Röm 1

Määdhe

1Aana Pøøl na laŋ Jecu Krictø ni göön baŋu ki wëëlö en. Ni aano cwølø naa tïma na nyïïatwiel, ni aano cïp kur keera kiper luumma nyään na met mar Jwøk, 2luumma kwøŋ buuk ki dhøk nyïïkuk moe yïth weet Jwøk na en kur keerge. 3Ni luummögø na nyään na met enø beeye luubö kiper Wääde na nywöli na dhaanhø ki ri nyïïkwaac Deebit. 4Ni beeye eni na nyooth na O Jwøk ni eni teek ki køør Jwïëc Jwøk na en kur keere kanya tïŋi maal ki yi thøø. Ni beeye Jecu Krictø na näk Kwääyø, 5ŋata jïtwa ki met ec ki køøre ki twiel man tïïcwa jiy nee jïëcge ni ŋääthge, nee nyeŋŋe tïme ni wïnyö dï juurre bëët, 6këël uuni ki dëëtu, u na cwøl nou tïmu na mo Jecu Krictø.

7Uuni bëët na mëër Jwøki ki u yi Röm, a göönna baŋu, u na no ocwølø nou tïmu na jø Jwøk.

Met ec bëëde bäätu ki bëët-mëër man wø ööi ki baŋ Jwøk na näk Wääø, ki Kwäärö ma Jecu Krictø.

Pøøl Manynya Man Liim Jø Röm

8'Ba kawaane a pwøya Jwøa ki køør Jecu Krictø kiperu bëët, kiper gïr ŋäädhe maru akøp piny bäre. 9Kiper Jwøk beeye ni ŋäc mara, ŋat wø tïnynya ki cwïnya bäre ki ri luumma nyään na met mar Wääde, naa wø cøøra nyeŋŋu cooth ki yïth laam 'moa, naa ba kääŋi. 10Naa kwaaya gø kiper naa jïta ki jöö man ööa baŋu ki gø, noo kö Jwøki. 11Kiper cwïnya manynya man neena uuni døc, kiper nou muunynya ki luubö mo käla baŋ Jwøk, nou tëënnu ki gø, 12kiper nee cwïnynyø cøømmø karøbëët ki ŋäädhe marø, ni beeye maru ki mara. 13Jaay, nyïïmera, a caya uuni man ŋäyu gø na a wø caya man ööa baŋu cooth, 'ba a poot di gëëŋŋö. 'Ba gïna daa ö baŋu kipere beeye kiper nee luum Jwøk thur kare dïïu, kaawat mana kwøŋa tïïc dï juurre møga. 14'Ba aani, mana daa tïïö jï jøøa no okwänynyö ki jï jøøa näk kär kwänynyö, ki jï jøøa wïthge leer ki jøøa wïthge ba leer, bäŋ daa maara wec. 15Ni beeye ni tïm cwïnya ni caya gø døc ki man køba luumma nyään na met jïïu thuwø, u ni en yi Röm.

Luumma Nyään Na Met Beeye Teek Jwøk

16Kiper aani, wïïa ba laay ki luumma nyään na met, kiper beeye teek Jwøk ki man piem jiy bëët mo wø jïëy ni ŋääthge, ni tägi ka jø Juuth, këël mano këët baŋ jøw mo patha jø Juuth. 17Kiper bëënynyö man wø cïp Jwøki onyoodhø ree, ni wø joot ki køør ŋäädhe keere na bäre bäre, kaawat mana gööri, ni «Eni noo bëënynyi ki køør ŋäädhe okwøw.»#Abakuk 2:4

Luum Wëëc Jwøk Kiper Rääö Mar Jiy

18Kiper wëëc Jwøk onyoodhø ni ööi ki maal dëët jø wø ba wøør Jwøk bëët ki rääö mar jiy na thiel adïëri piny ki køør rääö marge. 19Kiper gïna doo ŋääö kiper Jwøk, ege nø neen, kiper okwøŋ Jwøki nyooth jïge. 20Kiper ki kanya cwääc piny këël kawaane, mo Jwøk na näk ba neen dhaanhe ki waŋe anëënö ni beyø ri gïïa näk ee cwääö, ni beeye teek mare na näk ba cuŋ, ki bëëtö mare ni ena Jwøk. Kiper manøgø nø, røkge ba maarge piem. 21Kiper geni këël na ŋäcge Jwøk, eni kärge wøørø kaawat mana dege Jwøk wøørø, ni met ec kärge dwøk baŋ gø. 'Ba gena rwäänyö ki mana dege caarø, ni tïm cwïnyge ni bäŋ gïn jootge këët. 22'Ba na köge ni wïthge leer, gena tïmö na bøøre, 23ni wiilge ajiem Jwøa näk ba maar thøø, ni tïïge ki gïï mo kïtge caala kït dhaanhø ni bëën thøø en, ki kït weny, ki lääy, ki thwöre.

24Kiper manøgønø, gena kwier Jwøki ni wii ge yïth gïïa reyø na näk cwïnyge onieŋ køørge, ki man tïïge ki gïï mo patha karge dëëtge yïthakicge keerge. 25Kiper geni mana näk adïëri kiper Jwøk awiilge ki tööt. Ni wøørge gïna cwääc Jwøki ni tïnyge gø, ni wecge eni na näk Cwääy, eni na doo pwøø na bäre bäre. Enøgønø.

26Kiper manøgønø, gena wec Jwøki ki man bëëtge ni cwïnyge onieŋ ri gïï wø lää wïci ki ge. Ni ö määrge ni wiilge bëëtö mana dege bëëdö ki gø, ni tïïge ki gïï mo ba doo maara tïïc. 27Ni ö cwøwi thuwø ni wecge bëëtö mana dege bëëdö ki gø ki mään, ni tïm cwïnyge no onieŋ ki man døø ŋati man nø dëër watge maya. Ni tïmge ni ge tïïö ki gïï laac wïc ki cwøw møga. Ni jïtge ki gïï mo leth ki dëëtge ni beeye ajäla mana näk orømø ki gïïa baacge.

28'Ba na tïmge ni yïthge ba met ki man ŋäcge Jwøk, gena kwier Jwøki ni wëëk ge bëëtö ki cwïny mo raac ni wø caar gïï mo reyø, ki bëëtö mo patha kare. 29Ni cwïnyge bëëdö ni päŋ ki teeŋ gïïa reyø bëët, ki raay, ki päl cwïny, ki cøl cwïny. Ni cwïnyge päŋ ki gwön, ki 'näk jiy, ki wëëye, ki cwøk, ka aranya. Ni gena dïwääc nyeŋŋi, 30na dïkïth luup bäät jø møøk, na jø män ki Jwøk, na jø adhala, na jø koorrø, na jø atöör, na dïcwøny raay, na dïdhal luup mo jøøa nywøl geni, 31na dïbøøre, na jøw mo ba maar ŋääth, na jøw mo bäŋ cwïnynyi na jø aranya. 32'Ba këël na ŋäcge luumma cem Jwøki, ni jø wø tïïc teeŋ gïïögø, marge wø rømi ka thøø, ge poot bëëdö ni ge tïïya teeŋ gïïögø, ni ge jïëy ki jø wø tïïc teeŋ gïïögø thuwø.

Currently Selected:

Röm 1: AnyuB

Highlight

Copy

Compare