ROMA 1

1Kaul᷊i u ana u simbau su Roma ko ikukindaghi u Mawu Ruata dang ko seng nikuing u Mawu Ruata tadeau makoa umati-E.

Mawu Ruata namile dang nuhengke u ia nitantu guna ngu puhabari Habari Mapia bou Mawu Ruata. 2Habari Mapia e'e seng tuwei nipudiandi ngu Mawu Ruata mborong bou tempo tamai su pul᷊ahal᷊i u manga nabi-E dang seng mawawohe su l᷊al᷊ung u Buki Susi. 3Habari Mapia e'e ko hal᷊i u Ahusi Mawu Ruata, Mawu ngi kite I Yesus Kristus. Kere taumata I Sie ko hintou ngi Daud, 4arawe kere Roh-E I Sie nal᷊ahe ko Ahusi Mawu Ruata. E'e nal᷊ahe dingang u kawasa ko takoae sihinge su l᷊al᷊ung u puwawangung-E bou papate. 5Bo I Sie l᷊ai Mawu Ruata nunggile l᷊aonggo si sia pakakoa rasuli, tadeau ia – guna ngu mangadati si Kristus – mangaha apang taumata bou kaul᷊i u bangsa tadeau mangimang l᷊au matuhu. 6Mangal᷊eng u kaul᷊i u bangsa su si'i e'e ko i kumu l᷊ai ko natana su Roma; i kumu l᷊ai seng nikuiang tadeau mariadi umati Yesus Kristus. 7E'e sabapie ia nanurati si kumu mal᷊umbako Mawu Ruata I Yamang i kite l᷊au I Yesus Kristus mangonggo u al᷊amati l᷊au purarame si kumu.

Kal᷊iomaneng tatarima kase

8Kahimotongange su l᷊al᷊ung I Yesus Kristus, ia mutarimakase su Mawu Ruata watu'u manga ana u simbau kaul᷊ie, bou kal᷊abo u dunia seng nakaringihi himoneu i kumu nangimang kahingang si Kristus. 9Ia sintinia mang mutinaung si kumu boko ia mukal᷊iomaneng. Mawu Ruata saksie himoneu apang ko daku niul᷊i e'e tingari. I Sie Mawu Ruata ko daku nital᷊ungang dingang kal᷊abo u naungku muhabari Habari Mapia bou hal᷊i u Ahus-E. 10Ia mundo su Mawu, kere wotonge I Sie orasi i'i mupakawala ngu ia mutiwo si kumu. 11Watu'u ia mo kahingang musombang i kumu tadeau mupahia u l᷊aonggo u Roh u Mawu Ruata dingang i kumu guna ngu mupakatoghasi si kumu. 12Pandungku watu i kite seng l᷊awo mangimang si Yesus Kristus, kuteu i kite botonge mupapangonggo u katatoghasi.

13 # Wuk. 19:21 Manga ana u simbau! Ia mo tadeau i kumu matitong himoneu ia seng masau kahingang pia kaoku mutiwo si kumu katewe sintinia mang pia alangange. Ia mo tadeau hal᷊iku mang pia gunange su manga tampa ko wal᷊inge su tal᷊oara u manga taumata ko wal᷊inge taumata ngu Yahudi. 14Watu'u seng nakoa hal᷊iku mutangkiang kaul᷊i u umati: ko seng matitong u atorang l᷊au ko mborong wugha ngu atorang, ko pia sikol᷊ange dingang ko takoae sikol᷊ange. 15E'e sabapie ia mo muhabari Habari Mapia e'e l᷊ai si kumu ko natana su Roma.

Kawasa ngu Habari Mapia e'e

16 # Mrk. 8:38 Ia mangimang kahingang su Habari Mapia e'e; watu'u Habari e'e ko katatoghasi u Mawu Ruata guna ngu panal᷊amati kaul᷊i u manga taumata ko mangimang kahimotongange tau Yahudi, dang l᷊ai bangsa ko wal᷊inge. 17#Hab. 2:4Watu'u dingang u Habari Mapia e'e Mawu Ruata manibo kirapa l᷊al᷊enge tadeau pukakauhi u taumata dingang u Mawu Ruata sau makoa ko mapia; l᷊al᷊enge ko mangimang su Mawu Ruata, bou titae sarang panginsuenge. E'e musul᷊ung kere kawawohe su l᷊al᷊ung u Buki Susi, “Taumata ko mangimang su Mawu Ruata sarang pukakauhi dingang u Mawu Ruata sau makoa ko mapia, taumata e'e sarung muwiahi.”#1:17: Taumata ko mangimang … taumata e'e sarung muwiahi: arako taumata ko pukakauhange dingang u Mawu Ruata sau nakoa ko mapia; sarung muwiahi ual᷊ingu pangangimange.

Pusansal᷊a ngu taumata

18Bou sorga Mawu Ruata nangandaghi u wawal᷊uang-E su kaul᷊i u dosa l᷊au kal᷊al᷊ai u taumata, watu'u kal᷊al᷊ai e'e muhumping taumata mundea tintiro ko nuhino hal᷊i u Mawu Ruata. 19Apang ko ikatitonang u taumata hal᷊i u Mawu Ruata seng mal᷊ahe su l᷊al᷊ung u naung u taumata, watu'u Mawu Ruata sisane seng nupakal᷊ahe u e'e su taumata. 20Mborong bou titae Mawu Ruata nukoa dunia, apang kakakoa u Mawu Ruata ko ta ikawua, mangal᷊enge kakakoa-E kere Mawu Ruata l᷊au kawasang-E sarang kal᷊iwuenge seng kahinganeng u taumata bou apang ko seng nariadi. Inau taumata takoae alasange sarang singkodo mupuhino ngu watangenge. 21#Ef. 4:17-18Taumata matitong u Mawu Ruata, kateho taumata ta mangadati si Sie kere Mawu Ruata dang l᷊ai ta mutarimakase si Sie. Arawe taumata musipiri apang ko takoae gunange; naung i sire seng narundung. 22I sire mupundang u watangenge ko pande, sumbal᷊i i sire ko bodoki. 23#Sau. 4:16-18Wal᷊ingewe Mawu Ruata ko kakal ko isumba ngi sire, kateho manga patong ko musul᷊ung ko niriadi ko mate; kere taumata, burung, binatang l᷊aeri pa, l᷊au binatang ko tutondo.

24Ual᷊ingu e'e Mawu Ruata namala ngi sire pakikawasa su kao u naung i sire pukoa ko dal᷊ai, hakiu i sire mukoa hal᷊i ko l᷊amuhu su tal᷊oara i sire l᷊au i sire. 25Mawu Ruata ko tingari, nighanti ngi sire dingang mahang mawu. Wal᷊inge ko Nundiadi kateho ko nikoa e'e isumba dingang tal᷊ungang i sire. Sumbal᷊i ko nundiadi e'e hinonge idalo sarang panginsuenge! Aming.

26Ual᷊ingu taumata nukoa ko kere'e, kuteu Mawu Ruata namala ngi sire patuhu kao i sire ko dal᷊ai. Manga kowawine ngi sire l᷊ai ta kawinsanang u manga ko ese kere'e narange su taumata, kateho mainging su sinsul᷊ungu kowawine. 27Manga ko ese l᷊ai kere'e; i sire seng ta mutatamba badang dingang kowawine, kateho mawirahi su sinsul᷊ung kaul᷊i u ko ese. Hakiu i sire manarima wawal᷊isi tumuhu kakanoa i sire ko dal᷊ai e'e.

28Watu'u taumata mupundang ta wahal᷊uasu matitong u Mawu Ruata, kuteu Mawu Ruata namala ngu sipirang i sire kararusange, hakiu i sire mukoa kaul᷊i u haghi ko ta mutatahino. 29Naung i sire napene ko dal᷊ai, ko ta nuhino, napene u anggang, sipirang mabuhu dang napene u sudu, kao mamate, mukakoka, mul᷊eo dang masaki naung. I sire makihaghi musampuhi u taumata ko wal᷊inge, 30makihaghi mupakadal᷊ai areng u taumata ko wal᷊inge; i sire maoboti dang kurangajari, ko mubinsi u Mawu Ruata#1:30: kurangajari, ko mubinsi u Mawu Ruata: arako kurangajari, dang mubinsi u Mawu Ruata. dang makihaghi mudidato ko mal᷊ana. I sire pande mundea akal᷊i ko wuhu tadeau mukoa ko dal᷊ai. I sire mundoka taumata ko maghurang; 31I sire tawe mo manarima taumata ko wal᷊inge; i sire masukung dang takoae kakindaghi su taumata. 32I sire matitong, himoneu su l᷊al᷊ung u atorang u Mawu Ruata, taumata ko mukoa kaul᷊ie e'e hinonge ihukung pakapate. Kateho maning kere'e i sire mang mukoa l᷊ai haghi ngu hal᷊i e'e mborong l᷊ai mamala ngu taumata ko wal᷊inge pukoa e'e.

Currently Selected:

ROMA 1: PLT

Highlight

Copy