Röm Luubö Mo Cäänö Kaper Wëël Röm
Luubö Mo Cäänö Kaper Wëël Röm
Wëëlö man agöör Pøølli baŋ jø Röm ni eni jiiŋŋa jöör lïïmmö mare kiper tïïc mano tïïe ya acooŋ Jwøk mar Röm. Na acaara mare beeye kiper nee tïïe dï jø Jwøk kunece ki kany mo orømø, køøre nee pööth Ecpeen ki køør køny marge. Eni wëëlö man agööre ni lama tier ŋäädhe mar jø Jwøk ki yi jöö man kïthi ya jø Jwøki bäät tïïc ki gø ki yi bëëtö marge. Røk weeli moa göör Pøølli, wëëlö man beeye mana gööre ni lama tier ŋäädhe bäre.
'Ba kanya nø määth jø acooŋ Jwøk moa en yi Röm ni caan lam man wø lame kiperge, ena cäänö kiper luumma nyään na met, ni kööe, ni «Bëënynyö mana cïp Jwøki onyoodhø ree, ni wø joot ki køør ŋäädhe keere na bäre bäre, kaawat mana gööri, ni ‹Eni noo bëënynyi ki køør ŋäädhe okwøw.› » (1:17)
Tier wëëlö man beeye ni jiy bëët, ni beege jø Juuth ki juurre, manynya gø nee bëënynyö marge jootge ki ri Jwøk, kiper geni bëët, ge ena tiet raay. Jiy bëënynyö marge jootge joodø baŋ Jwøk ki ri ŋäädhe na en ri Jecu Krictø. Pøøl acäänö thuwø kiper bëëtö mo nyään man wø joot ki ri Jecu Krictø, ni wø joot ki køør dwätö mar dhaanhø ki Jwøk. Dhaanh Jwøk kany wø dee mëër yïthakicge ki Jwøk, eni tïmö no opädö ki ri Jwïëc Jwøk ni dööŋe wøk tier teek raay ki thøø.
Ki mana täge ri tiel 5—8, Pøøl acäänö kiper tïïc mar ciik Jwøk ki teek mar Jwïëc Jwøk ni wø en yi bëët jø Jwøk, ni cääne thuwø ki man näk ma acaara mar Jwøk aciel kiper jiy bëët, ni jø Juuth ki juurre bëët da karge yie. Ena köö ni kweer mana ö jø Juuthi na kwierge Jecu ki gø beeye jöö aciel mana tïïc Jwøki ni wëëga jiy bëët ööny baŋ met yi Jwøk na en ri Jecu Krictø, ni ee ŋäädhö ni jø Juuth ba bëëdö cooth ni Jecu kwierge kwierø.
'Ba ni tïme na aŋuudi Pøøl agöödö thuwø kiper yi jöö man bëët ŋäädhe mar jø Jwøk ki gø, ni beeye kiper dwätö mar mëër døc man wø en yïthakic jø Jwøk. Eni pwöc moøgø atïïe kiper tïny Jwøk, ki yi jöö man bëëtge ka akwöma ki gø, ki yi jöö man bëëtge ki jø møøk ki gø. 'Ba na tïme na aŋuun wëëlö beeye määdhe mare ki pwøc mana pwøc Jwøk ki gø.
Luup moa no ogöörö yi wëël Röm beege ii:
Tier luubö mana gööt Pøølli kipere (Tielø 1:1-17)
Jiy bëët obääyö (Tielø 1:18—3:20)
Jöö man wø ö Jwøki wø piem jiy ki gø (Tiel 3:21—4:25)
Luum bëëtö mo nyään kiper jø Jwøk (Tiel 5:1—8:39)
Acaara mar Jwøk kiper jø Icriel (Tiel 9:1—11:36)
Yi jöör bëëtö mo nyään mar mëër (Tiel 12:1—15:13)
Luup moa caan na aŋuudi ki määdhe (Tiel 15:14—16:27) ø
Currently Selected:
Röm Luubö Mo Cäänö Kaper Wëël Röm: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia