MALEAKHI 2

1 Mawu Ko Makawasa nuhengetang su manga imam, “Ko i'i parenta-Ku si kumu: 2Pangadatiko si Sia dingang u kakanoau. Boko i kumu mandi mundaringihi hengetang-Ku, i kumu sarung Daku ikutoki. Apang ko nitarima i kumu kere al᷊amati sarung muwal᷊u makoa kutoki. Tingari, kaul᷊ie ko mapia e'e seng Daku nikutoki, ual᷊ing i kumu ta nangindakang parenta-Ku. 3Manga ana i kumu sarung Daku ihukung, dang pahesi kumu Daku wuhang u l᷊amuhu u binatang ko seng nisumba ngi kumu, dang i kumu sarung ihiuri sarang ambung u l᷊amuhu. 4#Rek. 3:11-13 Kuteu i kumu makatitong himoneu parenta i'i seng Daku nionggo, tadeau pudadiandi-Ku dingang u manga imam, hintou ngi Lewi, tatapi mariadi.

5 # Rek. 25:12 Su l᷊al᷊ung u pudadiandi e'e Ia nudiandi si sire wiahi ko matatapi l᷊au ko mapia, dang i sire Daku niroi tadeau pangadati si Sia. Su tempo e'e i sire mangadati si Sia dang mataku si Sia. 6I sire manintiro ko nuhino, dang wal᷊inge ko nunsal᷊a. I sire masandighi dingang-Ku, dang dingang matul᷊iri nutumuhu kao-Ku. I sire l᷊ai nutul᷊ung taumata maul᷊i tadeau seng ta l᷊ai mukoa ko dal᷊ai. 7Mang tingari hal᷊i u manga imam manintiro ko nuhino hal᷊i u Ia, Mawu Ko Karangetange. Ko si sire ana u kawanua mambeng makina apa kao-Ku, ual᷊ing i sire ko manga raroi-Ku.

8Kateho orasi i'i, i kumu, manga imam, seng nul᷊enga bou l᷊al᷊eng ko nuhino. Manga tatintiro ngi kumu seng nuhiuri taumata maul᷊i tadeau pukoa ko nunsal᷊a. I kumu seng nundusa pudadiandi ko Daku nikoa dingang i kumu. 9Kuteu Ia l᷊ai sarung mukoa si kumu ipakasana u umati Israel ual᷊ing i kumu ta nutumuhu kao-Ku, dang ual᷊ing i kumu kitang mamile ngu taumata su tempo nanintiro umati-Ku.”

Ana u kawanua ta masatia su Mawu Ruata

10Wal᷊ingewe i kite kaul᷊ie pia I Yamang ko musul᷊ung? Wal᷊ingewe i kite kaul᷊ie niriadi ngu Mawu Ruata ko musul᷊ung? Boko kere'e, nakurawe i kite kaul᷊ie nusunial᷊i u diandi dang dingang kere'e nusunial᷊i u pudadiandi ko nikoa u Mawu Ruata dingang u manga i upung i kite? 11Umati Yehuda seng ta nutumuhu pudadiandi ngu Mawu Ruata dingang i sire dang nukoa manga hal᷊i ko makatataku su Yerusalem dang su kaul᷊i u wanua. I sire seng nupakal᷊amuhu Wal᷊e ngu Mawu ko ikukindaghi i sire, dang nukawing dingang u manga kowawine ko manumba manga dewa ngu bangsa ko wal᷊inge. 12Kere botonge manga taumata ko nukoa kere'e i pakaghea ngu Mawu bou umati Israel. Kere botonge i sire seng ta l᷊ai mutumuhu dingang u bangsa ngi kite manumba ngu manga korbang su Mawu Ko Makawasa.#2:12: Tumuhu simbau salenang ko tuwei: Mal᷊umbako … Ko Makawasa.

13Dang i'i kakanoa i kumu ko wal᷊inge. Mesba ngu Mawu nipakananta i kumu dingang u ake u mata; i kumu nusumangi dang numpal᷊ehe ual᷊ingu Mawu seng mandi l᷊ai manarima manga korbang i kumu. 14I kumu nakina nakurawe I Sie mandi manarima. Ual᷊ingu Mawu matitong i kumu ta masatia su kowawine ko nipukawingang i kumu su tempo ngi kumu makuda. Ko wawine e'e ko ghaweu su puwawiahiu, kateho i kumu seng nusingking si sie, maneng su saruang u Mawu Ruata i kau seng nudiandi tatapi masatia si Sie. 15Wal᷊ingewe Mawu Ruata Ko Mang Simbau nukoa si kumu badang simbau l᷊au naung simbau dingang kowawine e'e?#2:15: Wal᷊ingewe … kowawine e'e: Botonge mariadi e'e mangal᷊enge. Apa pandung u Mawu dingang u e'e? Takoae ko wal᷊inge kitang tadeau i kumu makarea manga ana ko makoa umati Mawu Ruata tutunge. Inau diagateko watangeng i kumu, kumbahang sarang pia su tal᷊oara i kumu ko ta masatia su kawinge. 16“Ia mubinsi u pusasindo,” hengetang u Mawu Ruata ngu Israel. “Ia mabunsing boko singkatau bo i kumu mukoa ko kere'e katingkaie su kawinge. Kuteu diagateko watangengu dang kumbahang kahingang-hingang musingking su kawingu.”

L᷊ou pamamonesi seng masandighi

17I kumu nakakoa Mawu nasahe dingang u didato ngi kumu. Kateho i kumu nakina, “Kirapa i kami sarang nakakoa Mawu nasahe?” Dingang nangul᷊i, “Kaul᷊i u taumata nukoa ko dal᷊ai ituhungang u Mawu mapia, dang I Sie nupahumbang si sire.” Arako dingang nakina, “Su apa Mawu ko ituhungang maadili e'e?”

Currently Selected:

MALEAKHI 2: PLT

Highlight

Compare

Copy