Pilipisiyoos 2

Rɔmɛ Rikiteet Ɛɛkoŋk Yeeseek

1Ɔkɔn latukari ɓaŋkaawurɔn Kereseeŋ, ɔkɔnɓɔrɛ gannanikari mɛyin nɛɛkɛŋ, ɛ ɔkɔnɓɔrɛ latukari omaayikeen a Wɛɛŋa sigɔ Geetitaanak agut omoŋ, ɛ ɔkɔnɓɔrɛ yaaŋɛɛr mentanka a sinɔ kɔna sanɗiiɗɛŋɔŋk ɛkanɛɛkɛ goŋkuŋ, 2agut sini in lotɛɛ ɛɛk a ɓayɛ omoŋ koɓiiɗ a mɛyin a wɛɛŋakɛ nɔ in arɛɛ yaaka naak a enyaaŋ. 3In rikitɛɛ ɛɛk ɗooka, in arɛɛ joop ɔgɔ a dɔɔs sɛɛg iinaka, ma kat merɛɛ ɛɛk a pakaatɛ ɛɛk tekaanikent a poriiɗ ɛkanɛɛkoŋk. 4Iinak a omoŋ omoŋ kat mermenari sinɛ kɔnyɛ iinakik dakɛɗa, ma in mermenɛɛ sinɛ kɔnyɛ joop ɔgɔɔk.

5In lakɛ koɓi sini rikiteet ɛɛkoŋkuk sinɛɓa lak Yeeseek,

6Lakɓa sɛŋk Waakoyotikeen nɛɛk ɓɛɛnyɔwɛ gɛɛŋk baŋɛ,

yakanaɓa ki ikomiit a itoɓa lak aɓaŋkawuŋ

Waakoyotiikeen sinɛɓa ari Sɛɛn a rɔmaa a Waakoyok.

7Nɛɓa sɛŋk ŋɔr eemɛyɔn sinɛɓa lakik baŋɛ,

nɛɓa dakɛ a ito sɛɛn laaŋoyen,

nɛɓa ɓartɛɛ a ito iɗit,

ɛɓa yaaŋɛ ɛɛk a gayi a iɗit.

8Nɛɓa yaaŋɛ ɛɛk a sɛɛn iɗit nɛ rikite ɛɛk nɛɛk ɗooka,

nɛɓa tiiɗi mɛlɛɛɗa reta laalawutant raŋk.

9Nɛ agut sini ɓɔŋgɔɔrɛɓa Waakoyot rakaaya olaatɛ baŋɛ,

gageeɗɓa tiriya sigɔ atu tiriyaakɛ baŋɛ rakaayk.

10Saa ɓɛɛlɛɛɗ oko sinikik,

nɛ riiɓakɔ sigɛ atu dari a ɗook a ɗook goyse ɗeekik baŋɛ,

ɛtɛr korontunɛ eemɛyɔɔna tiriya Yeeseek,

11nɛ waasɛr atutunɛ gɛŋk kɛ ege Yeese Kerese Suumi,

a gaɓɛɛr eemɛyɔn Baabɛya Waakoyota.

Ɗaawan Joopa Ɗookoŋk Oko Pɛɗɛrka

12Iinak tekaaneer sigɛkɔnu poraak, oko sinɛkan tiiɗiɗɔ ɓɛɛnyɔwɛ gɛɛŋk baŋɛ saakan eet a iinakik, nɛ kɔna tona kɛnɔ tiiɗikari a kaalɛŋ oko sinɛ kɔne yowɛrkiɗak. Agut sini iinak a omoŋ omoŋ kɛnɔ ijaagiir bɔdɛ noŋk adaktan. In ijaagɗikɛɛ a ɓaŋkaawurɛɛ tuɓur a eemɛyɔɔn. 13Sinɛ kɔne ijaagɗi nɔ warɛrɗɔ ɛ ijaagirɗɔ oko ɗɛyan nɛɛk sinɔ mentanŋɔŋk Waakoyo.

14In ijaagɛɛ any baŋɛ a kat noonogaakɛɛ, ɛ kat palamɗiikɛɛ, 15ɔkɔn ɓɛɛlɛ oko sinikiŋ, nɛ ɓartiyɛɛkɛ sigeege ruruŋaaŋɔŋk ŋɛɛwɛɛŋɔŋk kɔɔr, iinak tɔɔmɔk Waakoyotoŋk sigɔ kɛɛkɔne any sinɔ keerɛɛŋɔŋk a kɔnu kɛɛ laaganyɛɛ a mentaanakariŋ, nɛ ɗaawiir ɗook raŋk a ito iinak maryɔ, 16agut sini saa widerkiɗɔ pɛɛni wɛɛŋakoŋkuk kɛnɔ kat reera sɔkɔn, ɛ kat bɔɔlaaka sɔkɔn, nɔta dakɛ a any sinɔ meriiɗa ɛɛkik ɓeny saakoy mɛlkiɗ Yeese Kereseek. 17Nɛ ɔkɔn aasi wɛɛŋa gaaŋk wideerɛɛ a tigi a tuukerkiɗɛɛ uduŋeet a ijaag sinɛ wideetaarɔ Waakoyota ŋaadiyɛɛkɛkiŋ, nɛta yaaŋ. Nɛkɔɔɓɔrɔ dakɛɛr a iinak kaastaanak yaaka naakik. 18Nɛɓɔrɛ yaakɔnaŋ nɛkɔna yaa a eet agut omoŋ.

Ijaag Timotiyoosuk A Epapiroditusuk

19Ŋaada Suumi Yeese kɛ oolakɔɔ a wosɛyɛɛra Timotiyoos a gorgorŋ son lak iinakik, nɔkɔɔ in tiyɛɛɗa ɔɔtɛ beeɗiit noŋkuk nɔkɔɔta yaa. 20Kɛɛte iɗit sɛɛne sɔgɔɔsɔyk sinɔ koɓi agut ɔɔtɛ noŋkuk ɓayaay. 21Rererigeeɗ joop ɔgɔɔk tɔkɔny ɛkan gɛŋkik dakɛɗa, ma kir koɓiit agut Yeese Keresee. 22Iinak ɔɗɔwa noŋk ɗegerari kɛ paarɛɛkan eekeer Timotiyoosuk, nɛ ɗegerɛɛ nɛkan ɛtii a eet agut omoŋ a ito tɔɔn a ɛpɛn nɛkan rɔɔriyaakii Pɛɛnii sinɔɔnɛ Ɓɛlkɛɛstank agut omoŋ. 23Agut sini saakɔɔ dɛnɛɛɗa ɔɔtɛ naak kɛ ɓɛɛla ɛkik nɛ ŋaada kɛ wosɛyɛɛrakɔɔ kɔna Timotiyoos a gorgorŋ. 24Maɓɔra ŋaada Suumi kɛ kɔnyɛkɔɔtu nɛkɔɔ kɔra a gorgorŋ.

25Maɓɔrɛ, manya eeta, Aproditu sinɛkan wosɛyɛɛrkɔɔ kɛnɔtu kus kɔnyɛ ant sinaanɛta ɗɛyɛk baŋɛk, laŋkaakɔ ata ɗegeera a wosɛyɛɛra son lak iinakikiŋ. Sɛɛn sinɛkan kaar a ito amaasini a eet agut omoŋ, ɛ piraa naak ijaagoŋk. 26Wosɛyɛɛrakɔna sɛɛn agut sinɔ ɓakɛyɗiiɗ agut sinɔ kɔna lakiɗ ŋɔɗɔ a gunkɔnu dɛnɛ, ɛkan tiyɛɛr gori nɛɛkik. 27Gorukan eekeerɛ jɛt a gunkan rɛrŋ. Nɛkan yakana maariye sɛɛn Waakoyotuŋ, moko sɛɛn dakɛɗa maariyekan ɓɔrɛti kɛnɔ mota tuukiɗiik san sana raŋana. 28Agut sini ɗɛya jɛt a wosɛyɛɛra sɛɛn son lak iinakik kɛnɔ kɔna yaa. Saa dɛnɛrɗɔɔk ɛɓɔrɛ nɔ in pɔyɔɔwur ɓakɛy naakɛk. 29In boŋɛɛ sɛɛn yaakat oko sinɛ ŋaadiɗiiɗ Suumiik, ma ɓɔrɛ in eemɛyɛɛ joop sigɔ ito sɛɛnik baŋɛ, 30agut sinɔ rɛrgunkan agut ijaag, a kan ki koɓiit wɛɛŋaka gɛɛnaak ɛ kɛnɔta enyɛr ijaag sinɔkan kiir oolɛ ata gaɓɛɛrŋɔŋk.

Currently Selected:

Pilipisiyoos 2: KSTM

Highlight

Copy