SASUWANG 5

I Musa l᷊au i Harun nutumatingo ratu ngu Mesir

1Tuhue i Musa l᷊au i Harun tamai nutumatingo ratu ngu Mesir dang nangul᷊i, “Kiri'i parenta ngu Mawu Ruata ngu Israel, ‘Pakawalako kawanua-Ku tamai tadeau i sire manumba si Sia su tana l᷊inggi.’ ”

2“Ko i sai Mawu e'e?” Kakina u ratu. “Nakurawe ia mambeng mupandung si Sie dang mupakawala bangsa Israel tamai? Ia wugha ngu Mawu e'e, dang taumata ngu Israel ta ipakawala matamai.”

3I Musa l᷊au i Harun nangul᷊i, “Mawu Ruata tau Ibrani seng nutingkaandaghi watangeng-E si kami. Pakawalako i kami matamai sarang tana l᷊inggi karaunge tilu l᷊ou l᷊al᷊engang guna ngu mumbawa sasumba su Mawu, Ruata ngi kami. Kamangkeng i kami ta mukoa e'e, i kami sarung ta ipakawala-E wiahi dingang mupasongo sahinda arako parang.”

4Angkung u ratu si Musa l᷊au si Harun, “Nakurawe i kumu nupakaalasi manga taumata e'e su hal᷊i i sire? Parentaiko manga l᷊ang e'e puhal᷊i! 5Manga taumata e'e seng tumaniu maul᷊i. Dang orasi i'i i kumu mo tadeau i sire mangiro muhal᷊i!”

6Su l᷊ou e'e l᷊ai manga mundadiaga bangsa Mesir dang manga mandori u bangsa Israel nakahombang parenta bou ratu, 7“Kumbahang l᷊ai mangonggo l᷊aesi u ruku mahango su bangsa e'e guna ngu dol᷊ou pukoateng u tela. Walate i sire tamai sisane pundea. 8Kateho parentaite i sire pukoa manga tela ta maghahing rekenange bou ko tamai horo. I sire kitang mo mutingkaalasi l᷊ai; e'e sabapie i sire turusi musughal᷊i tadeau ipakawala matamai mumbawa sasumba sarang Mawu Ruata ngi sire. 9Sihasako manga taumata e'e puhal᷊iko lebe mabuha tadeau i sire mubingo dingang u hal᷊i dang takoae tempo guna ngu mundaringihi wuke takoae mangal᷊enge.”

10Manga mundadiaga bangsa Mesir dang manga mandori u Israel e'e nusumuwang dang nangul᷊i su taumata ngu Israel, “Ratu nuparenta tadeau i kumu ta l᷊ai onggol᷊ang u l᷊aesi u rahami. 11I kumu sisane mambeng pundea suapang tampa, kateho tinaunge, tela ko koateng i kumu ta maghahing ul᷊ie bou ko tamai horo.” 12Bou e'e natamaite taumata ngu Israel mupakataung kaul᷊i u tana Mesir nangomol᷊i l᷊aesi u rahami ko mahango. 13Manga mundadiaga turusi mangosa tadeau sintinia l᷊ou i sire makapukoa tela ko musul᷊ung ul᷊ie kere su tempo ngi sire nionggol᷊ang l᷊aesi u rahami ko mahango. 14Manga mundadiaga e'e namukul᷊i manga mandori u Israel ko nipundiaga hal᷊i. I sire nukina, “Nakurawe orasi i'i bangsa ngu ta makakoa tela ko musul᷊ung ul᷊ie kere horo?”

15Bou e'e manga mandori u tau Israel natamai nupasaruang ratu dang makitul᷊ung, “Nakurawe i Tuangku mukoa kere'e si kami? 16I kami ta onggol᷊ang l᷊aesi u rahami ko mahango, kateho nisihasa pukoa tela! Tempo i'i i kami nipukul᷊i sumbal᷊i ko manga pagawai ngi Tuang nunsal᷊a!”

17Ratu nusumimbahi, “I kumu tingari malasi dang mandiri muhal᷊i. E'e sabapie i kumu mangilei si sia tadeau matamai mangonggo sasumba su Mawu ngi kumu. 18Dakoe sau puhal᷊i. L᷊aesi u rahami ko mahango seng ta sarung ionggo si kumu, kateho i kumu tatapi pukoa tela ko musul᷊ung ul᷊ie.” 19Manga mandori e'e nakapundang himoneu i sire su l᷊al᷊ung u kababuha suapang nikaul᷊ikang himoneu manga taumata ngu Israel mambeng makakoa tela ko tatapi ul᷊ie kere horo.

20Suapang i sire nasumuwang bou istana ngu ratu, i sire nusuma i Musa dingang i Harun ko seng tuwei kapangampal᷊i si sire. 21Angkung u manga mandori e'e, “Mawu matitong kakanoau! I Sie sarung muhukung i kumu! Ko i kumu nakakoa si kami nipubinsi u ratu dang manga pagawaie, hakiu i sire mo mamate si kami.”

I Musa mukahioro su Mawu

22Bou e'e i Musa sau nupasaruang Mawu dang nangul᷊i, “Mawu apa sabapie bangsa Israel ko koateng-U kere'e kal᷊al᷊aie? Nakurawe I Kau nundoi u ia sarang i'i? 23Su tempo ia nutumatingo ratu dang nudidato numbawa areng-U, i sie nanita nukabasara bangsa i'i. Dang I Kau ta mukoa manga apa guna ngu mutul᷊ung si sire.”

24Bou e'e Mawu nuhengetang si Musa, “Su tempo i'i i kau sarung makawua kirapa Ia marea u ratu. I sie sarung Daku isihasa pamilo u bangsa-Ku. Tinga-tingari i sie sarung Daku isihasa manguseri si sire bou wanua i'i.”

Currently Selected:

SASUWANG 5: PLT

Highlight

Copy

Compare