ROMA 2

Hukumang u Mawu Ruata

1 # Mat. 7:1; Luk. 6:37 Ual᷊ingu e'e, manga ana u simbau, ko i sai i Kau hakiu i Kau mo mupunsal᷊a ngu taumata ko wal᷊inge? i Kau takoae manga apa guna ngu manatawang watangengu! Watu'u boko i Kau mupunsal᷊a ngu taumata ko wal᷊inge, sumbal᷊i i Kau sisane ngu mukoa hal᷊i ko musul᷊ung i sire, kuteu i Kau nunawo hukumang l᷊ai su watangengu sisane. 2I kite matitong himoneu boko Mawu Ruata muhukung su manga taumata ko mukoa hal᷊i ko kere'e, putusang u Mawu Ruata e'e nuhino. 3Arawe i kumu manga ana u simbau, i kumu mang mukoa l᷊ai manga apa ko iantang i kumu su taumata ko wal᷊inge! Dang su naung i kumu, i kumu botonge makal᷊iso bou hukumang u Mawu Ruata? 4Arako i kumu mupakasana u kapia ngu Mawu Ruata l᷊au kal᷊abo u naung dang kasasabari-E ko kere'e kal᷊aboe? Nal᷊ahe i kumu matitong himoneu Mawu Ruata manode kapia ngu naung-E watu'u I Sie mo tadeau i kumu mo mutobati bou kaul᷊i u dosa ngi kumu. 5Kateho timbo i kumu makitihi dang tawe mo muwal᷊u watu'u e'e i kumu sisane nukoa hukumang si kumu kasuenge mabuha su L᷊ou Kiamati, boko Mawu Ruata mupakal᷊ahe u wawal᷊uang-E dingang mupakanawo u hukumang ko maadili. 6#Mzm. 62:13; Sas. 24:12Watu'u Mawu Ruata sarung mamal᷊isi apang taumata sintuhu dingang u kakanoae. 7Mawu Ruata mangonggo u puwawiahi ko kahingang dang ko kakal si sire ko tatapi mukoa ko mapia guna ngu mundea ko mawantughi, ko mahariga, dang takoae suenge. 8Arawe manga taumata ko mangapia watangenge sisane dang mandiri tumuhu su Mawu Ruata, watu'u tumuhu ko dal᷊ai, i sire e'e sarung ihukung u Mawu Ruata. 9Apang taumata ko mo mukoa ko dal᷊ai sarung masingsara dang masusa, kahimotongange tau Yahudi, dang l᷊ai manga bangsa ko wal᷊inge. 10Arawe kaul᷊i u taumata ko mo mukoa ko mapia sarung onggol᷊ang u kawawantughi l᷊au adati dang puwawiahi ko masuku bou Mawu Ruata, Kahimotongange su tau Yahudi, kere'e l᷊ai su manga taumata bangsa ko wal᷊inge. 11#Sau. 10:17Watu'u Mawu Ruata mukoa kaul᷊i u taumata musul᷊ung.

12Manga taumata bangsa ko wal᷊inge nubardosa ual᷊ingu wugha atorang u agama ngu Yahudi. Inau i sire ihukung su l᷊ikuru atorang e'e. Arawe tau Yahudi nubardosa seng tuwei matitong u atorang e'e; watu e'e i sire l᷊ai sarung tuntukang tumuhu atorang e'e. 13Watu'u taumata ko sau mutingkapia dingang u Mawu Ruata, wal᷊inge ual᷊ingu taumata e'e seng matitong u atorang u agama Yahudi, kateho ual᷊ing i sie mukoa apang ko kawawohe su l᷊al᷊ung u atorang e'e. 14Manga taumata bangsa ko wal᷊inge wugha atorang u agama Yahudi, kateho boko i sire mukoa apang ko niparenta ngu atorang e'e tumuhu kao i sire, naung i sire sisane ko muhukung si sire, maneng i sire wugha atorang u agama Yahudi. 15Kakanoa i sire nul᷊ahe himoneu apang ko niparenta ngu atorang e'e nawohe su naung i sire. Naung i sire l᷊ai mupakal᷊ahe hal᷊i e'e, watu'u i sire e'e tahaghisa ipunsal᷊a dang tahaghisa ipuhino ngu sipirang i sire. 16Kere'e sarung mariadi su l᷊ou ko seng nitantu e'e. Su l᷊ou e'e – Kere su Habari Mapia ko seng daku nihabari – Mawu Ruata bou I Yesus Kristus sarung muhukung kaul᷊i u l᷊al᷊ung u naung l᷊au sipirang u kaul᷊i u taumata.

Taumata ngu Yahudi l᷊au atorang u Agama Yahudi

17Arawe orasi i'i kirapa si kumu manga ana u simbau i kumu mangaku watangeng i kumu tau Yahudi. I kumu muhinggo atorang u agama Yahudi dang i kumu mangoboti u pukakauhi kumu dingang Mawu Ruata. 18I kumu seng nakahombang manga tatibo bou atorang e'e, hakiu i kumu matitong u kao u Mawu Ruata dang matitong manantu ko sude mapia. 19I kumu mangaking u ko i kumu pangaha u tau ko wuta dingang munggile u kasasua si sire ko su l᷊al᷊ung u karararundung. 20I kumu manintiro manga taumata ko lulu ngi sire makamea dang nakoa meteri sire apang ko bodoki. I kumu mangaking himoneu su l᷊al᷊ung u atorang u agama Yahudi, i kumu pia kapapande su tintiro ko nuhino. 21I kumu manintiro taumata ko wal᷊inge, arawe i kumu ta manintiro watangengu sisane? I kumu manintiro taumata tadeau kumbahang manako, kateho i kumu l᷊ai mang manako. 22I kumu manintiro taumata kumbahang mawuang, kateho i kumu l᷊ai nawuang! I kumu mubinsi barhala kateho i kumu l᷊ai mangal᷊a manga rarotong bou wal᷊e ngu barhala. 23I kumu mangoboti u pia atorang i Musa, kateho i kumu muhinakang Mawu Ruata dang ta tumuhu atorang-E. 24#Yes. 52:5Su l᷊al᷊ung u Buki Susi pia mawawohe kiri'i, “Watu'u i kumu tau Yahudi, kuteu areng u Mawu Ruata ipakaral᷊ai i kumu su tal᷊oara u manga bangsa ko wal᷊inge.”

25Boko i kumu ta tumuhu su atorang u agama ngu Yahudi, kuteu sunati kumu pia l᷊ai gunange. Arawe boko i kumu ta tumuhu apang hal᷊i ko niparenta su l᷊al᷊ung u atorang e'e, kuteu sunati kumu e'e tingari takoae mangal᷊enge. 26Boko singkatau ko wal᷊inge tau Yahudi ko ta nisunati, tumuhu agama ngu Yahudi, wal᷊ingewe Mawu Ruata seng nundekeng u taumata e'e kere seng nisunati? 27Dang manga taumata ko ta nisunati e'e sarung mupunsal᷊a ngi kumu tau Yahudi, watu'u i kumu agama Yahudi dang i kumu mbuae nisunati, kateho i kumu l᷊umawang atorang e'e. I sire ta nisunati, kateho seng i sire ko tumuhu atorang u agama Yahudi e'e. 28Watu'u tau Yahudi tutunge wal᷊inge taumata kitang arenge tau Yahudi, dang taumata ko tinga-tingari mbuae nisunati wal᷊inge kitang nisunati su l᷊ikuri. 29#Sau. 30:6Su l᷊ikuri e'e, singkatau Yahudi kahingang i sie ko taumata pia naung u tau Yahudi, dang sunati tutunge e'e ko sunati su l᷊al᷊ung u naung ko nihal᷊ikang u Roh u Mawu Ruata, wal᷊ingewe niwohe su l᷊al᷊ung u buki. Taumata kere'e manarima dadalo bou Mawu Ruata wal᷊inge bou taumata.

Currently Selected:

ROMA 2: PLT

Highlight

Copy