KOLOSE 3
3
1 #
Mzm. 110:1
Kir Ar Kristus kinom, kiniluk erogo arar binagarige o. Kir nen, mbogor taga awene mban waganggu dogoni o. Eti paga nen, kir o mbogor paga, Ar Yesus Ar Allah imbirak, inapma balok dogir tagama etoma mende, kodaurak mban ake eku dogoni o. 2Agar taga mende yoma kiniliti kunik erugup o. Mbogor taga mende mban kiniliti oba kunik eku dogoni o. 3Kir kinebe eti, Ar Kristus kinom arar watatuk, Ar paga nen, Ar Allah ilitimo kimago dogoni o. 4Yogo, kir kinedo odo abodok dek mende eti, Ar Kristus arar o. Ar Ebe yabongga waganem, kir kinom arar melatuk, Ar obatne paga ekanem kinom eku dogogun o.
Inobabur paga mende inom, nen inobabur ngger mende inom wene
5Eta kalok, kir nen kinebe kinobabur maduk ekinabir taga mende eti, mbainak ekwi inom, ugun-ugun ekwi inom, aganggen engga mbalkwi inom, kiniliti nen maduk erurak eberkwi inom, kiniliti nen nggok mban kodau eberkwi inom, etoma obogar (amudi kunik mende woguk dugwi ndak-ndak ara) ma, kir nen kinobabur eti mende obogar warogo mbo bugu dogoni o. 6Wene, ninobabur eta mende erir nugunem, Ar Allah ane mutok lagikdekma, Ar Allah anini elagabir tagwi o. 7O pagane nen, kir kiniliti wadok apma dogolir, wadok nen yokeraga kalok erir nugu lagagupmo o.
8Nen, yogondak kir nen, winimuk yugwi, tadok kunggwi, akuni kina'ir kuninakwi, kinandema nen wene ade werek mende wulakwi, kinandema nen wene maduk mende wulakwi, wene eta mende obogar mbo dambe kani o. 9#Ef. 4:22Kinobabur pagane mende inom, pagane dogolir eku lagagup mende inom, mbo birugutip ma, kir-kir ar kinenggal yugu dogorak dek o. 10#Kej. 1:26; Ef. 4:24Kir kinebe yogondak ngger mende erogo binagagemo o. Akuni ngger mende, kenamer kinakige werek nen kup keyam, ngger erkinabir laga, nen Ar Allah nen Ar obabur kwak erogo binagir taga o. Eta eka paga, kir nen Ar Allah ebe dirogo kinil kowak nen yiluk, ekinabir taga o. 11Eta etarumo, yi Yahudi mende, yi wedegap mende, yi sunat erek mende, yi sunat erek dek mende, yi ap inuwakma mende, yi ap inggi werek mende, yi yedoman mende, yi ap wender mende yugwi dek ar arigin o. Ar Kristus eti nen, obogar Ar inggimo werekma, Ar ebe ir inom ambi ar agarik o.
12 #
Ef. 4:2
Nakburi kinebe Ar Allah akburi uma mende arar agoktip o. Ar Allah nen kinakba kalok, pulkinakige, kir Ar ake denek dogowak nen yiluk, mikinakigemo o. Eti paga, kir nen nakba kakba welagwi, kiniliti pano welagwi, kiniliti teberek welagwi, kinoba tagin welagwi, nen anggin panggin kalok kinoba yanggo yiluk welagwi, eku dogoni o. 13#Ef. 4:32Kir nen ar ambi to kigik eku dogoni o. Nen kir ambi nen na'ir ka'ir yiluk kalok, ibar mi erogo mbo bigik eku dogoni o. Ar Tuhan nen kir maduk ekugup mende, iliti adeknggen paga akla mi erogo mbo birige kwak, kir nen, maduk erkinakwi arumo, oba mi erogo mbo bigik eku dogoni o. 14Wene ebe odo mondok dogir taga eti: Kir-kir ar nakba kakba paga dogorak mende eti arar o. Nen kir nakba kakba ekwi eti nen, kir kinebe kinoba, amodok nggaruk togon arar mbalarugun o. 15Ar Kristus nen ambi dambulogo binaninggige eti paga, ye wene nde wene eti paga ar mbalku dogoni o. Ar Allah nen kinebe ambi paga doguwak yiluk kinayonggo birige o. Kir Ar Kristus nen dambulogo binagarigerek ma, dambulik eti akla doguwak nen yiluk, kir kinayonggo birigemo o. Etama, kir nen wa yiluk yogwi, eku dogoni o. 16#Ef. 5:19-20Ar Kristus awene emedek paga, kinonggo nggok wokirau mende, kir kinilimo kunogo biluk dogoni o. Kir nen ar ambi emerigik, kinaruk watagwi, kiniliti kode dogolir, wene mbogor dadi endai wakwi, wogokdurak endai wakwi, mbogortaga endai wakwi, Ar Allah endai wakwi eku dogolir, kiniliti paga nen wa, yiluk yugu dogolir eku dogoni o. 17Kir nen ye ekik nde ekik eku dogolir, nen yugu dogolir, Ar Tuhan Yesus endaga mbalogo mban eku dogoni o. Ar Yesus nen kir kinake ekige paga, Ar Allah Ninombae wa, yiluk yogu dogoni o.
Ninom mende ninom dogolir eku dogorak wene
18 #
Ef. 5:22; 1Ptr. 3:1 Niruwi kir kinaguni waganek mende yi! Kinaguni inane yugunem mutok lagu dogoni o. Kir kinebe Kristen mende kalok, kinobabur eta ndak-ndak arar dogorak o.
19 #
Ef. 5:25; 1Ptr. 3:7 Nogari kir ap kumi waganek mende yi! Kinakburi kumi waganek mende inakba erogo dogoni o. Kir nen ir iniliti aik aruwak nen yiluk erugup o.
20 #
Ef. 6:1
Kir elege yi! Kir Kristen mende kalok, kir nen erurak mende eti, kinagwiya kinombae inane yugwi dalok, yu mende dirogon arar mutok eku dogoni o. Kir nen eterogon erumo, Ar Allah iliti adeknggen kinoba bigin o. 21#Ef. 6:4Kir elege inombayelak mende yi! Kir nen kinakburi elege, ir iniliti aik agwi nen iniliti watagwi erurak mende eti erugup o.
22Nawor nakbur kir yedoman werek mende! Yi ekik-ndi ekik eku dogolir, kinombayelak agar taga uwakma werek mende eti ane yokeraga kalok, ane yu mende mutok dirogon eku dogoni o. Ir inebe inil wokerek paga, wogok dinaguwak nen yiluk mban dek o. Kir nen kiniliti ebe pano paga, inane yorkeragi mutok eku dogoni o. Kir nen Ar Tuhan keyagi warogo woguk dugwi eku dogoni o. 23Ir kir kinombayelak nen, yabu yi mende erni yiluk yokeragwi kalok, nir Ar Tuhan arar yamak kertagwi yiluk eku dogoni o. Kir niliti ebe pano paga, ap agar taga mende eti kigigar, yamak dagu dogoni o. 24Nir Ar Allah nen onggo wokneragin o yiluk, kinilu dogolir eku dogoni o. Ar Allah nen akburi inake ndugurogo birige mende eti, kir wokeragin o. Kir kinombae ebe eyabu ekwi eti, akuni ineyabu ekwi dek o, ogwe Ar Kristus arar eyabu erir tagwi o. 25#Ul. 10:17; Ef. 6:9Ar Tuhan eti ap inelokte mbenarir tagodek ma, ap ambi nen maduk eka kalok, omaduk onggo ar oba dombok arar kodagin o.
Currently Selected:
KOLOSE 3: WLW
Highlight
Copy
Compare
Share
Want to have your highlights saved across all your devices? Sign up or sign in
