Moa Tïïc Nyïïatwieli 8

Kanya Ö Cøølli Na Caan Jø Jwøk

1'Ba Cøøl ajïëy ki thøw Ectipen. 'Ba dïcäŋöca caarø mo päl atägö dëët jø acooŋ Jwøk moa en yi Jerucalem. Ni ö jiyi ni keethge ni cige wøk bëët yïth mïëc Judia ki Cameria, 'ba beege nyïïatwieli keerge na dööŋ. 2'Ba Ectipen akoony jøøa näk cwïnyge ege cïp køør Jwøk, ni jwøkge gø ki jwøk mo dwøŋ. 3'Ba Cøøl acooŋ Jwøk araanynye, ni duunye yïth uudi bëët ni maaŋŋa cwøw ki mään ni kïth geni øt twöc.

Kanya Køp Luumma Nyään Na Met Yi Cameria

4'Ba jøøa keethø, gena cäädhö ni ge køpa luum Jwøk. 5Ni ö Pilipi ni aa pääny Cameria, ni køp gïr Krictø jïge. 6Ni ö lwaae mo døøŋŋø ni cekge ïthge ki cwïny aciel ki luupa caan Pilipi kanya wïnyge pwöc mare ni neenge ŋïïce moa tïïe. 7Kiper juuga reyø aö wøk dëët jiy mo thööth moa näk dëëtge dagø, ni öge wøk ni ge rëëdö ki dwøl mo päl. Ni ö jøøa näk obäpi mo thööth ki ŋööte ni døø dëëtge kwörge. 8Kiper manøgønø, met ec mo päl apïï paanøce.

9'Ba kanyøce da nyen mør mo nyeŋŋe Cayman, mo okwøŋ tïïö ki tïï ajwøa paanøce, na thääŋ yïth jø Cameria bëët, ni eni wø köö ni ena ŋat mo dwøŋ døc. 10Ni cekge ïthge bëët jïre, ni beege jøøa kwörge therø ki jøøa kwörge døøŋŋø, ni köge, ni «Ŋatøgø teek mana en jïre beeye teek mar jwø wø cwøl ni Teega Dwøŋ.» 11Ni cekge ïthge ki luupe, kiper mana thääŋ yïthge ka ajwønne ki kany mo bäär. 12'Ba kanya jïëcge dwør Pilip na køp luumma nyään na met kiper buc Jwøk ki nyeŋ Jecu Krictø, gena lwøk na nyuudhi, na cwøw ki mään. 13Këël Cayman manøgø ki dëëre ajïëy ni ŋäädhe. 'Ba køøre na lwøi na nyuudhi, ena put bëëte ni cäädhi ka Pilip. 'Ba na neen ŋïïce ki gïï mo døøŋŋø mo rëëma ec moa tïïc, yie athäŋŋö.

14'Ba kanyøgø na wïnynyi ya nyïïatwieli na en yi Jerucalem ni jø Cameria ajïëy ki luum Jwøk, geni Piter ki Jøøn ajääŋge baŋge. 15Ni öge ni lämge kiperge, nee cwïnyge jïtge ki Jwïëc Jwøk na en kur keere. 16Kiper Jwïëc Jwøk poot kär ö bäätge, 'ba beeye lwøk keere na nyuudhi ki nyeŋ Kwäärö ma Jecu. 17'Ba kanyøgø ceŋge acïpge bäätge, ni ci Jwïëc Jwøki na en kur keere cwïnyge. 18'Ba na jooti ya Caymanni ni Jwïëc Jwøk acïp ki køør nyïïatwieli na cïpge ceŋge bäätge, ena kän wøk ki jammi nee mëëk geni. 19Ni kööe, ni «Mëëgu aani teegøgø thuwø, kiper nee ŋat wäro kïtha cera bääte, nee jïte ki Jwïëc Jwøk na en kur keere.»

20'Ba Piter aköö ki eni, ni «Ränynyï ki japï na aciel, kiper na caarï gø ni muuy mar Jwøk diï joodø ki gwel. 21Ïïni, bäŋ karï man thiinh en ri tïïc man, kiper cwïnyï patha kare nyïm Jwøk. 22Kiper manøgønø, løk cwïnyï ki gïnö ni raac ni en cwïnyï enø, ni kwayï Wuuö nee løny ki man wec gïnö ni raac na caarï ki cwïnyï. 23Kiper ïïna jooda ni ïïna dhaanhø ma ŋat keec ni ïïno twöö yïth raay.»

24Ni dwøgi ya Caymanni, ni «Kwac Wuuö kipera, nee bäŋe gïrpiny aciel dëët luupa caanï enø mo ö bääta.»

25'Ba na nø caange marge ni køpge luum Wuuö, gena døø yi Jerucalem, ni ge cäädhi ni ge køpa luumma nyään na met yïth mïëc Cameria mo thööth.

Luum Pilip Ki Nyï Ithiöpia

26Kanyøgø nyïïatwiel maal mør mar Wuuö aköö jï Pilip, «Ö maal, ni ciï nyïm jï løø tier-piny yi jöör wø cør yi Jerucalem ni aa Geedha, ni beeye jööra en dï paap.» 27Ni ö maal ni aae. 'Ba kanyøgø da nyï Ithiöpia mo odïnö mo tïnynya nyijøøa cwøl ni Kandace, ma nyeny jø Ithiöpia, na en jape bëët cere, mo oöö yi Jerucalem kuna wøør Jwøk. 28'Ba mare døø nø, no opï yi jääy mare man wø tut okweenynyi, ni kwäänö ki luup moa göör nyikuŋ Jwøki ma Aydheea. 29Ni kö Jwïëc Jwøki jï Pilip, ni «Ci baŋ jäänögø.»

30Kanyøgø Pilip areŋ baŋe ni joot ŋatøgø ni kwäänö ki luup nyikuŋ Jwøk ma Aydheea, ni pëëny gø, ni «?Gïïögø ni kwaanï yøø ŋäyï?»

31Ni kööe, ni «?Ŋääa gø kaa, ni näk bäŋ dhaanhø mo nyooth gø jïra?» Ni cwøl Pilip nee eth yi jääy buute. 32'Ba luupa kwaane yi wëël Jwøk beege ii,

ni «Eni dhee käre jaalø,

keda diel mo køøla baŋ ŋaal,

wala nyidiel mo lïŋö cer ŋat wø nyaar jïëye.

33'Ba kanya nø caange gø, ena jäälge ka ajäla mo patha adïëri.

?Aŋa noo par gïr nyïïkwaaye?

Kiper ena ŋul wøk ri kwøw mar bäät piny.»#Aydheea 53:7-8

34'Ba ŋata näk odïnö aköö jï Pilip, ni «Caanï jïra, ?aŋa na cään nyikuŋ Jwøki kipere? ?Cäänö kaper dëëre, wala caana gïr ŋat mør bäre?» 35'Ba kanyøgø Pilip atägö ki man cääne, ni tägi ka wëëllögø ni køp luumma nyään na met mar Jecu jïgø. 36'Ba kanya cääthge, gena pïï kany mo da pïï, ni kö ŋata näk odïnö, ni «Neenï, pïï ii. ?Agïnaŋø noo män aani ki lwøk na nyuudhi?»

[ 37Ni kö Pilipi, ni «Ni näk mo ïïno jïëy ki cwïnyï bäre, ï di lwøø.»

Ni dwøk gø, ni «Aana jïëy ni Jecu Krictø beeye o Jwøk.»]#8:37 Täk luubö man tøør ki dhi Gïrïïk yïth weet Moa Tïïc Nyïïatwieli møøk moa cääŋŋe. 38Ni jook jääne nee cuŋŋe, ni ïnhge piny ni cige yïth pïï karge riet, Pilip ki ŋata näk odïnö. Ni lwøk gø na nyuudhi. 39'Ba na duuge wøk ki yïth pïï, Pilip aput Jwïëc Wuuö käl. Ni käri ya ŋata näk odïnö joodø këët. Ni pööth jööre ni yie met. 40'Ba Pilip ajoot yi Eedhöta, ni cäädhi ni pöötha nyïm ni køpa luumma nyään na met yïth mïëri bëët gøøc mana pïïe yi Cecaria.

Currently Selected:

Moa Tïïc Nyïïatwieli 8: AnyuB

Highlight

Copy

Compare