Moa Tïïc Nyïïatwieli 9

Kanya Ö Cøølli Na Løk Ree

1'Ba Cøøl cwïnye poot raac ni manynya man 'näk bääk Wuuö, ni ci baŋ Kwääy Lam Mana Dwøŋ, 2ni pëëny gø ki weeli kiper uut acook lam moa en Damacka, kiper noo näk mo eni jïtö ki jiy mo ena ri Jöör Lam mar Jecu, nee cwøw wala mään, nee ge käl yi Jerucalem ni geno twöö. 3'Ba yi wääth mare na tïm kare ni cään ki Damacka, tar aput öö ki maal ni rienye bääte. 4Ni put pädhö ni wïny dwøl ni cäänö ki eni, ni köö, ni «?Cøøl, Cøøl, aŋø ni gëëmï ki aani en?»

5Ni kööe, ni «?Ïïna ŋa, Kwäärö?»

Ni duu gø, ni «Aana Jecu ni gëëmï ki gøøni enø. 6'Ba ö maal ni ciï pääny; gïno tïïyï ocaan jïrï.»

7'Ba jøøa cäädhö ki eni gena mak apïte, kiper dwøl wïnyö jïge, 'ba bäŋ dhaanhø mo jootge. 8Ni ö Cøølli maal. 'Ba na jap nyeŋŋe ena tïmö ni ba nëënö. Kiper manøgønø, ena piecge ki cere ni kïthge gø yi Damacka. 9Ni bëëde ki nïne adäk ni ba nëënö, ni ba cämö, ni ba mädhö.

10'Ba da bääŋ aciel yi Damacka mo nyeŋŋe Ananaya. Wuuö acäänö ki eni yïth lääk, ni kööe, «Ananaya.»

Ni dwøk gø, ni «Aani en, Kwäärö.»

11Ni kö Wuue jïre, ni «Ö maal ni ciï yi øtjöör wø cwøl ni Tiir, ni pëënynyï nyen mør yi øt Juudac no nyeŋŋe Cøøl ma nyï Tarca. Kiper eni lämö. 12'Ba yi lam mare, da ŋat mør mo nyeŋŋe Ananaya mo ee joodø ni ööa baŋe ni peeth ceŋŋe bääte kiper nyeŋŋe nee døøge karge.»

13'Ba adwøk Ananaya, ni kööe, ni «Kwäärö, gïï nyenøgø awïnynya dhøk jiy mo thööth, ni gïï mo thööth mo reyø døc ee tïïö dëët jiyï yi Jerucalem. 14Ni eni jïre da teek kany, mo owëëk kwääc laammi eni, man twöc jiy mo wø cøør nyeŋŋï.»

15'Ba Wuuö aköö jïre, ni «Ciï, kiper eni yaa jierø na gïr tïïc mara, nee nyeŋŋa kääre dï juurre ki nyeye ki dï wäät Icriel. 16'Ba eno nyutha gïï mo thööth mo jwøre jwørø kiper nyeŋŋa.»

17Kanyøgø Ananaya acøø ni døny yi øtø. Ni peeth ceŋŋe bäät Cøøl, ni kööe, ni «Cøøl, coka, Kwäärö ma Jecu na nyuth dëëre ïïni øtjööra ööï ki gø, aana jääŋŋe nee nyeŋŋï cäŋge døø karge, ni päŋ cwïnyï ki Jwïëc Jwøk na en kur keere.» 18Kanyøgø gïï mo caala kwönne aput päth piny ki nyeŋŋe, ni døø nyeŋŋe karge. Ni ö maal ni lwøi na nyuudhi. 19Ni cäme ni tëën dëëre.

Kanya En Cøølli Yi Damacka

Kanyøgø Cøøl abëëdö ki bääŋi yi Damacka ki nïne mo boop. 20Ni put gïr nyeŋ Jecu køp yïth uut acook lam, ni caana gø, ni Jecu beeye O Jwøk. 21'Ba jøøa wïny luumme bëët, yïthge athäŋŋö, ni köge, na «?Aŋø, nyeni en, paa nyena wara raany jiy yi Jerucalem mo wø cøør nyeŋŋøgø? Ni beeye na ö kany nee jøøa jïëy ki Jecu kïth baŋ kwääc laam no otwöö.» 22'Ba teek Cøøl ree ameede, ni tïm wïth jø Juuthi moa bëëdö yi Damacka ni wïïrö, kiper man wø nyuth gø geni ni Jecu beeye Krictø.

Kanya Päär Cøølli Wøk Ceŋ Jø Juuth

23'Ba na tïme na køør nïne mo thööth, jø Juuth atïmö ni ge caya man 'näkge Cøøl. 24'Ba luum 'näk marge atïmö ni ŋäc Cøølli. 'Ba gena tïmö ni ge køya dhøk kiir ki cääŋŋe ki wärre nee eni 'näkge. 25'Ba ena käl bääge ni kïthge gø yi dhwöŋŋö, ni gapge gø wøk ŋää kiir.

Kanya En Cøølli Yi Jerucalem

26'Ba Cøøl na nø ö yi Jerucalem, ena tïmö ni manynya man dwäte ki bääŋi. 'Ba bääŋi alwäyö bëët ki eni, kiper patha ege jïëö ni ena bääŋ. 27'Ba ena käl Barnaba ni kïth gø baŋ nyïïatwieli. Kanyøgø gïr luum Cøøl kanya neen Kwäärö waŋjöö ni cääne ki eni acaane jïge døøc. Ni caan kanya bëët Cøølli yi Damacka na køp gïr nyeŋ Jecu ni cwïnye da cer. 28Kanyøgø Cøøl atïmö ni cäädhö dïge yi Jerucalem, ni køp luum Jwøk ki nyeŋ Kwäärö ni cwïnye da cer. 29Ni cääne ni pïëme ki jø Juuth moa näk odhoom na jø Gïrïïk. 'Ba gena tïmö ni ge caya man 'näkge gø. 30'Ba na ö gïnögø na jooti ya nyïïmëëe, ena kïthge Cecaria ni jääŋge gø Tarca.

31Kanyøgø acook Jwøk mo Judia bäre, ki Galili ki Cameria, gena bëëdö ki bëët-mëër ni tëënge. Ni ge bëëdö ni ge wøøra Wuuö, ni meetge rege ki køør cøm cwïny mar Jwïëc Jwøk na en kur keere.

Kanya Ö Piterri Na Køny Aneea

32'Ba kanya bëët Piterri ni cäädhö dï mïëri, ena ci baŋ jø Jwøk moa näk bëëdö Lida thuwø. 33Ni joot nyen mo nyeŋŋe Aneea, mo obëëdö bäät pëëm ki cwiiri abära no obäp. 34Ni kö Piterri jïgø, na «Aneea, ïïna køny Jecu Krictø; ö maal ni jegï pëëmï.» Ni put ö maal. 35Ni ö jø Lida bëët ki jø Caran ni jootge Aneea, ni løøge rege baŋ Wuuö.

Kanya Tïŋ Dørka Maal

36'Ba da bääŋ aciel mo bëëdö Jøpa, mo nyeŋŋe Tabitha, na näk tiere beeye Dørka. Ena nyijø mo wø tïïya gïï mo beyø na ŋat køny. 37'Ba yïth nïrögø ena mak täwi ni thøøe. 'Ba na nø lwøkge dëër gø, apïëlge yi øt pööki mana en maal. 38'Ba kiper mana tïme ni Lida kare cään ki Jøpa, na wïnynyi ya bääŋi ni Piter ena yie, gena jääk baŋe ki jiy ariiø nee kwacge ki man ö baŋge ni ba ruu. 39Kanyøgø Piter aö maal ni cøøe ki ge. 'Ba na pïïe, ena kälge ni kïthge gø yi øt pööki mana en maal. Ni ö määr thuunhnhi bëët ni cuŋge buute ni ge jwöŋö, ni ge nyøtha koothe ka abïïe moa tïïc Dørka kanya poode dïge. 40'Ba gena wëëk Piterri ciin wøk bëët. Ni ö Piterri ni këël cøŋŋe piny ni läme. Køøre ree aløø baŋ dëër nyijøøgø, ni kööe, ni «Tabitha, ö maal.» Ni ö nyijøøgø ni jap nyeŋŋe. 'Ba na joot Piter, ena ö maal ni bëëde. 41Ni ö Piterri ni rwaak cere baŋ gø ni tïŋ gø maal. Køøre jø Jwøk acwøle ki määr thuunhnhi, ni käl gø nyïmge no okwøw. 42Ni put gïnögø tïmö ni ŋäc jø Jøpa bëët. Ni ö jiyi mo thööth ni jïëcge Wuuö ni ŋääthge gø. 43Ni ö Piterri ni bëëde yi Jøpa ki nïne mo thööth buut Cayman, ŋat ma dïnyuŋ pëëne.

Currently Selected:

Moa Tïïc Nyïïatwieli 9: AnyuB

Highlight

Copy

Compare