1 കൊരിന്ത്യക്കാറാര് 10
10
സെലേന കുമ്മുഡ്‌റാദ്‌ണ പറ്റി
1ഏസുക്കാറാരെ, മോസെ സൊല്ലുപഡി ണഡാന്ത ണമ്മ് പാട്ടലാക്ക് എന്ത ണഡാന്ത്‌ദ് എന്ത് ണെനേക്കുഡൊ എന്ത് ണാന് ആസെപഡ്‌റെ. സാമി അവാര്‌ണ മഞ്ച്‌ദ് കുളുസിലി അദിസ്യത്തോഡെ ണഡാത്തി ബന്താ്. അവാര്‌ണ അദിസ്യത്തോഡെ സെങ്കഡാല്‌മ് കഡാത്തിനാ്. 2അച്ചെ അവാര് മഞ്ച്‌ദ് കുളുസ് മേലേമ് സമ്‌ത്ത്‌റ മേലേമ് ണഡാന്ത് മോസോഡെ എ്ണേന്ത് അയാള് സൊല്ലുപഡി ഇര്‌ന്താര്. 3സാമി കൊഡുത്ത ഒരേ തീനിന അവാര് തിന്താര്, 4അറേലിര്‌ന്ത് സാമി അദിസ്യത്തോഡെ ബര്‌സിന ഒരേ തണ്ണിന അവാര് കുഡിത്താര്. അവാര്‌ദ് ഒപ്പ ബന്ത ക്‌റ്‌സ്‌ത്ത്‌ണ കാട്ട്‌റാദ്‌ത്തെ അയ്യി അറെ. 5ആനാല്‌മ് അവാര്‌ദിലി മുക്കബാസി ആള്‌ഗാമ് സാമിക്ക് പ്‌ഡിത്ത ദിന്‌സിലി പെ്ളേക്കാലെ. അദ്‌ണാലെ സാമി, അവാര്‌ദ് സാവുഗണ ബെ്ട്ടെകാഡിലി താനെ ഇലാസി എക്കിനാ്.
6ഈ കാര്യ ണഡാന്താദ് ണമ്മ കണ്ട് പഡിക്ക്യ ബേ്ണ്ടിത്തെ. എന്ത്‌ക്കെന്റ അവാര് കെ്ട്ട ആസെപഡി ണഡാന്ത പാസെ ണമ്മാമ് കെ്ട്ട ആസെപഡി ണഡാക്കാദെ ഇര്‌ക്ക്യാത്തെ. 7സാമി സൊല്ലുസുലാക്കാത്തിലി: <<ജനഗ തിന്ന്യാമ് കുഡിക്ക്യാമ് കുക്കാന്താര്. പ്‌റ അവാര് ആട്ടാഡി പമ്പാലിക്ക്യ എ്ന്താര്>>#പയണ 32:6 എന്ത് എ്ള്‌ദിര്‌ക്ക പാസെ ണിമ്മാമ് അച്ച്‌ള ദിന്‌സ് ആള്‌ഗണ പാസെ സെലേന കുമ്മുഡ്‌റവാര് ആഗാദി. 8അവാര്‌ദിലി ലേസ ആള്‌ഗ സിക്കാട്ട്‌ക്കിക്കി ണഡാന്ത പാസെ ണിമ്മാമ് സിക്കാട്ട്‌ക്കിക്കി ണഡാക്കാദി. ഇച്ചെ സെയ്‌ദാദ്‌ണാലെ അവാര്‌ദിലി ഇരുവത്തിമൂണായിര ആള്‌ഗ ഒരേ ബെപ്പിലി സത്ത് കൊട്ടിനാരല്ല. 9ആണ്ടവാ് ദണ്ടിക്കമാട്ടാ് എന്ത് മറ്‌ദെ മറ്‌ദെ പാവ സെയ്‌ദ് കൊണ്ട് ആണ്ടവാന സോദിത്താര്. അദ്‌ണാലെ അവാര് പാമ്പ് കൊത്തി സത്താര്. അദേപാസെ ണിമ്മാമ് ആണ്ടവാന സോദിക്ക്യ പാങ്കില്ലെ. 10അവാര്‌ദിലി ലേസ ആള്‌ഗ സാമിക്ക് ണേരെ ങ്കൊറുങ്കൊറുത്താദ്‌ണാലെ അളിത്തെക്ക്‌റ ദൂദാന ബ്‌ട്ട് അവാര്‌ണ അളിത്തെക്കിനാ്. അദേപാസെ ണിമ്മാമ് ങ്കൊറുങ്കൊറുക്കാദി.
11അവാര് പെ്ളേപ്പിലി ണഡാന്ത ഈ കാര്യഗണ ണമാക്ക് കണ്ട് പഡിക്ക്യ മുഡ്യു. ഉലഗ അളിവു ണെരിങ്കിര്‌ക്ക കാലാത്തിലി പെ്ളേക്ക ണമ്മാമ് ബുദ്ദി പഡിക്ക്യാത്തെ ഇദ്‌ണ എ്ള്‌ദി ബെത്തിര്‌ക്കാദ്. 12അദ്‌ണാലെ ണമ്പിക്കേലി ണല്ല ഒറേത്തവാ് ആയിര്‌ക്കെ എന്ത് ണെനേക്കവാ് അദേ പാവഗാക്ക് സിക്കാദെ ഇര്‌ക്ക്യ ണോഡി കൊള്ളുഡൊ. 13പൊദുവിലി മന്‌സാര്‌ഗാക്ക് ബര സോദണെഗാത്തെ ണിമാക്ക് ബന്താദ്. ണിമാക്ക് താങ്ക്യ മുഡ്യാത്തത്താറ സോദണെ ബര്യ സാമി ബ്‌ഡ മാട്ടാ്. എന്ത്‌ക്കെന്റ സാമി ണമ്പ്യ മുഡിരവാ്ത്തെ. ണിമാക്ക് സോദണെ ബര്‌ഗാട്ടി അദ്‌ണ താങ്കി തപ്പിസി കഡാക്ക്യ ബെക്കുവാ്.
ആണ്ടവാന്‌ദ് മേസെ
14അദ്‌ണാലെ എനാക്ക് മെച്ച്‌പ്‌ഡിത്തവാരെ, സെലെഗണ കുമ്മുഡ്‌റാദ്‌ഗണെല്ല ബ്‌ട്ട് തള്ളി ഒച്ചാരി ഓഡിരി. 15ണിമ്മ അറുവുമ് ബുദ്ദിമുള്ളവാര്‌മ് എന്ത് ണെനേത്ത് ണാന് ണിമാക്ക് സൊല്ലുറെ, ണാന് സൊല്ലുറാദ് എന്തായെന്റ് ണിമ്മ ഓസണെ എ്ഡ്‌ത്ത് ണോഡിരി. 16ണമ്മ സാമിക്ക് ണണ്ണി സൊല്ലി ആണ്ടവാന്‌ദ് സെമ്പിലിര്‌ന്ത് കുഡിക്കാട്ടി ക്‌റ്‌സ്‌ത്ത് തന്ന്‌ദ് സോരാണാലെ സെയ്‌ദ് തന്ത കാര്യാക്ക് ണമ്മ പങ്ക്‌ക്കാറാര് ആരാമല്ല? ണമ്മ ആണ്ടവാന്‌ദ് മാറ്റഡേന മുറുക്കാട്ടി ണമാക്ക് ക്‌റ്‌സ്‌ത്ത് തന്ന്‌ദ് സരിഗലത്താലെ സെയ്‌ദ് തന്ത കാര്യാക്ക് ണമ്മ പങ്ക്‌ക്കാറാര് ആരാമല്ല? 17ണമ്മ മുറുത്ത് തിങ്ക ആണ്ടവാന്‌ദ് മാറ്റഡെ ഒന്റുത്തെ. ണമ്മ എല്ലാര്‌മ് അയ്യി ഒരേ അഡേന പങ്കി തിങ്കാദ്‌ണാലെ പല ആള്‌ഗ ആയിര്‌ക്ക ണമ്മ ഒരേ സരിഗല ആരാമ്.
18ഇസ്‌റേല്‌ക്കാറാര്‌ദ് സട്ട്‌മെ്ട്ട്‌ണ ണെനേത്ത് ണോഡിരി, പലി കൊഡുക്കവാര്‌മ് പലി കൊഡുക്ക മദ്‌ളിലി ബേലെ സെയ്‌രവാര്‌മ് പലി കൊഡുക്ക തീനിന തിന്ത് അദ്‌ക്ക് പങ്ക്‌ക്കാറാര് ആരാരല്ല? 19ണാന് സൊല്ലുറാദ് എന്ത? സെലേക്ക് മേല്‌സ ബെത്ത ജാദിനാഗൊ സെലെനാഗൊ മുക്ക്യമാനാദ് എങ്കേന? 20ഇല്ലേഗെ ഇല്ലെ, എഗുദാര് അല്ലാത്ത ജാദിഗ പലി കൊഡുക്കാദ് സാമിക്കല്ല, സാമി അല്ലാത്ത ബൂദഗാക്ക്‌ത്തെ. ആന ണിമ്മ സാമിയല്ലാത്ത ബൂദഗാക്ക് എ്ണേരവാര് ആയ എനാക്ക് മനേസ്സില്ലെ. 21ണിമ്മ ഒരേ ഗള്യേലി ആണ്ടവാ് കുഡിക്ക സെമ്പിലിര്‌ന്ത്‌മ് ബൂദഗ കുഡിക്ക സെമ്പിലിര്‌ന്ത്‌മ് കുഡിക്ക്യ പാങ്കില്ലെ. ണിമ്മ ആണ്ടവാന്‌ദ് ബിര്‌ന്ത്‌ക്ക്‌മ് ബൂദഗാദ് ബിര്‌ന്ത്‌ക്ക്‌മ് പങ്ക്‌ക്കാറാര് ആയ പാങ്കില്ലെ. 22ണമ്മ ആണ്ടവാന മൊനെ ബര്‌സ്‌റാമ? അവാന ബ്‌ഡ ബെല്ല്യവാരെന്ത് ണമ്മ ണെനേക്കാമ?
എല്ലാദ്‌മ് സാമി മദ്‌പ്പ്‌ക്ക് ബേ്ണ്ടി സെയ്‌രി
23<<എനാക്ക് എന്ത സെയ്യാമ് തഡെ ഇല്ലെ>> എന്ത് ണിമ്മ സൊല്ലുറേര്. ആന <<എല്ലാദ്‌മ് ണമാക്ക് ണല്ലാദല്ല>> എന്ത് ണാന് സൊല്ലുവെ. <<എനാക്ക് എന്ത സെയ്യാമ് തഡെ ഇല്ലെ>> എന്ത് ണിമ്മ സൊല്ലുറേര്. ആന ണിമാക്ക് അദെല്ല ഉവഗാരപഡമാട്ട. 24ഒരൊരു ആള്‌ഗാമ് അവാനവാന്‌ക്ക് ണല്ലാദ് കെ്ഡേക്ക കാര്യണ മാട്ട് ണോഡാദെ അഡ്‌ത്തവാര്‌ക്ക് ഗൂഡി ണല്ലാദ് കെ്ഡേക്ക കാര്യഗ സെയ്യ ണോഡുഡൊ.
25സന്തെ കഡേക്ക്‌റാഗ പോനാക്കി അദിലി ബാങ്ക്യ കെ്ഡേക്ക ഏദ് തീനിനാമ് ണിമാക്ക് തിന്നില. അദ് മേല്‌സ ബെത്താദൊ അല്ലാത്താദൊ എന്ത് സന്തേഗപഡ ബേ്ഡ. 26എന്ത്‌ക്കെന്റ <<ബൂമിമ് ബൂമിലിര്‌ക്കാദ് ഒട്ടുക്ക്‌മ് ആണ്ടവാന്‌ദ്‌ത്തെ>>#സാമി പാട്ട് ബുക്ക് 24:1 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല.
27ഏസുക്കാറാനല്ലാത്ത ഒരുത്താ് ണിമാണ ബിര്‌ന്ത്‌ക്ക് ഒളേത്താക്കി ണിമ്മ പോന ണിമാക്ക് ബീറ്റി തര ഏദ് തീനി ആനാല്‌മ് ണിമ്മ തിന്നിരി. അദ് മേല്‌സ ബെത്താദൊ അല്ലാഗൊ എന്ത് മനേസ്സിലി സന്തേഗപഡാദി. 28എന്താല്‌മ് ഒരുത്താ് ബന്ത്: <<ഇദ് സെലേക്ക് മേല്‌സ ബെത്താദ്>> എന്ത് ണിമാക്ക് സൊന്നാക്കി അദ്‌ണ ണിമ്മ തിന്ന ബേ്ഡ. എന്ത്‌ക്കെന്റ അദ് തിങ്കാദ് തപ്പ് എന്ത് അവാ് മനേസ്സിലി ണെനേക്കാദ്‌ണാലെ അവാന ണെനേത്ത് അദ്‌ണ ണിമ്മ തിന്ന ബേ്ഡ. 29അദ് തപ്പെന്ത് സന്തേഗപട്ടാദ് ണിന്ന്‌ദ് മനേസ്സല്ല അവാന്‌ദ് മനേസ്സ്‌ത്തെ. എനാക്ക് ഇര്‌ക്ക ഉരിമെന അഡ്‌ത്തവാര് അദ് സെര്യൊ തെറ്റൊ എന്ത് സൊല്ലുറാദ് എന്ത്‌ക്ക്? 30ണാന് സാമിക്ക് ണണ്ണി സൊല്ലിത്തെ തീനി തിങ്കെ. അയ്യി തീനിദ് പേരിലി എനാണ കെ്ട്ടവാ് എന്ത് സൊല്ല്യ ബെക്കാദ് എന്ത്‌ക്ക്?
31അദ്‌ണാലെ ണിമ്മ തിന്താല്‌മ് സെരി തണ്ണി കുഡിത്താല്‌മ് സെരി അദ് എല്ലാമെ സാമിദ് പേര്‌പെര്‌മേക്ക് ബേ്ണ്ടി സെയ്യിരി. 32എഗുദാര്‌ക്കൊ ഗ്‌റീക്ക്‌ക്കാറാര്‌ക്കൊ സാമിക്കാറാര് കൂട്ടാക്കൊ ണിമ്മ തൊന്തറെ ബര്‌സാത്ത പഡി പെ്ളേക്കവാര് ആയിരിരി. 33എനാക്ക് ണല്ലാദ് കെ്ഡേക്ക കാര്യണ പറ്റി ണാന് ണെനേക്കാദില്ലെ. അഡ്‌ത്തവാര്‌ക്ക് ണല്ലാദ് കെ്ഡേക്ക കാര്യഗണാത്തെ ണോഡുറെ. അച്ചെ സാമി അവാര്‌ണ ദെങ്ക്‌സ്യ ബേ്ണ്ടി എല്ല ദിന്‌സിലിമ് ണാന് പിര്യപഡ്‌സ്‌റെനല്ല.
Currently Selected:
1 കൊരിന്ത്യക്കാറാര് 10: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
