gara mirgaa irratti lallabi, caakkaa biyyichaa irrattis raajii dubbadhu! 47Caakkicha biyya gara mirgaatiinis <<Dubbii Waaqayyoo dhaga'i!>> jedhi!>> jedhe; Waaqayyo gooftaan,<<Kunoo! Ani ibidda sitti nan qabsiisa; innis muka jiidhaa fi muka gogaa hundumaa si keessaa gubee in fixa; arrabni ibiddichaa inni boba'us hin dhaamu; fuula hundumaas gara mirgaatii hamma gara bitaatti in guba. 48Ani Waaqayyo kana akkan qabsiise foon kan uffate hundinuu in arga; innis hin dhaamu>> jedhe. 49Ani kana irrattan,<<Maaloo, yaa Waaqayyo gooftaa! Isaan,<<Inni fakkeenyaan dubbata mitii ree?>> naan jedhu>> jedhe.

Currently Selected:

Macaafa Hisqi'el Raajichaa 20: MacQul

Highlight

Copy

Compare