REKENANG 9
9
Sal᷊iwang u Paska karuange
1 #
Sasu. 12:1-13
Su wul᷊ang himotonge su l᷊al᷊ung u taung karuange suapang bangsa Israel bou nanintang u Mesir, Mawu nuhengetang si Musa su tana l᷊inggi ngu Sinai. Angkung u Mawu, 2-3“Su tanggali mapul᷊opa wul᷊ang i'i, manita orasi matangutiti sumira, tau Israel mambeng mupakawantughi Paska tumuhu atorang ko seng nitantu.” 4Kuteu i Musa nundoi bangsa Israel pupakawantughi Paska. 5I sire nupakawantughi su tana l᷊inggi ngu Sinai su wawul᷊aeng u tanggali mapul᷊opa wul᷊ang himotonge, kaul᷊ie e'e nikoa i sire nahino kere ko niparenta ngu Mawu si Musa.
6Kateho su tal᷊oara i sire pia pirangkatau taumata ko mal᷊amuhu watu'u seng nanuhung badang u tau ko nate, hakiu ta botonge mupakawantughi Paska su l᷊ou e'e. I sire e'e natamai tumatingo si Musa dingang i Harun 7dang nangul᷊i, “I kami i'i nal᷊amuhu watu'u seng nakasuhung u badang u tau ko nate. Kateho nakurawe i kami mambeng iputatintang hakiu ta botonge i kami makapanumba ngu korbang sarang koa u Mawu singkahindo dingang u manga ana u simbau i kami?”
8I Musa nusumimbahi, “Pangampal᷊i horo sarang ia manarima tal᷊ara bou Mawu.”
9 Mawu nundoi si Musa 10puhabari su bangsa Israel, “Boko su tal᷊oara ngi kumu arako hintou i kumu pia ko mal᷊amuhu watu'u seng nakasuhung badang u taumata nate arako su l᷊al᷊ung u l᷊al᷊engang marau, i sie l᷊ai mambeng mupakawantughi Paska guna ngu Mawu. 11Kateho sal᷊iwang e'e mambeng koateng simbul᷊ang tuhue, e'e ko su huwi ngu tanggali mapul᷊opa su l᷊al᷊ung u wul᷊ang karuange. Wantughiko l᷊ou e'e dingang kumina u domba Paska dang boroti ko takoae kaboe l᷊au duku mapai. 12#Sasu. 12:46; Yoh. 19:36Kumbahang manintang u manga apa bou kang e'e sarang dol᷊ou mal᷊ukari, dang kumbahang mamare sarang simbau bou duhi ngu binatang ko isumba si Sia. Wantughiko Paska e'e tumuhu dingang u patiku atorange.
13Su simbuka ngu e'e taumata ko ta nal᷊amuhu dang ta l᷊ai su l᷊al᷊ung u l᷊al᷊al᷊engang, kateho malasi mamantughi Paska, ta Daku irekeng l᷊ai kere singkatau bou umati-Ku, watu'u i sie ta manumba ngu korbang si Sia su tempo ko nitantu. Taumata e'e mambeng mananggong l᷊uang u dosange.
14Kamangkeng su tal᷊oara i kumu pia singkatau raghi, ko mo mamantughi Paska, i sie mambeng mamantughi tumuhu su kaul᷊i u atorang dang pananatapi. Tita e'e makoa guna ngu apang taumata, maning tau Israel l᷊ai tau raghi.”
Winawa ko suminang
(Sasu. 40:34-38)
15-16Su l᷊ou ngu Kema ngu Mawu nipararisi, nasongote winawa dang nanaka Kema e'e. Su tempo huwi sarang mal᷊ukari winawa e'e nikawua musul᷊ung u putung. 17Sintinia winawa e'e mawi, tau Israel namongkari pukakemang i sire, bou e'e nuwua. Dang suapang winawa e'e l᷊umintu su tampa e'e i sire sau mukema. 18Su parenta ngu Mawu bangsa Israel e'e namongkari Kema dang su parenta ngu Mawu l᷊ai i sire sau namasi. Salama ngu winawa e'e ene su wawo u Kema ngu Mawu, i sire tatapi matana su tampa e'e. 19Kamangkeng winawa e'e mal᷊iwue ene su wawo u Kema e'e, i sire mararingihi su atorang u Mawu dang ta muwua bou tampa e'e. 20Kateho tahaghisa kitang pira l᷊ou l᷊ai winawa e'e ene su wawo u Kema e'e, maneng kirapa l᷊ai, mang parenta ngu Mawu ko nanantu si sire matana su simbau tampa arako muwua. 21Tahaghisa winawa e'e kitang matana bou wawul᷊aeng sarang mal᷊ukari, dang su tempo winawa e'e mawi mal᷊ukari, i sire l᷊ai muwua. Kere'e l᷊ai su tempo sude winawa e'e mawi, maning l᷊ou arako huwi i sire muwua. 22Salama ngu winawa e'e ene su wawo u Kema ngu Mawu, maning l᷊iwuenge dua l᷊ou, simbul᷊ang, sintaung arako lebe, su kal᷊iwueng u e'e l᷊ai i sire matana su tampa e'e. Kamangkeng winawa e'e maawi, wuhue i sire muwua. 23I sire matana su simbau tampa dang muwua sarang tampa ko wal᷊inge tumuhu su parenta ngu Mawu ko nionggo u Mawu si Musa.
Currently Selected:
REKENANG 9: PLT
Highlight
Copy
Compare
Share
Want to have your highlights saved across all your devices? Sign up or sign in
