KOLOSE 2
2
1An nen kir obok kinilu aruwak nen yiluk, kir kinake erir lektaga mende yokerak o. Kir kinake inom, ir o Laodikia werek mende inake inom, amberak an inonggokdek mende inake inom, mondok nggok adik negen eka agarik o. 2Erir taga etoma eti, kir kiniliti kode aga, kir nen nakba kakba welagwi, eku dogolir, kinebe ambi ar etaruwak nen yiluk, erir taga o. Eta paga, ir nen ebebar andalok dik bugwi, Ar Allah agimago mende inilu agwi, Ar Kristus ebe inilu agwi eruwak nen yiluk, erir taga o. 3Kristus nen, Ar Allah akla nggagalek wene ilu, kimago welagage mende eti obogar telekma erogo yorneragage o.
4Kir akuni inane amburu paga, nugur kinakunem yiluk, wene etoma yorkeragi o. 5Yogondak ya an nebe ninom korok dek ar agorik mende, nebe kinakla paga eti, ebe ninom agorik yiluk kinilu etegerogon dogoni o. Kir nen kiniliti ambi atuk, Kristus oba panggolek werek ma, kinadeknggen kinar taga o.
Niniluk amudok mbalek pano dogorak wene
6Nawor nakbur, Ar Yesus Kristus eti, Ar Tuhan arar o yiluk, waganggugup mende nen, Ar ebe kinom ambiar kunik dogorak o. 7Ar paga kinomanggen yagago dogoni o. Kir kinebe Ar Kristus paga, kedaga negen batalok pago dogoni o. Kir nen kiniliti Kristus oba panggok diluk, wene emekeragugwa mende pago dogoni o. Nen, kinilitimo nen wa yiluk, kinadeknggen kida-kida wulka paga arar, keyagwi war-war yugu dogoni o.
8Ir ap agar taga mende paga, iniliti nggagalek wolok nugwi mende nen nugur kinakunem, kir kinil werek togo dogono o. Ir ap eti akuni nugurinakwa mende o. Nen, inawene iniliti nggagalek wene eti, Ar Kristus wene yirige mende dek o. Ir ap agar taga mende nen andalok yirugwa mende emerir nugwi o. Ir irimbo agar taga yoma tebelir lek taga mende, inawene wolok lek tagwi o. 9Ar Allah ebe obabur mende eti, obogar Ar Yesus oba werek, Ar ebe akuni paga endago paga werek o. 10Kir Ar Kristus kinom kunggugupmo nen, kir kinebe kinakla, Ar ebe Amonggar unggirige o. Ar Kristus eti, ir wim onde inom, wene onde inom, dambuk togon inewe Ar adigar o.
11Ar Kristus kinom kunggugup paga, kir sunat arar ekinakugwama o. Yi akuni nen sunat erirtagwi paga dek ogwe. sunat Ar Kristus nen ekinakige eti, maduk apma kede warekma nen pigalogo binagarige eti paga arar o. 12#Rm. 6:4Kir ima wukinakwi kigik, kir Kristus kinom watagwi ekugup o. Nen ima nen menagagupmo, Kristus kinom menagagup o. Ar Allah obarne paga, Ar Kristus kambiluk lektagama nen iluk erogo birige eti oba arar panggolkugup mo o. 13#Ef. 2:1-5Kir o pagane ar, maduk ekwi onggo inom, nen sunat erekdek eti paga inom, kinaguringge paga eti warek arar welagagup o. Ogwe, yogondak Ar Allah nen Kristus paga, kinomaduk korogo biluk, kinebe kiniluk erogo binagage o. 14#Ef. 2:15Nen nomar ninoba nggok anggin ambik welagage mende dek erogo, nen ninoba nomar durik yomanogo Ar Allah nen waganogo, o kari-karo paga biluk, wene maduk edo ninenggadi waku lagugwa mende edo eti, obok beralogo mbo lagakige. 15O kari karo paga eta dogolir, Kristus nen irimbo aneknek wene unde, wim onde agwi mende inobarne tar liyorogo birige. Ar Kristus nen tebelinaka dogolir, dirubu ndak-ndak liraper daga paga, akuni obok nen wukdagun o.
16 #
Rm. 14:1-6
Etama, akuni nen erom nau paga, i nau paga, nggedak eru paga, inaruk wakanem eru paga, hari sabat paga eru paga, maduk ekwa yamak daurak paga nen yiluk, erugup o. 17Ir ekwi etoma yabongga eru akumak ekwi o. Ebe ekwi etoma obogar, Ar Kristus paga telekma aga kugun o! 18Ir ap amberak inenggal ar tebe yiluk malaikat woguk dagwi dalok, ebebar talek, nugur kinabuok nen yiluk ekwi ma, damber dano o. Ap eti mende nen iniliti agar taga mende paga wogok dartugwi o, ir inakbi kegetek mban wolok mbililir nugwi erir nertagwi o. 19#Ef. 4:16Ir nen Ar Kristus Kepala Gereja ake awene ir pago dek o. Ar Kristus nen, kir pakinarek werek ma, ninebe obok ndegelek omanggen yungguk paga kunik, Ar Allah nen etaruak andarige paga wigalir laga dogogin o.
Ar Kristus ninom kamburak inom nen niniluk dogorak inom ake awene
20Kir Ar Kristus kinom wartagagupmo, irimbo aneknek o yoma telelir taga mende ininggimo nen, weralogo wokinakige o. Yogo etama, nenaluk kir ir akuni agar taga mende, ir inuwakma dogolir erir tagwi kwak ekwi agoktip o? Nenaluk kir nen ye eru nde eru eku dogolir, 21“Yi kininggi paktagup o”, “Yi mende induk bikagup o”, “Yi kininggi dengge kugup o”? yiluk awene diru mbalek apma tebe yiluk agoktip? 22Wene wulabek eti etuk ogwe nen irep paga erir lakbuk mende arar o. Wene eku dogu kwalek inom nen wene emeku dogu kwalek inom, etoma we ir akuni nen ekugwa paga arar o. 23Inawene wulabek etoma, mor pano telek mende ar o, ir nen ap malaikat mende wogokdaurak yiluk yugwi, inebe tebe yiluk inoba aik mbaik ertagwi, eta obogar erugun paga, ir akuni inakla aganggen tebelukbuk kalok erir nugwi eti, inoba nggortarigin dek ar o.
Currently Selected:
KOLOSE 2: WLW
Highlight
Copy
Compare
Share
Want to have your highlights saved across all your devices? Sign up or sign in
