IMAMAT 17

Atorang hal᷊i u daha

1 Mawu nangoro si Musa 2pangonggo manga atorang i'i si Harun, su manga anae dang su kaul᷊i u bangsa Israel. 3-4Boko singkatau bangsa Israel mangonggo sasumba sapi, domba arako kambing su Mawu, binatang e'e mambeng ihata su saruang u tukari Kema ngu Mawu. Boko i sie muhata su tampa ko wal᷊inge, i sie mul᷊umawang tita ual᷊ingu namungke ngu daha. I sie seng ta irekeng l᷊ai kere tataho u umati Mawu Ruata. 5Pandung parenta e'e tadeau bangsa ngu Israel mumbawa sarang Kema ngu Mawu kaul᷊i u binatang sasumba ko biasange ihata ngi sire su anseri. I sire mambeng mumbawa sasumba e'e sarang koa u imam su saruang u tukari Kema ngu Mawu dang muhata binatang e'e su se'e guna ngu korbang purarame. 6Imam mambeng maniwohi daha ngu binatang e'e su manga sindihang u mesba su saruang u tukari u Kema ngu Mawu bou e'e manongka tawae tadeau rarurue makal᷊uasi naung u Mawu. 7Bangsa Israel mambeng tatapi satia su Mawu dang ta woto-wotonge muhata binatang su manga anseri guna ngu sasumba su manga setang. Atorang i'i mambeng ituhukang sarang kal᷊iwuenge.

8Boko singkatau Israel arako singkatau raghi ko natana su tal᷊oara u tau Israel mangonggo korbang tutungang arako korbang ko wal᷊inge 9su Mawu, i sie mambeng mangonggo sasumba e'e su saruang u tukari Kema ngu Mawu. Boko i sie mangonggo sasumba e'e su tampa ko wal᷊inge, i sie seng ta botonge irekeng tataho u umati Mawu.

10 # Kar. 9:4; Im. 7:26-27, 19:26; Sau. 12:16, 23, 15:23 Boko singkatau Israel arako singkatau raghi ko natana su tal᷊oara u tau Israel manginung daha, i sie sarung ihukung u Mawu dang seng ta irekeng tataho u umati-E. 11#Ibr. 9:22Sasinda apang ko niriadi ene su l᷊al᷊ung u dahange. Ual᷊ingu e'e Mawu nuparenta tadeau kaul᷊i u daha pakisiwohi su wawo u mesba tadeau manga dosa ngu umati imu. Daha ko sasinda, mangumu dosa. 12Ko e'e sabapie bangsa Israel arako tau raghi ko natana su tal᷊oara i sire diagateng kumbahang manginung daha.

13Boko singkatau Israel arako singkatau raghi ko natana su tal᷊oara u bangsa Israel, maname burung arako binatang ko wal᷊inge ko tawe haram, i sie mambeng mupasuwang daha ngu binatang e'e dang mangambung dingang u tana. 14Sasinda apang ko niriadi ene su l᷊al᷊ung u dahange, watu'u e'e Mawu nudiaga kumbahang bangsa Israel manginung daha. Apang taumata ko mukoa kakanoa ko nidiagateng e'e seng ta irekeng tataho u umati Mawu.

15Apang tau Israel arako tau raghi ko kumina ghisi ngu binatang ko nate ngu naunge arako nate nitumbouang u binatang ko wawahani, mambeng mangunsa pakeange bou e'e mundeno dang mangampal᷊i sarang matangutiti sumira, mbuhue i sie makoa ko bursi. 16Boko i sie ta mukoa e'e, i sie mambeng mananggong sukenge.

Currently Selected:

IMAMAT 17: PLT

Highlight

Copy

Compare