IMAMAT 5

Kangereng korbang pangangampung dosange hinonge isumba?

1Korbang pangangampung u dosa hino ngu isumba: Boko singkatau seng nal᷊ahe ipundokang pangonggo u kasaksiang su pangadilang, kateho ta mangonggo pul᷊al᷊ahi hal᷊i u apang ko seng nikawua arako seng nikaringihie hakiu i sie mambeng mananggong sukenge.

2Boko singkatau nunsal᷊a ual᷊ingu ta niputaturi nakoa ko mal᷊amuhu, watu'u seng nanuhung barang ko mal᷊amuhu, umpamange bangke ngu binatang, dang samuringe nakapundang kakanoae.

3Boko singkatau nunsal᷊a ual᷊ingu ta niputaturi nakasuhung barang ko mal᷊amuhu ko asal᷊ie bou taumata, dang samuringe i sie nakapundang kakanoae.

4Boko singkatau nunsal᷊a ual᷊ingu asal᷊i kaputewange guna ngu mukoa manga apa, dang samuringe nakapundang kakanoae.

5Su l᷊al᷊ung u apang parkara e'e, taumata ko nunsal᷊a mambeng mangaku ngu pusansal᷊ae. 6Dang guna ngu manubusi dosange, i sie mambeng mumbawa simbau domba arako kambing kowawine guna ngu Mawu. Imam mambeng manarakang korbang e'e tadeau dosa ngu tau e'e iampungang.

7Kateho boko tau ko nunsal᷊a ta makaupili manadia domba arako kambing guna ngu manubusi dosange, i sie mambeng mumbawa burung tarkuku simpari arako burung paluma ko makuda, simbau guna ngu korbang pangangampung u dosa, dang simbau l᷊ai guna ngu korbang tongkateng. 8Manga burung e'e mambeng iwawa sarang koa u imam. Imam mambeng kahorokange mangonggo sasumba burung ko seng nitantu guna ngu korbang pangangampung u dosa. L᷊ehi u burung e'e mambeng ihata, kateho kumbahang sarang timboe mabusu. 9Daha ngu burung e'e mambeng ipamusi su sindihang u mesba, dang l᷊umbeinge ipuhu pasuwang su dasari u mesba guna ngu korbang pangangampung u dosa. 10Bou e'e imam mangonggo burung ko karuange guna ngu korbang tutungang, musul᷊ung dingang u atorang. Ko kere'e kakakoae imam mangonggo korbang guna ngu dosa ngu taumata e'e, kuteu i sie sarung iampungang u Mawu.

11Boko tau ko nunsal᷊a ta makaupili manadia burung tarkuku simpari arako burung paluma guna ngu korbang pangangampung u dosa, i sie mambeng mumbawa tapong singkilo. Tapong e'e ta botonge l᷊aukang u l᷊ana zaitung arako dingang u kamania, watu'u korbang e'e ko korbang pangangampung u dosa dang wal᷊inge korbang l᷊ahaghesi. 12Tapong e'e mambeng iwawa sarang koa u imam. Imam mambeng mangal᷊a singhangkung bou tapong e'e kere tatia himoneu kaul᷊i u e'e seng nikorbang su Mawu. Tapong ko singhangkung e'e mambeng itongka su wawo u mesba kere korbang kang. Ko e'e korbange guna ngu pangangampung u dosa. 13Ko kere'e kakakoae imam mangonggo korbang guna ngu dosa ngu tau e'e, kuteu i sie sarung iampungang u Mawu. L᷊ebe ngu tapong e'e ko bageang u imam, kere su korbang gandung.

Korbang ghaghanti ngu karugiang

14 Mawu nangonggo si Musa manga atorang i'i. 15Boko singkatau ta nutaturi nukoa dosa ual᷊ingu lale su l᷊al᷊ung u mangonggo manga sasumba ko nitantu u Mawu, kuteu tau e'e mambeng mumbawa korbang ghaghanti ngu karugiang. Korbang e'e mambeng simbau domba arako kambing ko ese ko takoae kurange, dang irekeng mutuhu hariga ko ipake su Kema ngu Mawu. 16Tau e'e mambeng mamaehi apa ko horo ta nisumpikange, tambang duampul᷊o porseng. Bou e'e i sie mambeng manarakang binatang e'e su imam, dang imam mangonggo sasumba e'e guna ngu dosa ngu tau e'e, kuteu i sie sarung iampungang u Mawu.

17Boko singkatau ta nutaturi nukoa dosa ual᷊ingu nul᷊umawang manga simbau parenta ngu Mawu, tau e'e nunsal᷊a dang mambeng mananggong sukenge. 18Guna ngu korbang ghaghanti ngu karugiang i sie mambeng mumbawa simbau domba arako kambing ko ese ko takoae kurange dang irekeng tumuhu hariga ko ipake su Kema ngu Mawu. Imam mangonggo sasumba e'e guna ngu dosa ngu tau e'e, kuteu i sie sarung iampungang u Mawu. 19Ko e'e korbang ghaghanti ngu karugiang guna ngu pusansal᷊a ko nikoae su saruang u Mawu.

Currently Selected:

IMAMAT 5: PLT

Highlight

Copy

Compare