Mathiew 4

Kanya Pääny Jecu

(Maak 1:12-13; Luk 4:1-13)

1Kanyøgø Jecu abwøth Jwïëc Jwøki paap kuna päänynyi ya anägö. 2Ni bëëde ki nïne ma pïëraŋween, ni beeye wärre ki cääŋŋe, ni ba cämö. 'Ba køøre ena 'näk käci. 3Kanyøgø dïcuuy aöö ni kööe jïgø, ni «Nee ïïna O Jwøk, kööm kïte moi nee tïmge na muunni.»

4'Ba aløk Jecu, no «Ogöörö,

«ni ‹Dhaanhø ba doo kwøw ka cam keere,

'ba eni wø kwøw ka luup bëët mo wø ööi ki dhi Jwøk.› »#Tiet Ciik 8:3

5Kanyøgø ena kïth anägö päänya en kur keere na näk mar Jwøk, ni beeye Jerucalem, ni cïp gø wï ocul Øt Jwøk Mana Dwøŋ, 6ni kööe jïgø, ni «Nee ïïna O Jwøk, leeŋ riï piny, kiper ogöörö,

«ni ‹Eni nyïïatwiet maal moe oköömme kiperï

niï koorge.

Ïïno jølge maal ki ceŋge,

kiper nee tierï ba cwaanyï ri kïdi.› »#Dut Pwøc 91:11-12

7Ni løgi ya Jecu jïgø, no «Ocäŋ göörö, ni ‹Kär Wuuö Jwøk na näk Jwøï päänynyï.› »#Tiet Ciik 6:16

8'Ba kanyøgø, ena cäŋ anägö kïth bäät kïdi mo bäär døc ni nyuth gø buc piny bëët ki beenyge. 9Ni kö anägö jï Jecu, ni «Gïï bëët owëëga ïïni ni näk mo cøŋŋï këëllï piny ni wøørï aani.»

10'Ba Jecu aköö jïre, ni «Daak riï, Ceethan, kiper ogöörö,

«ni ‹Ï doo wøøra Wuuö Jwøk na näk Jwøï,

ni beeye eni keere na diï tïnynyö.› »#Tiet Ciik 6:13

11Kanyøgønø, ena wec anägö, ni put nyïïatwiet maalli öö, ni tïnyge eni.

Kanya Ö Jecu Na Täk Tïïc Mare

(Maak 1:14-15; Luk 4:14-15)

12'Ba kanya ö Jecu na wïny gøøni ni Jøøn omaa, ena daa Galili. 13'Ba na wec Nadhareth, ena aay ni bëëde Kapernaam bäät Puul Galili yi ŋööm Dhebulan ki Naptali, 14kiper nee gïna caan nyikuŋ Jwøki ma Aydheea nee thur kare, na køp,

15ni «Ŋööm jø Dhebulan ki ŋööm jø Naptali

na en waŋjöör Puul Galili løø Naam Jördan løøga,

ni beeye Galili kany beet juurre,

16jøøa bëëdö yi muudhö,

tar mo dwøŋ aneenge,

ni kwäär øwi bäät jøøa bëëdö dhi thøø.»#Aydheea 9:1-2

17Kar kaagønø, beeye kanya täk Jecu ki køp luum Jwøk, ni cäänö, ni «Løgu cwïnynyu, kiper buya käl maal kare acäännö.»

Kanya Ö Jecu Na Cwøl Dïbïth Rec Nee Cääthge Køøre

(Maak 1:16-20; Luk 5:1-11)

18'Ba kanya ö Jecu na cäädhe bäät Puul Galili, eni nyïïmëëe ariiø ajoode, ni beeye Cayman na cwøl ni Piter ki coki ma Andaru, ni ge lëëŋö ka ajääp yi naam, kiper gena dïbïth rec. 19Ni kööe jïge, «Ööu ni caathu køøra. Uuno tïïa na dïbïth jiy.» 20Kanyøgø ajääpi moge aputge wec, ni läpge køøre. 21'Ba na pöödhe, nyïïmëëe ariiø møøk ajoode, ni beeye Jeemeth o Dhebedi ki coki ma Jøøn, ni ge ena yi jääy ki wääge ma Dhebedi, ni ge kwuö ka ajääpi moge. Ni ö Jecu ni cwøl geni. 22Ni putge jääy ki wääge wec, ni caathge køøre.

Kanya Ö Jecu Na Køp Luum Jwøk Ni Kunyö Ki Jø Täwe Yi Galili

(Luk 6:17-19)

23Ni ö Jecu ni caath dï Galili bäre, ni pöö yïth uut acook lam moge, ni køp luumma nyään na met mar buc Jwøk, ni kunyö ki teeŋ täwe bëët ki ŋwiili bëët moa en dëët jiy. 24Kanyøgønø, gïre awïnyö dï Ciria bäre, ni kälge jiy bëët moa tuu baŋe, jøøa no omaaŋ täwe ma teeŋi ki ŋwiili ma teeŋi mo rämö, ki jøøa dëëtge da anäge, ki jøøa dëëtge da cet, ki moa näk obäp. Ni køny geni. 25Ni ö jiyi mo thööth moa käl Galili ki Dikapöla ki Jerucalem ki Judia ki løø Naam Jördan ni caathge køøre.

Currently Selected:

Mathiew 4: AnyuB

Highlight

Compare

Copy