1 കൊരിന്ത്യക്കാറാര് 11
11
1ണാന് ക്‌റ്‌സ്‌ത്ത്‌ണ കണ്ട് പെ്ളേക്ക പാസെ ണിമ്മാമ് എനാണ കണ്ട് പെ്ളേരി.
സാമി കുമ്മുഡുഗാട്ടി സെയ്യുള്ള കാര്യഗ
2ണിമ്മ എനാണ ഒപ്പ ണെനേത്ത് കൊണ്ട്‌മ് ണാന് ണിമാക്ക് പഡിസി തന്ത സട്ട്‌മെ്ട്ട്‌ക്ക് കെ്ട്ട്‌പട്ട് കൊണ്ട്‌മ് ണഡാക്കേര്. അദ്‌ണാലെ ണാന് ണിമാണ പെര്‌മെപഡ്‌റെ.
3ആന ഏദ് ആമ്പ്‌ളെഗാക്ക്‌മ് തലെവാ് ക്‌റ്‌സ്‌ത്ത്‌ത്തെ. ഏദ് പൊമ്പുളേക്ക്‌മ് തലെവാ് ആമ്പ്‌ളേത്തെ. ക്‌റ്‌സ്‌ത്ത്‌ക്ക് മേല് സാമിത്തെ തലെവാ് എന്ത്‌മ് ണിമ്മ തെരിന്തിര്‌ക്കുഡൊ എന്ത് ണാന് ആസെപഡ്‌റെ. 4കുക്കുഡ്യെ സൂഡികൊണ്ട് പരേസ്‌റാദൊ ഇല്ലെ സാമിക്ക് സൊല്ല്യ ഇര്‌ക്ക കാര്യഗണ സൊല്ലുറാദൊ സെയ്‌ര ആമ്പ്‌ളെ തന്ന് തലേന താനെ മദ്‌സ്‌റാദില്ലെ. 5ആന പൊമ്പുളേഗ കുക്കുഡ്യെ സൂഡാദെ പരേസ്‌റാദൊ സാമിക്ക് സൊല്ല്യ ഇര്‌ക്ക കാര്യഗണ സൊല്ലുറാദൊ സെയ്‌രദാനാക്കി അവ തന്ന് തലേന മദ്‌സ്‌റാദില്ലെ. അദ് ഒരുത്തി തന്ന് തലേന മൊട്ടി കെരേത്ത് ണാണഗെ്ട്ട പാസെത്തെ. 6അവ തലേക്ക് കുക്കുഡ്യെ സൂഡാദെ പോന തലെമൂര്‌ണ കത്താര്‌സി തള്ളുഡൊ. തലെമൂര്‌ണ കത്താര്‌സ്യാഗൊ തലേന മൊട്ടി കെരേക്ക്യാഗൊ ണാണ ആനാക്കി അവ തലേക്ക് കുക്കുഡ്യെ സൂഡുഡൊ. 7ആമ്പ്‌ളെഗ തലേക്ക് കുക്കുഡ്യെ സൂഡ ബേ്ഡ. എന്ത്‌ക്കെന്റ ആമ്പ്‌ളെഗ സാമി ഉരുവണ പാസെ ഇര്‌ക്കവാര്‌മ് സാമിക്ക് ഇര്‌ക്ക മദ്‌പ്പ്‌ണ കാട്ട്‌റവാര്‌മ്‌ത്തെ. ആന പൊമ്പുളേഗ ആമ്പ്‌ളെഗ മദ്‌പ്പ് കാട്ട്‌റാര്. 8പൊമ്പുളേലിര്‌ന്തല്ല മുദ ആമ്പ്‌ളെന ദ്‌ട്ടിസിനാദ്, ആമ്പ്‌ളേലിര്‌ന്ത്‌ത്തെ പൊമ്പുളേന ദ്‌ട്ടിസിനാദ്. 9പൊമ്പുളേക്ക് ബേ്ണ്ടി അല്ല ആമ്പ്‌ളെന ദ്‌ട്ടിസിനാദ്. ആമ്പ്‌ളേക്ക് ബേ്ണ്ടിത്തെ പൊമ്പുളേന ദ്‌ട്ടിസിനാദ്. 10അദ്‌ണാലെ ദൂദാര്‌ഗ ണോഡികൊണ്ട് ഇര്‌ക്കാദ്‌ണാലെ പൊമ്പുളെ ആളാ്ന്‌ക്ക് കെ്ട്ട്‌പട്ട് ഇര്‌ക്കവ എന്ത് കാട്ട്യ പൊമ്പുളെ തലേക്ക് കുക്കുഡ്യെ സൂഡുഡൊ.
11ആന ആണ്‌മ് പെ്ണ്ണ്‌മ് ആണ്ടവാനിലിര്‌ന്ത് ഉണ്ടായിര്‌ക്കാദ്‌ണാലെ ആണ് ഇല്ലാദെ പെ്ണ്ണ്‌മില്ലെ പെ്ണ്ണ് ഇല്ലാദെ ആണ്‌മില്ലെ. 12പൊമ്പുളേന ആമ്പ്‌ളേലിര്‌ന്ത് ദ്‌ട്ടിസിന പാസെ ആമ്പ്‌ളെ പൊമ്പുളേലിര്‌ന്ത് ഉണ്ടാരാ്. ആന സാമിത്തെ അവാര്‌ണെല്ല ഉണ്ടാക്കിനാദ്. 13ണിമ്മാഗെ ണെനേത്ത് ണോഡിര്യെ, ഒരു പൊമ്പുളെ കുക്കുഡ്യെ സൂഡാദെ സാമിന പരേസ്‌റാദ് ണല്ലാദല്ല? 14ആമ്പ്‌ളെ തലേന ണീ്ട്ടി ബളാത്തിന അദ് അവാന്‌ക്ക് ണാണകേ്ഡ് എന്ത്‌മ്, 15പൊമ്പുളെ തലെ ബളാത്തിന അദ് കുക്കുഡ്യെ സൂഡുറാദ്‌ക്ക് ബദ്‌ള് ബെത്തിര്‌ക്കാദ്‌ണാലെ അവാക്ക് മാന എന്ത്‌മ് കാട്ട്‌ദല്ല? 16ഈ കാര്യണ പറ്റി ആരാറ്റ് തറ്‌ക്ക്യ ണെനേത്താക്കി എമാക്ക്‌മ് ഏസുക്കാറാര് കൂട്ടഗാക്ക്‌മ് ഇര്‌ക്ക സട്ട്‌മെ്ട്ട് ഇദ്‌ത്തെ എന്ത് അവാ് ണെനേക്കുഡൊ.
ആണ്ടവാന്‌ദ് ജാമ തീനി
17ഇനി ണാന് സൊല്ല്യ പോര കാര്യാത്തിലി ണാന് ണിമാണ പെര്‌മെപഡമാട്ടെ. എന്ത്‌ക്കെന്റ ണിമ്മ ഒന്റായി കൂഡുഗാട്ടി ണല്ലാദ് ബരാദ്‌ക്കുള്ള കാര്യ അല്ല കെ്ട്ടാദ് ബരാദ്‌ക്കുള്ള കാര്യാത്തെ ണഡാക്ക്‌ദ്. 18ണിമാണ പറ്റി ണാന് സൊല്ലുറ ഒണ്ണാവദ് കാര്യ എന്തായെന്റ് സൊന്ന ണിമ്മ ഒന്റായി കൂഡുഗാട്ടി ണിമ്മ് പട്ടിലി ഒത്തിമെ ഇല്ലെ എന്ത് ണാന് കേ്ട്ടിര്‌ക്കെ, അദിലി ലേസ കാര്യഗെല്ല സെരിത്തെ എന്ത് ണാന് ണമ്പ്‌റെ. 19ണിമ്മ് കൂട്ടാത്തിലി തഗ്‌ദ്യാന ആള്‌ഗ ആരെന്ത് തെര്യ പച്ച്യ പ്‌ഡിക്കാദ് ബേ്ഡുമാന കാര്യാത്തെ. 20ണിമ്മ കൂട്ട കൂഡി ബര്‌ഗാട്ടി ആണ്ടവാന്‌ദ് ബിര്‌ന്തല്ല ണിമ്മ തിങ്കാദ്. 21എന്ത്‌ക്കെന്റ ണിമ്മ ഒരൊരു ആള്‌ഗ മീദെ മീദെ എ്ഡ്‌ത്ത് തിങ്കേര്. അച്ചെ ലേസ ആള്‌ഗ പജ്യോഡേമ് ഇര്‌ക്കാര്, ലേസ ആള്‌ഗ കുഡിത്ത് ബോദേ്റി ഇര്‌ക്കാര്. 22തിന്ന്യാമ് കുഡിക്ക്യാമ് ണിമാക്ക് കൂരെ ഇല്ലേഗ? ഇല്ലെ, സാമിക്കാറാര് കൂട്ടാക്ക് ബെലെ ഇല്ലെന്ത് ണെനേത്ത് ഏ്ളെഗണ ണാണഗെ്ഡ്‌സ്‌റേര? ഈ കാര്യാത്തിലി ണാന് ണിമാണ പറ്റി എന്ത സൊല്ല്യ? ണിമാണ പറ്റി പെര്‌മെപഡ്‌റെ എന്ത് സൊല്ല്യാഗ? ഇല്ലെ, ഈ കാര്യാത്തിലി ണാന് ണിമാണ പറ്റി പെര്‌മെപഡാഗെമാട്ടെ.
ആണ്ടവാ് ബിര്‌ന്ത്‌ദ് സട്ട്‌മെ്ട്ട്‌ഗ
23ണാന് ആണ്ടവാനോഡെ ഇര്‌ന്ത് കെ്ഡേസി ണാന് ണിമാക്ക് പഡിസിനാദ് എന്തായെന്റ: ആണ്ടവാ് ആയിര്‌ക്ക ഏസുണ കാട്ടി കൊഡുക്ക ജാമാത്തിലി അവാ് അഡേന എ്ഡ്‌ത്ത് 24സാമിക്ക് ണണ്ണി സൊല്ലി മുറുത്ത്, <<ഇദ് ണിമാക്ക് ബേ്ണ്ടി പലി കൊഡുക്ക്യ പോര എന്ന് സരിഗല. എനാണ ണെനേക്ക്യ ബേ്ണ്ടി ണിമ്മ ഇദേപാസെ സെയ്‌രി>> എന്ത് സൊന്നാ്. 25അദേപാസെ തീനി തിന്ത് തീന്ത പ്‌റ ഏസു ഊറിന മുന്തിരി സാര ഇര്‌ക്ക സെമ്പ്‌ണ എ്ഡ്‌ത്ത്, <<ഈ സെമ്പിലിര്‌ക്ക മുന്തിരി സാര സാമി മന്‌സാരോഡെ ബെക്ക പുദ്യ ഒപ്പ്‌കെ്ട്ട്‌ക്കുള്ള എന്ന് സോരെന കാട്ട്‌ദ്. ണിമ്മ ഇദ്‌ണ കുഡിക്കാട്ട്യെല്ല എനാണ ണെനേക്ക്യ ബേ്ണ്ടി ഇദ്‌ണ കുഡിരി>> എന്ത് സൊന്നാ്. 26അച്ചെ ണിമ്മ ഈ അഡേന തിങ്കാട്ടിമ് മുന്തിരി സാരണ കുഡിക്കാട്ടിമ് ആണ്ടവാ് ബരമാട്ട് അവാ് സത്താദ്‌ണ പറ്റി എല്ല ആള്‌ഗാക്ക്‌മ് കാട്ടി കൊഡുക്കേര്.
27അദ്‌ണാലെ ആരാറ്റ് തഗ്‌ദില്ലാത്തവാനായി ഈ അഡേന തിന്ത് മുന്തിരി സാരണ കുഡിത്തദാനാക്കി അവാ് ആണ്ടവാന്‌ദ് സരിഗലാക്ക്‌മ് സോരേക്ക്‌മ് ബെലെ കൊഡുക്കാത്താദ്‌ണാലെ അവാ് കുറ്റക്കാറാ് ആരാ്. 28അവാനവാന താനെ സോദിത്ത് ബേ്ഡു ഈ അഡേനാമ് മുന്തിരി സാരണാമ് തിന്ത് കുഡിക്ക്യ. 29എന്ത്‌ക്കെന്റ ആണ്ടവാന്‌ദ് സരിഗലാക്ക് മദ്‌പ്പ് കൊഡുക്കാദെ ആരാറ്റ് ഈ അഡേനാമ് മുന്തിരി സാരണാമ് തിന്ത് കുഡിത്താക്കി അവാ് തനാക്ക് കെ്ഡേക്ക ദണ്ടണെനാത്തെ തിന്ത് കുഡിക്കാമ് സെയ്‌രാ്. 30ഇച്ചെ സെയ്‌രാദ്‌ണാലെത്തെ ണിമ്മ് കൂട്ടാത്തിലി എത്തിന്യൊ ആള്‌ഗ ഉജുറുപ്‌റാണി ഇല്ലാത്തവാര്‌മ് ണോയിക്കാറാര് ആരാദ്‌മ് എത്തിന്യൊ ആള്‌ഗ സാരാദ്‌മ്. 31ണമ്മ ണമാണ താനെ സോദിത്ത് കുറ്റ ഇല്ലാത്തവാര് എന്ത് മുഡിവു ആക്കിന സാമി ണമാണ ദണ്ടിക്കമാട്ടാ്. 32ഇച്ചെ ണമാണ ആണ്ടവാ് ദണ്ടിത്ത് അഡിത്ത് പഡ്‌സ്‌റാദ് ഉലഗാത്തില്യ ആള്‌ഗണ ദണ്ടിക്കാട്ടി ണമാണാമ് ദണ്ടിക്കാദിര്‌ക്ക്യ ബേ്ണ്ടിത്തെ.
33അദ്‌ണാലെ ഏസുക്കാറാരെ, ആണ്ടവാന്‌ദ് ബിര്‌ന്ത്‌ക്ക് ണിമ്മ ഒന്റായി കൂഡുഗാട്ടി എല്ലാര്‌മ് ബന്ത് എജ്ജ്യ കാത്തിരിരി. 34ണിമ്മ ഒന്റായി കൂഡുഗാട്ടി സാമി ദണ്ടണേക്ക് ബയ്യി ബെക്കാദെ ഇര്‌ക്ക്യ ബേ്ണ്ടി ആരാറ്റ്‌ക്ക് പജി പ്‌ഡിത്തിര്‌ന്താക്കി അവാ് തന്ന് കൂരേലിതാനെ തിന്ത് ബരുഡൊ.
ഇനി ഉള്ള കാര്യഗണ ണാന് ബന്ത് സെരി ആക്ക്‌റെ.
Currently Selected:
1 കൊരിന്ത്യക്കാറാര് 11: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
