SASUWANG 6

Mawu Ruata nukui si Musa

1Mawu Ruata nuhengetang si Musa, angkung-E, “Ko Ia Mawu. 2#Sasu. 3:13-15Ia nangandaghi watangengku si Abraham, si Ishak l᷊au si Yakub kere Mawu Ruata ko makawasa, kateho Ia ta nutingkaandaghi watangeng-Ku si sire dingang u areng u Mawu.#6:2: Mawu: Tuhunge 3:14. 3Ia l᷊ai nukoa pudadiandi dingang i sire. Ia mudiandi sarung mangonggo wanua ngu Kanaan si sire, tana tampa puwawiaheng i sire kere taumata raghi. 4Ia seng nakaringihi kahioro u taumata ngu Israel ko niputahul᷊ang u bangsa Mesir, bou e'e Ia mutinaung diandi-Ku e'e. 5Inau wohangko su bangsa Israel himoneu Ia mangul᷊i si sire: Ko Ia Mawu; i kumu sarung Daku ipakal᷊iu bou putahul᷊ang su bangsa Mesir. Ia sarung mangandaghi kawasa-Ku ko matoghasi guna ngu mupakasal᷊amati kumu dang mupakanawo u hukumang mabuha su bangsa Mesir. 6I kumu sarung Daku koateng umati-Ku, dang Ia makoa Mawu Ruata ngi kumu. Inau i kumu sarung matitong himoneu Ia i'i ko Mawu, Ruata ngi kumu, ko nul᷊iu ngi kumu bou putahul᷊ang su Mesir. 7I kumu sarung Daku wawaneng sarang tana ko Daku nipudiandi si Abraham, si Ishak l᷊au i Yakub su l᷊al᷊ung u tewa; tana e'e Daku ionggo si kumu makoa pusaka i kumu sisane. Ko Ia Mawu.” 8Kaul᷊i u tatanata ngu Mawu e'e nihabari i Musa su bangsa Israel kateho i sire ta nundaringihi si Musa, watu'u putatahul᷊ang ko kere'e kabuhae seng nakabusu pul᷊aharapi sire.

9Bou e'e Mawu nuhengetang si Musa, 10“Tamaiko pupatingo su ratu Mesir dang habariko tadeau i sire mambeng mupakawala ngu bangsa Israel manintang u wanuange.

11Kateho i Musa nusumimbahi, taumata ngu Israel sisane ta mundaringihi si sia. Apa masu su akal᷊i ratu Mesir mundaringihi taumata ko bodoki mangul᷊i kere ia?”

12Kere'e Mawu nundoi i Musa dingang i Harun tadeau pangul᷊i su bangsa Israel dang su ratu ngu Mesir himoneu i sire niparenta ngu Mawu pangaha bangsa Israel pasuwang bou Mesir.

Wuke hintou ngi Musa l᷊au i Harun

13Kiri'i wuke ngu hintou ngi Misa l᷊au i Harun: I Ruben ana ko iyakang i Yakub, pia anae ko ese sire pa: i Henokh, i Palu, i Hezron, dang i Karmi. I sire e'e i upung u manga ana u singkatau su l᷊al᷊ung u suku ngi Ruben. 14I Simeon dingang kawinge kowawine ngu Kanaan pia anae ko ese sire nung: I Yemuel, i Yamin, i Ohad, i Yakhin, i Zohar dang i Saul. I sire i upung u manga ana u singkatau su l᷊al᷊ung u suku ngi Simeon. 15I Lewi pia anae ko ese sire tilu: I Gerson, i Kehat l᷊au i Merari; I sire i upung u manga ana u singkatau su l᷊al᷊ung u suku ngi Lewi. I Lewi nakarating umurie mahasutilumpul᷊opitu su taunge. 16I Gerson pia anae ko ese darua: I Libni l᷊au i Simei; i sire pia hintounge maul᷊i. 17I Kehat pia anae ko ese sire pa: I Amram, i Yizhar, i Hebron l᷊au i Uziel. I Kehat nakarating umurie mahasutilumpul᷊otilu su taunge. 18I Merari pia anae ko ese darua: I Mahli l᷊au i Musi. E'e ko ana u singkatau su l᷊al᷊ung u suku ngi Lewi dingang nahia u hintou ngi sire.

19 # Rek. 3:17-20, 26:57-58; 1Taw. 6:16-19 I Amram nukawing dingang i Yokebet, tuari ngu wawine ngi papange dang manga ana i sire ko i Harun dingang i Musa. I Amram nuwiahi mahasutilumpul᷊opitu su taunge. 20I Yizhar pia anae ko ese tatilu: i Korah, i Nefeg dang i Zikhri. 21I Uziel l᷊ai pia anae ko ese tatilu: i Misael, i Elsafan dang i Sitri.

22I Harun nukawing dingang i Eliseba, ana i Aminadab; kowawine i Eliseba l᷊ai tamahuari dingang i Nahason. I Eliseba nahinding i Nadab, i Abihu, i Eleazar dang i Itamar. 23I Korah pia anae ko ese tatilu: i Asir, i Elkana dang i Abiasaf. I sire e'e ko i upung u manga ana u singkatau ngi Korah. 24I Eleazar, anae ko ese i Harun, nukawing dingang u singkatau bou tal᷊oara ana i Pitiel dang ana i sire ko i Pinehas. E'e Kaul᷊ie tumbonang ana u singkatau dang tumbonang ana u singkatau su l᷊al᷊ung u suku ngi Lewi.

25I Harun dingang i Musa e'e ko niparentang u Mawu nupasuwang bangsa Israel bou Mesir. 26I sire rua nupasaruang u ratu ngu Mesir tadeau i sie mamilo u taumata ngu Israel.

Mawu nangonggo u parenta si Musa l᷊au si Harun

27Su tempo ngu Mawu nuhengetang dingang i Musa su Mesir, 28Mawu nuhengetang, “Ia ko Mawu, ul᷊iko su ratu ngu Mesir kaul᷊i u apang ko seng Daku niul᷊i si kumu.”

29Kateho i Musa nusumimbahi, “Mawu, i Kau matitong himoneu ia ko bodoki mudidato. Apa mataho su akal᷊i ratu mo mundaringihi si sia?”

Currently Selected:

SASUWANG 6: PLT

Highlight

Copy

Compare