1 കൊരിന്ത്യക്കാറാര് 9
9
അപ്പൊസലാന്‌ദ് ഉരിമെഗ
1എന്ന് കാര്യഗണ ണോഡ്യ എനാക്ക് ഉരിമെ ഇല്ലേഗ? ണാന് ഒരു അപ്പൊസലനല്ലാഗ? ണാന് ണമ്മ് ആണ്ടവാ് ഏസുണ കാണാലേഗ? ആണ്ടവാന്‌ക്ക് ബേ്ണ്ടി ബേലെ സെയ്‌ദാദുക്കുള്ള പല ണിമ്മാത്തെ. 2അഡ്‌ത്തവാര് എനാണ അപ്പൊസലനായി സൊല്ലാദെ പോനാല്‌മ് ണിമാക്ക് ണാന് അപ്പൊസലാത്തെ. എന്ത്‌ക്കെന്റ ആണ്ടവാന്‌ക്കെ എ്ണേന്തിര്‌ക്ക ണിമ്മാത്തെ ണാന് ഒരു അപ്പൊസലാ് എങ്കാദുക്കുള്ള ണെപ്പ്.
3എനാണ ബിദിക്കവാര്‌ക്ക് എനാക്ക് സൊല്ല്യ ഇര്‌ക്ക ബദ്‌ള് ഇദ്‌ത്തെ. 4എമാക്ക് തിന്ന്യാമ് കുഡിക്ക്യാമ് അദിഗാര ഇല്ലേഗ? 5ബേ്റെ അപ്പൊസലലാമ് ആണ്ടവാന്‌ദ് തമ്പിലാമ് പത്ത്‌റോസ്‌മ് സെയ്‌ര പാസെ ഏസുക്കാറിസി ആന പെ്ണ്ടച്ചിദ് ഒപ്പ ണഡാക്ക്യ എമാക്ക് ഉരിമെ ഇല്ലേഗ? 6അല്ല ണാന്‌മ് ബറ്‌ണവാസ്‌മ് മാട്ട്‌ത്തെ ബേലെ എ്ഡ്‌ക്കുഡോഗ?
7സൊന്ത സിലാവിലി ജുദ്ദ സെയ്യ ണില്ല്‌റ പഡെയാളി ഏവാ്? മുന്തിരി ദോട്ട സെയ്‌ദ് അദിലിര്‌ന്ത് തിങ്കാത്തവാ് ഇര്‌ക്കാന? ആഡ്‌ഗണ മേസി അയ്യി ആഡ്‌ഗണ ബെത്ത് പെ്ളേക്കാത്തവാ് ഏവാ്? 8ണാന് ഇദ് മന്‌സാര് പെ്ളേപ്പിലി ണഡാക്ക കാര്യണാത്തേഗൊ സൊല്ലി കാട്ടിനാദ്? മോസെ ബെത്ത സാമി സട്ടാത്തിലി സൊല്ലിര്‌ക്കാദ്‌മ് ഈ കാര്യണാത്തേഗൊ? 9<<അന്നണ ഒക്കുറ ഓരിമാഡ്‌ദ് ബായിന മൂഡികെ്ട്ട ബേ്ഡ>>#മറ്‌ദെ സൊല്ലുറ സട്ട 25:4 എന്ത് മോസെ ബെത്ത സാമി സട്ടാത്തിലി എ്ള്‌ദിര്‌ക്ക്‌ദല്ല? ഓരിമാഡ്‌ണ ണെനേത്ത്‌ത്തേഗൊ സാമി ഇച്ചെ സൊല്ലിര്‌ക്കാദ്? 10സെരിക്ക്‌മ് ണമാണ ണെനേത്ത്‌ത്തെ ഇച്ചെ സൊല്ലിര്‌ക്കാദ്. എന്ത്‌ക്കെന്റ ഏര് ഉളുറാവാന്‌മ് അന്ന അറ്‌ക്കവാന്‌മ് തമാക്കുള്ള പങ്ക് കെ്ഡേക്കു എന്ത് ആസെ പട്ട്‌ത്തെ ബേലെ എ്ഡ്‌ക്കുഡൊ. 11ണിമ്മ സാമി ബക്‌ദ്യോഡെ പെ്ളേക്ക്യ ബേ്ണ്ടി ബേ്ഡുമാന കാര്യഗണ ണിമാക്ക് സെയ്‌ദ് തന്തിര്‌ന്ത് എമ്മ് സരിഗലണ പാദ്‌ഗാക്ക്യ ബേ്ഡുമാന കാര്യഗ ണിമ്മോഡെ ഇര്‌ന്ത് കേ്ട്ടാക്കി അദിലി എന്താറ്റ് തപ്പ് ഇര്‌ക്ക്‌ദ? 12ണിമാണ ണഡാത്ത്‌റ ബേ്റെ ആള്‌ഗാക്ക് ഇച്ചെ കേ്ക്ക്യ ഉരിമെ ഇര്‌ന്താക്കി എമാക്ക് അദ്‌ണ ബ്‌ഡ ഉരിമെ ഇര്‌ക്ക്‌ദ്.
ആന അയ്യി ഉരിമേക്ക് തഗ്‌ന്ത പഡി എമ്മ സെയ്യാലെ. അദ്‌ക്ക് ബദ്‌ള ക്‌റ്‌സ്‌ത്ത്‌ണ പറ്റ്യുള്ള ണല്ല സേദിക്ക് തഡെ ഒന്റുമ് ബരാദെ ഇര്‌ക്ക്യ ബേ്ണ്ടി എമ്മ എല്ലാദ്‌ണാമ് താങ്കിനേര്. 13സാമികൂരേലി സാത്ത്‌റ കളിക്കവാര് അദിലിര്‌ന്ത് കെ്ഡേക്ക ണേര്‌സെഗണ ബെത്ത് പെ്ളേക്കാര് എന്ത്‌മ് പലി കൊഡുക്ക മദ്‌ളിലി ബേലെ സെയ്‌വാരവാര്‌ക്ക് പലി കൊഡുക്ക ജാദിലി പങ്ക് ഇര്‌ക്ക്‌ദ് എന്ത്‌മ് ണിമാക്ക് തെര്യുമല്ല? 14അദ്‌ണ പാസെത്തെ സാമിദ് ണല്ല സേദിന സൊല്ലുറവാര്‌ക്ക് അദിലിര്‌ന്ത് കെ്ഡേക്കാദ്‌ണ ബെത്ത് പെ്ളേക്കുഡൊ എന്ത്‌മ് ആണ്ടവാ് കല്‌പനെ ബെത്തിര്‌ക്കാ്.
15ആന ണാന് ഈ അദിഗാരഗ ഒന്റുണാമ് കാട്ടാലെ. എന്താറ്റൊന്റു കെ്ഡേക്കു എന്ത് ആസെ ബെത്തല്ല ഈ കാര്യ എ്ള്‌ദ്‌റാദ്‌മ്. ഇച്ചെ പെ്ളേക്ക എന്ന് പെ്ളേപ്പ്‌ണ പറ്റി എനാക്ക് പെര്‌മെപഡ്യ ഉള്ള ണായ ഇര്‌ക്ക്‌ദ്. അദ്‌ണ ആരാറ്റ് ഇല്ലെന്ത് സൊന്നാക്കി ണാന് സാരാദ്‌ത്തെ എനാക്ക് ണല്ലാദ്. 16ണാന് ണല്ല സേദിന സൊല്ലുറ ആള് എങ്കാദ്‌ണാലെ എനാക്ക് പെര്‌മെപഡ്യ ഒന്റുമില്ലെ. അദ്‌ണ സൊല്ല്യ സാമി എനാണ ണത്ത്‌റാ്. ണാന് ണല്ല സേദിന സൊല്ലാദെ ഇര്‌ന്ത അവ്വൊ, എനാക്ക് സെറ്റെ കജട്ട കജട്ടത്തെ! 17എന്ന് മനേസ്സാറ ണാന് ഈ ബേലെ സെയ്‌ദാക്കി എനാക്ക് കൂലി കെ്ഡേക്കാദ്‌ക്കുള്ള തഗ്‌ദി ഇര്‌ക്ക്‌ദ്. ഇദ് ണാന് എന്ന് പിര്യാക്ക് തെരിന്തെ്ഡ്‌ത്തദല്ല. ആന സാമി ഈ കാര്യ സെയ്യ എനാക്ക് തന്താദ്‌ണാലെ ണാന് അദ്‌ണ സെയ്യ കഡാമെപട്ടവാ്ത്തെ. 18അപ്പ് എനാക്കുള്ള കൂലി എന്ത? ണാന് ണല്ല സേദിന സൊല്ലുഗാട്ടി ണല്ല സേദിന സൊല്ലുറ ആള്‌ഗാക്കുള്ള അദിഗാരണ കാട്ട്‌റാദില്ലെ. അദ്‌ക്ക് ബദ്‌ള സിലാവുക്ക് ഒന്റുമ് ഏക്കാദെത്തെ ണല്ല സേദിന സൊല്ലുറാദ്. ഈ ദിന്‌സിലി സെയ്‌രാദിലി ഉള്ള പിര്യാത്തെ എന്ന് കൂലി.
19ണാന് ആര്‌ക്ക്‌മ് പണ്ണ്യക്കാറാനല്ലാത്തവാ് ആയി ഗൂഡി മുഡിന്ത അളാവുക്ക് മൊത്തന ആള്‌ഗണ കെ്ഡേസ്യ ബേ്ണ്ടി ണാന് എനാണ താനെ എല്ലാര്‌ക്ക്‌മ് പണ്ണ്യക്കാറാനാക്കിര്‌ക്കെ. 20ണാന് എഗുദാര്‌ണ ക്‌റ്‌സ്‌ത്ത്‌ക്ക് കെ്ഡേസ്യ ബേ്ണ്ടി എഗുദാര് പട്ടിലി എഗുദാന പാസെ പെ്ളേത്തെ. ണാന് മോസെ ബെത്ത സാമി സട്ടാക്ക് കെ്ട്ട് പട്ടവാര്‌ണ കെ്ഡേസ്യ ബേ്ണ്ടി അയ്യി സട്ടാക്ക് കെ്ട്ട്‌പഡ്‌റവാന പാസെ പെ്ളേത്തെ. 21അദേപാസെ സാമി സട്ട കെ്ഡേക്കാത്ത ജാദിഗണ ക്‌റ്‌സ്‌ത്ത്‌ക്ക് കെ്ഡേസ്യ ബേ്ണ്ടി അവാര് പട്ടിലി സാമി സട്ട കെ്ഡേക്കാത്തവാന പാസെ പെ്ളേത്തെ. ഇദ്‌ക്ക് അര്‌ത്ത സാമി സട്ടപഡി പെ്ളേക്കാത്തവാ് എന്ത് അല്ല. ണേര്‌മായിമ് ണാന് ക്‌റ്‌സ്‌ത്ത് സട്ടപഡി പെ്ളേക്കവാ്ത്തെ. 22മനേസ്സിലി ഒറേപ്പില്ലാത്തവാര്‌ണ കെ്ഡേസ്യ ബേ്ണ്ടി ണാന് അവാര് പട്ടിലി അവാര്‌ണ പാസെ ആനെ. എച്ചാറ്റ് എന്താല് ലേസ ആള്‌ഗണ ദെങ്ക്‌സ്യ ണാന് എല്ല ആള്‌ഗാക്ക് ബേ്ണ്ടി എല്ല ആള്‌ഗണ പാസെ ആനെ. 23ണല്ല സേദിലി ഒരു പങ്ക്‌ക്കാറാനായി, അയ്യി ണല്ല സേദിന പജാത്ത്യ ബേ്ണ്ടി ണാന് ഇദെല്ല സെയ്‌രെ.
24ജൂദ് പ്‌ഡിത്ത് ഓഡ്യ ണിന്റിര്‌ക്കവാര് എല്ലാര്‌മ് ഓഡ്‌റാര്. ആന ഒരുത്താ്ത്തെ ഇനാമ് കെ്ഡേസ്‌റാനല്ല? ണിമ്മാമ് ഇനാമ് കെ്ഡേക്കാദ്‌ക്ക് തഗ്‌ന്ത പഡി ഓഡിരി. 25ഓട്ട ഓഡ്‌റവാ് തന്ന് സരിഗലണ ണല്ല മുജുവുള്ളാദ് ആക്ക്യ ബേ്ണ്ടി എല്ല ദിന്‌സിലിമ് പത്ത്യ ഇര്‌ക്കാ്. ആന അവാര്‌ക്ക് കെ്ഡേക്കാദൊ അളിന്ത് പോര ഗിര്യാഡാത്തെ. ആന ണമാക്ക് കെ്ഡേക്ക ഗിര്യാഡാഗൊ അളിന്ത് പോഗാത്ത ഗിര്യാഡാത്തെ. 26അദ്‌ണാലെ എജ്ജ്‌റ പട്ട്‌ണ ണോഡികൊണ്ട്‌ത്തെ ണാന് ഓഡ്‌റാദ്. ഗുറി ണോഡാദെ അല്ല സുണ്ടി ബില്ല് ബെക്കാദ്. 27അഡ്‌ത്തവാര്‌ക്ക് ണല്ല സേദിന സൊന്ന പ്‌റ ണാന് താനെ അയ്യി ഇനാമ് കെ്ഡേസ്യ തഗ്‌ദി ഇല്ലാത്തവാ് ആഗാദെ ഇര്‌ക്ക്യ എന്ന് സരിഗലണ അഡാക്കി ഒദിക്കി ണാന് അഡിമെ ആക്ക്‌റെ.
Currently Selected:
1 കൊരിന്ത്യക്കാറാര് 9: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
