Mathiew 28

Kanya Tïŋ Jecu Maal Ki Yi Thøø

(Maak 16:1-10; Luk 24:1-12; Jøøn 20:1-10)

1'Ba kanya tïme na køør cäŋ jwömö, ni øw manynya kwäärö nee tïme na täk tïïc,#28:1 Täk tïïc manøgø beeye cäŋ man wø cwøl ni Cäŋ Jwøk yïth nïne moi. Meeri Magdalin ki Meeri maya aci kuna neenge bwörö.

2'Ba piny ojïtö ki dïjäŋ piny mo dwøŋ døc. Kiper nyïïatwiel maal mar Wuuö aöö ki maal ni daak kïdi dhi bwörö, ni pï piny bäät gø. 3'Ba dëëre nagaaŋ ni caala agaackøth, na abïïe moe tar døc kiree. 4'Ba jø tøŋ moa kurö gena lwäyö ki eni, ni tïm dëëtge ni kwanynyi ni tïmge kaamar jiy mo othøw.

5'Ba määrögø aluum nyïïatwiel maalli ni kööe, ni «Käru lwäyö. Kiper ŋääa nou caya Jecu na gur bäät jaadha no odëëdö. 6Eni tøør kany, kiper ena ö maal ki yi thøø kaawat mana caane. Ööu, ni neennu kanya pïëlli yie. 7'Ba cou ni caannu gø jï bääge, ni ‹Ena ö maal ki yi thøø. 'Ba eni cøøa nyïmmu yi Galili. Eno jootu kaace.› Ennø, anø caana jïïu.»

8Køøre gena put aay bäät bwörö ni geno lwäyö ni yïthge omïnnö døc. Ni reŋge kuna caange gø jï bääge. 9'Ba kanyøgø Jecu aput røømmø ki geni ni määth geni. Ni öge baŋe ni makge tiete ni wøørge gø. 10Kanyøgø gena cään Jecu, ni «Käru lwäyö. Cou ni caannu gø jï nyïïmera nee cige Galili. Aano jootge kaace.»

Cwøk Mana Caan Jø Tøŋŋi

11'Ba kanya poot määnni moøgø ni ge cäädhö, jø møøk røk jø tøŋ moa kurö gena ci pääny ni caange gïïa tägö bëët jï kwääc laam. 12'Ba kanya nø cuŋ kwääc laammi ki jaae ni tutge ki luubö, gena cïpö ki gwel mo thööth jï jø tøŋ moøgø, 13ni köge, ni «Caannu jï jiy, ni ‹Bääk Jecu aöö ki wäär ni kwalge dëër Jecu ni waano butö.› 14'Ba ni näk gïnögø wïnyö jï kwäärö, cwïnye owëëkwa pïïn piny, nou ba jïtu ki luubö mo pïï bäätu.» 15Kanyøgø jø tøŋ moøgø gwel alwørge ni caange luubö mana caan jïge. Ni ö luummögø ni keethe ni wïnye dï jø Juuth këël dïcäŋi en.

Kanya Ö Jecu Na Kööm Bääge

(Maak 16:14-18; Luk 24:36-39; Jøøn 20:19-23; Moa Tïïc Nyïïatwieli 1:6-8)

16'Ba bääk Jecu moa na apaar kurciel gena ci Galili bäät kïdi mana kwøŋ Jecu caan jïge. 17'Ba na neenge Jecu, ena wøørge. 'Ba møøk dïge gena tääö. 18Ni ö Jecu baŋge ni kööe jïge, ni «Teek mar maal bäre ki mar piny bäre anø wëëk aani. 19Kiper manøgønø, cou ni tïïyu wïth juurre mo bäät piny bëët na bääŋi 'moa, ni lwøgu geni na nyuudhi ki nyeŋ Wuuö, ki Wäädö, ki Jwïëc Jwøk na en kur keere.#28:19 Wuuö, ki Wäädö, ki Jwïëc Jwøk, poot na Jwøk aciel. 20Ni pwönynyu geni ki man gwøkge gïïa caana jïïu bëët. 'Ba aani, aano en buutu cooth këël kanyo ŋuut pinynyi yie.»

Currently Selected:

Mathiew 28: AnyuB

Highlight

Compare

Copy