Mathiew 3
3
Kanya Ö Jøønni Na Køp Luum Jwøk
(Maak 1:1-6; Luk 3:1-18; Jøøn 1:19-28)
1'Ba ki yïth nïrögø, Jøøn na näk dïlööy na nyuudhi aöö ni køpa luum Jwøk dï paap Judia, 2ni köö, ni «Løgu cwïnynyu, kiper buya käl maal kare acäännö.» 3'Ba Jøøn beeye ŋata cään nyikuŋ Jwøki ma Aydheea kipere, na kööe,
ni «Da dwør dhaanhø mør mo cwödö ŋää paac,
ni ‹Jiiŋŋu jöör Wuuö,
ni tïïyu uutjïëthe moe ni thïïŋ.› »#Aydheea 40:3
4'Ba Jøøn käära abïï mo ocwääc ka jïëc athïrööl, ni kaw ee twöö piere, ni cam mare beeye bäänyö ki maar kïc. 5'Ba kanyøgø jø Jerucalem ki jø Judia, ki jø wø bëëdö mïëya en løø Naam Jördan bëët aö wøk baŋe. 6Ni lwøk geni na nyuudhi yi Naam Jördan, ni køpge raacge.
7'Ba kanya ö Jøønni na neen jø Paricith mo thööth ki jø Cajucith ni ge ööa baŋ lwøk na nyuudhi, ena köö jïge, ni «?U na nyïï thwöre en, aŋa na kööm uuni ni bwøgu ki wëër mano ööi? 8'Ba ennø, bëëdu ki bëëtö man wø rømi ki løk cwïny, 9ni kär nou köö ki cwïnynyu, ni ‹Eeberam beeye na kwarwa.› Kiper a caana gø jïïu, ni Jwøk jïre da teek ki man jïte ki jiy jï Eeberam røk kïte moi ii. 10'Ba këël kawaane ennø, ley onø cïp tiet jenni. Kiper manøgønø, jenni bëët mo wø ba nywøl ki nyïëdi mo beyø, ŋøda piny ni leeŋi maac.
11«Aani, dëëtu lwøa ka pïï na nyuudhi kiper løk cwïny, 'ba ŋato ööi køøra dwøŋŋa eni ki aani, ni këël wac tiete kiree a ba rømi ki man käära ge ki cera. Eni uuno lwøe na nyuudhi ki Jwïëc Jwøk na en kur keere ki maac. 12'Ba kwödi mare ena cere, ni eni laara mare ojwiie, ni cooŋ beel moe yo odek. 'Ba lethø owaaŋe ki maac mo ba maar jwöc.»
Kanya Lwøk Jecu Na Nyuudhi
(Maak 1:9-11; Luk 3:21-22)
13Kanyøgøøni Jecu aöö ki Galili ni cøøa Naam Jördan baŋ Jøøn nee lwøk na nyuudhi. 14'Ba Jøøn manynya man män gø ni kööe, ni «Beeye aani ni many ïïni naa lwøgï na nyuudhi. ?Aŋø, ï doo cäŋ ö baŋa thuwø?»
15'Ba adwøk Jecu jïre, ni «Wec manøgø kawaane. Kiper beer jïïø ki man wëëgø moa many Jwøki bëët thur karge na ennø nø.» Kanyøgønø, Jøøn ajïëy.
16'Ba Jecu kanya nø lwøi na nyuudhi, ena put ö wøk ki yïth pïï. Kanyøgø maal ree ajabe, ni neen Jwïëc Jwøk ni ööa piny kaamar akuuru ni pï bääte. 17Ni put dwølli öö ki maal ni kööe, ni «Man beeye Wääda na mëëra ki gø, na met yia ki mare.»
Currently Selected:
Mathiew 3: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia