REKENANG 11
11
Tampa ko isigho Tabera
1Pia su silou bangsa e'e nanita nukarubu su Mawu watu'u manga kababuha i sire. Nakaringihi manga karubu e'e, Mawu nuwawal᷊uang dang nupasongo ngu putung si sire. Putung e'e nurumaki su tal᷊oara i sire dang nakatutung simbageang bou pukakemang. 2Apang taumata e'e kapahungkihae mundo tul᷊ung si Musa. Bou e'e i Musa nukal᷊iomaneng su Mawu, kuteu nate putung e'e. 3Watu'u hombang nariadi e'e, tampa e'e nisigho Tabera,#11:3: Tabera: Areng i'i tingihie musul᷊ung didato Ibrani ko mangal᷊enge “manutung”. ual᷊ingu su se'e putung u Mawu nurumilou su tal᷊oara i sire.
I Musa namile pangaha pitumpul᷊o su kataunge
4Su l᷊al᷊ung l᷊al᷊al᷊engang manga tau Israel e'e pia l᷊ai tau manga raghi ko nutumuhu. I sire e'e mo kahingang kumina u ghisi dang tau Israel l᷊ai nanita nukarubu. Angkung i sire, “Kidongki pia daging guna ngi kite! 5I kite makatinaung pia kina ko kinaseng i kite ta mamaehi su Mesir, katimu, bialung, prei, lansuna mahamu dang lansuna mawira! 6Orasi i'i i kite nikasueng uha ual᷊ingu takoae kang su l᷊ikuri manna ko nikawua ngi kite.”
7 #
Sasu. 16:31 Ghahi u manna e'e kere manga watu ko dadio, ghahie mawira mubawa ririhi. 8-9#Sasu. 16:13-15 Su tempo ngu huwi manna e'e nanawo singkahindo u namuhi su tampa pukakemang. Mal᷊uka-l᷊ukari manga taumata l᷊umal᷊eng tamai namai guna ngu mangomol᷊i, bou e'e munggiling arako mul᷊unta mariadi tapong dang mukoa mariadi kukisi mal᷊imbong manipi. Temange kere kukisi ko nitongka dingang u l᷊ana zaitung.
10I Musa nakaringihi manga taumata Israel nukarubu, apiru nurumarisi nahia u komol᷊ange su mohong u tukari kema ngi sire. Bou e'e nasongkahi wawal᷊uang u Mawu hakiu i Musa nakapundang nasusa. 11Kuteu nangul᷊ie i sie su Mawu, “Nakurawe I Kau nupakasusa ngu ia kiri'i? Nakurawe I Kau ta mal᷊uasi si sia? Nakurawe I Kau nanarakang tanggongang kaul᷊i u taumata e'e si sia? 12Apa ia pia kal᷊uwaenge arako nahinding i sire? Nakurawe I Kau nundoi si sia nakoa kere singkatau mundadiaga ko manaruru ana ko dio, hakiu ia mambeng muhiking si sire turusi su kanandu l᷊al᷊al᷊engang sarang tana ko nidiandi-U si upung i sire? 13Tuhungeko, i sire mutuosi mundo daging. Dang su apawe ia mambeng mundea daging guna ngu kaul᷊i u taumata e'e? 14Ta makatanggong ia mamikul᷊i tanggongang kiri'i kal᷊aboe, tumaniu mabuha hal᷊i e'e si sia! 15Kamangkeng Mawu turusi mukoa si sia kiri'i, kindaghiteko ia; mapiang ia ipate pakaehong tadeau ia ta l᷊ai mananggong kasasusa i'i.”
16Bou e'e nuhengetangte Mawu si Musa, “Komol᷊iko bou tal᷊oara u bangsa Israel pitumpul᷊o taumata maghaghurang ko niaku kere pangaha u bangsa. Wawako i sire sarang saruang-Ku su l᷊al᷊ung u Kema-Ku, bou e'e roiko i sire pararisi su se'e su sindihangu. 17Ia sarung l᷊umintu dang mudidato dingang i kau su tampa e'e, dang simbahageang bou kawasa ko seng Daku nionggo si kau sarung Daku ionggo si sire. Kuteu botonge i sire musumbala si kau mamikul᷊i tanggongang su bangsa i'i, dang tahawal᷊uasi i kau mamikul᷊i sisanengu. 18Orasi i'i ul᷊iko i'i su bangsa e'e: Pakasusiko watangengu guna ngu dol᷊ou; i kumu sarung kumina daging. Mawu seng nakaringihi si kumu simangi dang nukarubu watu'u i kumu mo kumina daging, dang watu'u hombang i kumu nangilembo kapiange tempo su Mesir. Orasi i'i Mawu sarung mangonggo u daging si kumu, dang i kumu botonge makakang. 19I kumu sarung kumang e'e wal᷊inge kitang silou, arako dua l᷊ou, arako l᷊ima l᷊ou, arako mapul᷊o l᷊ou, arako l᷊ai wal᷊inge kitang duampul᷊o su l᷊ounge, 20kateho simbul᷊ang l᷊iwuenge, i kumu kumang e'e, sarang i kumu masaki dang mutahasasuka ual᷊ingu e'e. Hal᷊i e'e nariadi watu'u i kumu seng musunial᷊i Mawu ko ene su tal᷊oara i kumu. Dang l᷊ai watu'u i kumu seng nusumangi su saruang-E dang nukarubu watu'u i kumu seng nanintang u tana Mesir.”
21Bou e'e i Musa nangul᷊i su Mawu, “Bangsa ko daku ahakeng i'i ul᷊ie nunguhasusuhiwu su kataunge. Kirapa I Kau botonge muhabari watu'u I Kau sarung mangonggo si sire daging su kitae simbul᷊ang l᷊iwuenge? 22Su apa pia sapi dang domba kere'e kaul᷊ie ko mambeng hatang guna ngu mupakal᷊aeri sire? Apa ko kaul᷊i u kina su l᷊auri makasuku guna ngu ionggo kang si sire?”
23Angkung u Mawu, “Apa kawasa-Ku pia kitae? I kau sarung maehong makawua kirapa ko Daku nihabari e'e tingari mariadi arako ta!”
24Inau nusumuwangte i Musa dang niul᷊ie su bangsa e'e apang ko seng niul᷊i u Mawu. I Musa nangomol᷊i pitumpul᷊o pangaha dang nundoi si sire pararisi su kaul᷊i u sindihang u Kema ngu Mawu. 25Bou e'e Mawu l᷊imintu su l᷊al᷊ung u winawa dang nuhengetang si Musa. Mawu nangal᷊a simbahageang bou kawasa ko seng nionggo-E si Musa dang nionggo-E su pitumpul᷊o pangaha e'e. Suapang Roh u Mawu e'e nanawo si sire, nanitae i sire nunggo kere nabi, kateho ta nal᷊iwue.
26Dua ngkatau bou tal᷊oara i sire pitumpul᷊o pangaha e'e, i Eldad dang i Medad, natana su pukakemang dang ta natamai nahundingang ko wal᷊inge sarang Kema ngu Mawu. Su pukakemang e'e Roh nuruminta si sire, dang i sire rua l᷊ai nanita nunggo musul᷊ung u nabi. 27Bou e'e singkatau umbaseng timal᷊ang sumuwang guna ngu mupakatitong si Musa apang ko seng nariadi si Eldad dang si Medad.
28I Yosua ana i Nun, ko seng musumbala si Musa mangkeng tempo umbaseng nangul᷊i si Musa, “Roite i sire pangiro, Pa!”
29I Musa simimbahi, nakurawe i kau mupikiri u ia? Ia katewe muharapi tadeau Mawu mangonggo Roh-E su kaul᷊i u bangsa-E, dang mukoa si sire kaul᷊i u nabi! 30Bou e'e i Musa nusul᷊e sarang pukakemang nahundingang u pitumpul᷊o su kataunge pangaha u Israel e'e.
Mawu nupasongo ngu burung puyu
31Singkahuwi Mawu nupasongo ngu anging bou l᷊auri; anging e'e numbawa manga burung puyu ko nutumila masana kahingang sarang simeteri bou wawo u tana. I sire kapuhuntilae su wawo u pukakemang e'e sarang karaunge manga pirang kilo su kaul᷊i u sindihange. 32Su kanandu u l᷊ou e'e, su kanandu huwi dang su kanandu u l᷊ou tuhue, manga taumata nawirahi maname burung puyu. Apang taumata maname mutingkasingkodo sihiwu su kilonge. Manga burung e'e nikeke ngi sire su kaul᷊i u sindihang u pukakemang tadeau pakahango. 33Su tempo ngu borong pia maul᷊i daging guna ngu kinaseng, Mawu nuwawal᷊uang su bangsa e'e dang nupasongo ngu simbau sahinda su tal᷊oara i sire. 34Kuteu tampa e'e nisigho “Kubul᷊i u kal᷊aanggang”, watu'u se'e nil᷊uwing manga taumata ko nate ngu anggang.
35Bou e'e bangsa e'e nangal᷊ing sarang tampa Hazerot, buhue nukema su tampa e'e.
Currently Selected:
REKENANG 11: PLT
Highlight
Copy
Compare
Share
Want to have your highlights saved across all your devices? Sign up or sign in
