Maak Luubö Mo Cäänö Kaper Wëël Maak
Luubö Mo Cäänö Kaper Wëël Maak
Weeli aŋween moa täk Luumma Nyään Na Met Mar Jecu Krictø ki gø cäänö kaper bëët Jecu Krictø bäät piny. Ge cäänö kaper luum Jwøk mana købe, ki tïïe moe, ki pwöc moe; ki thøø mare bäät jaadha no odëëdö, ki duunne wøk ki yi thøø. Røk weeli aŋween moøgø, wëël Maak beeye eni na kwøŋ göör, ni beeye wëëlö mana thiinhnha eni.
Wëël Maak nyootha gø ni Jecu beeye Krictø, na näk Ö Jwøk, ni beeye eni na jääŋ Jwøki piny na ŋat tïny jiy ki man piem jiy yïth raay moge. Gïï mo rëëma ec moa tïïc Jecu moa göör Maaki thöötha geni ki moa no göörö yïth weeli møga. 'Ba luubö mana pere letha eni yi wëël Maak beeye Maak 10:45, «Kiper Wär Dhaanhø thuwø kär öö nee tïnynyi, 'ba ööi kaper nee jø møøk tïnynye, ni cïpa jwïëye na wïïdi kiper jiy mo thööth.»
Wëël Maak løny ki man pääŋŋi na thäŋi ariiø ki køør luubö mana no ogöörö yi Maak 10:45, kiper Tielø 1-10 cäänö kaper gïïa beyø na tïïc Jecu kanya bëëde ni tïnynya jiy. 'Ba tiel 11-16 cäänö kaper aŋuun nïne moe bäät piny. Ki yïth nïne moøgø, jø møøk dëët kwääri mo mø Juuth mo män ki eni gena tudö ki luubö ki man 'näkge gø. Ni jïtge ki dhaanhø aciel dëët bääge mo ojïëy ki man cïp gø ceŋge. 'Ba Jecu dëëre acïbe, ni nääi bäät jaadha no odëëdö. 'Ba køør nïne adäk, ena tïŋ Jwøki maal ki yi thøø.
Luup moa no ogöörö yi wëël Maak beege ii:
Luum tïïe moa tïïc Jecu ki pwöc mare (Tielø 1—10)
Luumma køp Jøønni na näk dïlööy na nyuudhi (Tielø 1:1-8)
Kanya lwøk Jecu na nyuudhi, ki kanya päänynyi ya anägö (Tielø 1:9-13)
Luum tïïe moa tïïc Jecu yi Galili, ni køpa luum Jwøk, ni pöö, ni kunyö ki täwe dëët jiy (Tielø 1:14—9:50)
Kanya ö Jecu na wec Galili ni aa Jerucalem (Tiel 10:1-52)
Luum gïïa tägö yïth aŋuun nïne moa beet Jecu bäät piny (Tiel 11—16)
Kanya ö Jecu na pïïe Jerucalem ni pööe (Tiel 11:1—14:9)
Luum cam mana näk aŋuudi na cam Jecu ki bääge, ni aa Gecemeni kuna läme (Tiel 14:10-42)
Kanya ö nyïïmän mo Jecu ni makge gø, ni ŋøl luum thøø bääte, ni nääi bäät jaadha no odëëdö, ni koonyi (Tiel 14:43—15:47)
Kanya tïŋ Jecu maal ki yi thøø (Tiel 16:1-20) ø
Currently Selected:
Maak Luubö Mo Cäänö Kaper Wëël Maak: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia