EFESUS 5
5
Akbinak paga dogu wene
1Kir kinebe Ar Allah akburi iliti kunik mende ma, eti paga nen kir Ar Allah obabur eka ndak-ndak eku dogoni o. 2#Kel. 29:18; Mzm. 40:6Ar Kristus ninakba karige kwak, kir kinebe nakba kakba akla dogoni o. Ar Ebe nir ninake waruak nen yiluk wogoragage eti, obari pano mende Ar Allah akla pano adeknggen erogo birige.
3Kir kinebe Ar Allah akburi uma mende o. Eta ma, kir nen, kinobabur mbainak ekwa, wadok-wadok nggirik mende, ugun-ugun ekwa, kir endoma ekwi ma, akuni nen edo biluk inane kinoba burak ma, eterogon mende ekwi mondok mbo dambe kani o. 4Kir kinane paga nen, wene maduk mende yurak eti ndak dek mende arar o. Wene maduk mende, aik dagok kumi ap inabok yugwi eku dogorak dek o. Kir yugu dogorak mende eti, kinane paga Ar Allah mban wogok bugwi dogoni o. 5Wene endi panorogo birkani o. Akuni inobabur ugunar kagar-kagar yogwa mende, erurak dek mende ekwa mende, ye wadok nde wadok andagwa mende, eti amudi kunggwi ndak-ndak arar o. Ma ir akuni eti, Ar Allah akburi atuk, Ar Kristus o nen Ar Allah o imbirak inapma balok inom dogogun dek o.
6Akuni inenggal nggirik, ebe dek mende inane amburu paga nugur kinabu nogo. Wene eta ndak-ndak eku dogolir, Ar Allah ane tagalkwi paga, Ar Allah anini elagabir tagwi o. 7Etegedek ma, ap inobabur eterogo ekwa mende kinom agade kunugup o. 8Kir alep o amun akla welagagup mende, yogondak Tuhan akburi agagutik nen kinebe Ar akbinak akla arar werek o. Eti ar ma, kir nen akbinak paga dogolir erir lagu dogoni o. 9Akbinak akla nen kinobabur ye pano nde pano eru mende wundi warir taga o. Ma arma nggedok eru mende inom, kinoba tagin mende inom Ar Allah nen il kinar taga o. 10Kir nen, Ar Tuhan iliti adeknggen kaurak mende mban kwaku dogoni o. 11Kir akuni inobabur o amun mo dogolir erir taga mende etoma obogar, kinamborna mbo bini o. (12Inobabur eterogo mende eruwok nen yiluk inenggadi nen kirak-kirak erir tagama o.) 13Akbinak paga inobabur erir taga mende bikamo, telekma podok togon ertaga kugun o. 14Akbinak paga nen telekma mbiyalogo bir tagama o. Eta ma, ya yegerogon yirugwa:
“Kristus akbinak kinoba yibaduwak nen,
kir nogo yugwi mende kiniluk arni o,
warek mende menarni ar o,” yiluk yirige.
15Eta ma, an nobabur nenggerogon agarik yiluk panorogo mbenagago dogoni o. Akuni iniliti apir mende nen erir letagwi ndak-ndak erir lagu dogogup o. Akuni iniliti werek mende nen erir lektagwi kwak, erir lagu dogoni o. 16#Kol. 4:5O yogondak ya, maduk adik-adik waganem ma, o telek pano ya an nake yarir taga yiluk, mor ekdatalok dogoni o. 17Kiniliti apir atuk dogogup o. Ar Allah iliti wadok mende mbenak biluk dogoni o. 18Anggur amburu nunggwi paga maduk ekinaburakma, anggur amburu naurak maga o. Ar Roh Allah nen kinobarne ekinaka dogowak nen yiluk eku dogoni o.
19 #
Kol. 3:16-17
Kinane paga yugu dogolir, ndai wene mbugur wakwi, wogokdurak ndai wakwi, mbogor paga ndai wakwi, eku dogoni o. 20Yi ekwi ndik ekwi eku dogolir, dinggaga kukbaga, Ar Allah Ninombae wa yiluk, Ar Tuhan Yesus Kristus endaga mbalogo, ebe keyagi wakwi mondok dogoni o.
Agun agwe nen eku dogorak wene
21Kir nen Kristus oba um palek dogolir, tebe yiluk napma kapma dogoni o.
22 #
Kol. 3:18; 1Ptr. 3:1 Ar Tuhan apma tebe yiluk dogu kwak, kumi ap waganek mende, kir nen kinaguni inapma tebe yiluk dogorak o. 23Ap eti kwe alubak, Kristus eti Jemaat inalubak. Ar ebe Jemaat inewe endaga mbogor, Ar akburi agugwa mende ndilinakwa Ar arar o. 24Jemaat nen Kristus apma tebe yiluk werek kwak, kwe nen agun apma tebe yiluk eka dogorak o.
25 #
Kol. 3:19; 1Ptr. 3:7 Kristus akburi jemaat inakba nen, inake waruwak nen yiluk wogoragage kwak, ap nen agwe iliti kunik dogorak o. 26Ekige eta, Ar Kristus nen An nane wene emerek paga emeriralok, inoba korogo, ima wukdalok, wogorek Ar Allah wogorigin o. 27Etegerogo ekdarigemo, ir jemaat menogo barige enogo menek dogolir, inakbinak pano ekwi, maduk inoba dek aga Ar apma agarik o. 28Eta ndak-ndak, ar ap nen ar ebe iliti kunik kwak, ar agwe iliti kunik eka dogorak o. Ap ambi nen agwe iliti kunik kalok, ar ebe iliti kunik o. ( 29Ir akuni nen ir inebe ina'ir kunik etar tagodek o. Ogwe ar engga werek nen ar ebe ndegelaga, aruam wartaga erir taga kwak, ir jemaat eti Ar Kristus nen ndegelogo bartaga o. 30Nir Kristus inggi iyok ma, wene eti ninilu dogorak o.) 31#Kej. 2:24Etiar ma, Alkitab mbalek paga nen yegerogo mbalek, “Eterogo ma, ap nen agwiya ombae dambek dalok, agwe imbirak dambulik dogogin o. Nen ir inebe imbirak ambiar arugun o.” 32Wene yi nggok oba kunik mende o. Nen, an wene yi Kristus akburi ir jemaat inom kunik paga yidurogo yorkeragi o. 33Wene ebe ugu kinoba kinake kunik werek o. Ir ap nen inebe iniliti kunik kwak, inakburi iniliti kunik dogorak o. Ir kumi nen inaguni inalon palogo, inapma tebe yiluk dogorak o.
Currently Selected:
EFESUS 5: WLW
Highlight
Copy
Compare
Share
Want to have your highlights saved across all your devices? Sign up or sign in
