Mathiew 7

Pwöc Kiper Man Ba Ŋøl Dhaanhø Wøk

(Luk 6:37-38, 41-42)

1«Kär dee ŋat mo ŋølu wøk, kiper nou ba ŋøl wøk. 2Kiper ŋøl mano ŋøllu, beeye noo ŋøl u wøk ki gø. Ni rumi man wø cïpu, beeye rumi mano duu baŋu. 3?Aŋø ni neetï ŋöömö man wø en waŋ cöögu, ni wïl wïïï ki cuudhö manø ni en waŋï enø? 4?Na aŋø na diï köö jï cöögu, ni ‹Ööï nee ŋöömmo en waŋï enø käla wøk,› ni waŋï kiree da cuudhö? 5Ï na ŋat atade, kwøŋ cuunhnho en waŋï enø käl wøk; køøre nø, ïïno nëënö ni beer nee ŋöömö manø ni en waŋ cöögu enø kälï wøk.

6«Kär gïno en kur keere na mar Jwøk mëëgu guu, kiper ge cäŋa duu baŋu ni camge uuni. Ni ba leeŋu tiigu moa perge leth nyïm othuri, kiper nyørge nyørø ki tietge.

Pwöc Kiper Jø Wø Pëëny Wuuö Jwøk

(Luk 11:9-13)

7«Pëëu, ocïp jïïu. Cääu, ojootu. Dööŋu, ojap jïïu. 8Kiper jiy bëët mo wø pëëö, wø di cïbö jïge. Ni ŋat wø määnyö, wø joode joodø. Ni ŋat wø dööŋö, wø di jabø jïre. 9?Wala aŋa dïïu, ni näk mo opëëny wääde ki møø, ni mooc gø ki kïdi? 10?Wala ni näk eni pëënynya rëëö, ni mooc gø ki thwöl? 11?'Ba ni näk u na näk jø raay muuö ŋäyu ki man cïpu ki muuce mo beyø jï nyïïu, a Wääu ni en maal, okääŋe nidïï ki man cïp gïï mo beyø jï jø wø pëëny eni? 12Kiper manøgønø, gïn wäro manynyu nee tïïc jiyi jïïu, wär wø tïïyu jïge thuwø. Kiper manøgø beeye tier pwöc mana en yïth ciik Jwøk ki luup moa køp nyïïkuk Jwøki.

Pwöc Kiper Dhi Kiir Mana Diiny

(Luk 13:24)

13«Dønyu ki dhi kiir mana diiny. Kiper dhi kiir man wø bwöth kar ränynyö päl, ni jööre laac, ni jø wø cii ki yie thööth. 14'Ba dhi kiir man wø bwöth kar kwøw diiny, ni jööre teek, ni jø wø joot gø nøk.

Pwöc Kiper Nyïïkuk Jwøk Mo Patha Adïëri

(Luk 6:43-44; 13:25-27)

15«Gwøgu rou ki nyïïkuk Jwøk mo patha adïëri mo wø ö baŋu ni ge käära duup rööm, 'ba ki yïthge gena kwäänynye mo owär. 16'Ba geno ŋäyu ki køør tïïe moge. ?Aŋø, nyïïomøki wø pønna dëët jer koodhi, wala nyïïolaam wø käla ro otwel? 17Kiper jenni bëët mo wø beyø, wø nywøla nyïëdi mo beyø. 'Ba jaath mo raac wø nywøla nyïëdi mo reyø. 18Jaath mo beer ba maar nywøl ki nyïëdi mo reyø, ni ö jaathi mo raac ni ba nywøle ki nyïëdi mo beyø. 19'Ba jenni bëët mo wø ba nywøl ki nyïëdi mo beyø, ŋøda piny ni leeŋi maac. 20Kiper manøgønø, teeŋ jøøgø, geno ŋäyu ki køør tïïe moge.

21«Patha jiy bëët mo wø köö ki aani, ni ‹Kwäärö, Kwäärö,› noo døny yi buya käl maal, 'ba beeye ŋat wø tïïc mana many Wära ni en maal. 22'Ba dïcäŋöca jiy mo thööth oköö ki aani, ni ‹?Kwäärö, Kwäärö, aŋø, luum Jwøk kärwa købø ki nyeŋŋï, ni riemwa anäge wøk ki nyeŋŋï, ni tïïcwa tïïe mo thööth mo døøŋŋø ki nyeŋŋï?› 23'Ba kanyøca ocaana jïge, no ‹U kuua cøøn na bäre bäre. Daagu rou buuta, u jø wø tïïc gïï mo reyø.›

Pwöc Kiper Dïgëëte Ariiø

(Luk 6:47-49)

24«Kiper manøgønø, jiy bëët mo wø wïny luupa ii, ni tïïcge ge, caala ŋat mo wïïe leer, mo øde ee geer bäät kïdi. 25Ni päth køthi, ni ö jwïïe, ni cööt jame ni kwöt dëër ødøgø, ni käre pädhö, kiper mana tïme no ogeer bäät kïdi. 26'Ba jiy bëët mo wø wïny luupa ii ni ba tïïcge geni, ocaal ŋat mo wïïe bäŋ acaara, mo øde ee geer ya akwöö. 27Ni päth køthi, ni ö jwïïe, ni cööt jame ni kwöt dëër ødøgø, ni pädhe ki pädhö mo ba thiinh.»

Kanya Ö Jiyi Na Jootge Gø Ni Jecu Beeye Dïpööy Mo Jïre Da Teek

28'Ba kanya ö Jecu na thöör luupögø ki caan, lwaak yïthge arëëm ki pwöc mare, 29kiper mana pwöny geni na ŋat mo jïre da teek, ni ba caal dïpööye moge mo wø pöö ki ciik Jwøk.

Currently Selected:

Mathiew 7: AnyuB

Highlight

Compare

Copy