SASUWANG 3

Mawu Ruata nukui si Musa

1Su tempo e'e i Musa kapundiagae manga domba l᷊au manga kambing i Yitro, i emponge su tana Midian. Tempo e'e natarang i sie kapungahae binatang e'e sarang tana l᷊inggi, nuratingte i sie su Wul᷊uri u Sinai, wul᷊uri ko susi. 2#Wuk. 7:30-34Su se'e malaikati u Mawu nutingkaandaghi watangenge si sie su l᷊al᷊ung hena ngu putung ko sumuwang bou l᷊al᷊ung nggal᷊umue. I Musa nakawua nggal᷊umue e'e kahenange, kateho tawe natutung. 3“Makaherang kahingang,” su l᷊al᷊ung u naunge. “Nggal᷊umu e'e tawe natutung! Mapiang daku tuhungang pakasandighi.” 4Mawu nakawua si Musa kasandighie tampa e'e, bou e'e i sie nunggo bou l᷊al᷊ung u nggal᷊umu e'e, “Musa! Musa!”

“Ia ndaung si'i,” nisimbahi Musa.

5Bou e'e Mawu Ruata nuhengetang, “Kumbahang mutingkasandighi. L᷊uae l᷊aumping u l᷊aeriu, watu'u i kau kararisi su tana ko susi. 6Ia i'i ko Mawu Ruata ngi i upungu, Mawu Ruata ngi Abraham. I Ishak l᷊au i Yakub.” Kuteu i Musa nanaka pahesie, watu'u i sie mataku mutuhung Mawu Ruata.

7Bou e'e Mawu nuhengetang, “Ia seng nakawua kasasusa ngu umati-Ku su Mesir, dang seng nakaringihi kiha i sire mundo ipakal᷊iwiri bou manga taumata ko mangumpisi si sire. Tingari, ia matitong kaul᷊i u kasasusa ngi sire. 8Ual᷊ingu e'e Ia l᷊umintu guna ngu mupakal᷊iwiri sire bou l᷊ima ngu tau Mesir dang mumbawa si sire pasuwang bou wanua i'i mundol᷊ong simbau wanua ko mal᷊oahi. Tanae ko l᷊abo dang matawa, dang orasi i'i ko nikatanakeng u tau Kanaan, tau Het, Amori, Feris, Hewi dang Yebus. 9Sangi u tau Israel seng Daku nikaringihi, dang Daku nikawua l᷊ai kirapa i sire nihumpisang u tau Mesir. 10Orasi i'i i kau Daku iroi pupasaruang ratu ngu Mesir tadeau i kau botonge mupasuwang u kawanua-Ku bou wanua e'e.”

11Kateho i Musa nangul᷊i su Mawu Ruata, “Sai ia i'i, hakiu botonge makapupasaruang ratu dang mumbawa taumata ngu Israel sumuwang bou Mesir?”

12Mawu Ruata nusumimbahi, “Ia sarung mutul᷊ung i kau. Dang kamangkeng kawanua i'i seng niwawa u sumuwang bou Mesir, i kumu sarung manumba si Sia su wul᷊uri i'i. E'e tatia ngu himoneu ko Ia nundoi i kau.”

13 # Sas. 6:2-3 I Musa nusumimbahi, “Kateho bou ia musombang manga taumata ngu Israel dang mangul᷊i si sire: ‘Mawu Ruata i upungu nundoi si sia sarang koa i kumu,’ i sire nal᷊ahe sarung mukina, ‘I sai arenge?’ Bou e'e apa ko mambeng daku isimbahi si sire?”

14 # Kl᷊h. 1:4,8 Angkung u Mawu Ruata, “Ia ko IA ENE.#3:14: IA ENE: Tatahoe kere didato Ibrani “Yahweh” ko nisaleng dingang didato “Mawu”. I'i ko mambeng ihabariu su kawanua ngu Israel, I Sie ko isigho IA ENE, seng nundoi si sia sarang koa i kumu. 15Habari ko l᷊ai si sire himoneu Ia, Mawu, Ruata ngi i upung i sire, Mawu Ruata ngi Abraham, I Ishak dang I Yakub nundoi i kau sarang koa i sire. Ia ko Mawu, e'e ko areng-Ku sarang kal᷊iwuenge. E'e ko Daku isigho guna ngu kaul᷊i u bangsa mul᷊al᷊ahaweng. 16Dakoe dang komol᷊iko kaul᷊i u tumbonang u Israel. Wohangko si sire watu'u Ia, Mawu, Ruata ngi i upung i sire, Ruata ngi Abraham, i Ishak dang i Yakub, seng nutingkaandaghi watangeng-Ku si kau. Pakatitongte si sire watu'u Ia seng nasongo sarang koa i sire dang seng nakawua kirapa i sire koateng u bangsa Mesir. 17Seng Ia namutusi mumbawa si sire sumuwang bou Mesir, tampa i sire nitingkaitang dang mangunturi si sire sarang wanua simbau ko kala dang matawa, wanua ngu bangsa Kanaan, bangsa Het, Amori, Feris, Hewi dang Yebus.

18Umati-Ku sarung mundaringihi manga didato ngu. Bou e'e i kau singkahindo dingang u manga tumbonang u Israel mambeng tamai tumatingo ratu ngu Mesir dang puhabari si sire: ‘Mawu, Ruata tau Ibrani seng nasongo nupakal᷊ahe u watangeng-E si kami. Orasi i'i pakawalako i kami matamai l᷊umal᷊eng tilu l᷊ou karaunge sarang tana l᷊inggi mumbawa sasumba su Mawu, Ruata ngi kami.’ ” 19Tuhue Mawu Ruata sau nuhengetang, “Ia matitong ratu ngu Mesir ta sarung mamilo i kumu matamai, su l᷊ikuri bou i sie nisihasa. 20Kateho Ia sarung mupake u kawasa-Ku, dang muhukung Mesir dingang u haghi ngu manga silaka ko l᷊abo ko Daku ipasongo pai se'e. Bou e'e, Ia sarung mupakawala ngi kumu muwua.

21 # Sasu. 12:35-36 Ia sarung mukoa taumata ngu Mesir mukumindaghi i kumu, tadeau su tempo umati-Ku muwua, i kumu ta matamai dingang u l᷊ima mapul᷊o. 22Apang kowawine ngu Israel sarung mundo bou manga l᷊ampunge tau Mesir dang bou manga kowawine ngu tau Mesir ko natana su wal᷊e simbau, pakeang l᷊au u l᷊al᷊ighahie sal᷊aka l᷊au wul᷊aeng. I kumu sarung mul᷊oho e'e su manga anau. Dingang u akal᷊i e'e i kumu sarung mamal᷊aho taumata ngu Mesir.”

Currently Selected:

SASUWANG 3: PLT

Highlight

Copy

Compare