Pilipisiyoos 1

1Sooy lak Paawuloos a Timotiyoos sigɛ laaŋoyeer Yeese Kereseek, joopa sigaaga geetitaanak Yeese Kereseek baŋɛ, sigɛ atu katamɛɛ Pilipisiyoosuk, a ɓɔrɛ ɔɗɔweer gode Sambatɛyoŋk a diyakonaatak. 2In kɔna ɓɛɛlɛ a wookan a bɔdɛ sooy lak Baabɛɛ naŋk Waakoyo, a Suumi Yeese Kereseek.

Ɗanɗamɔn Paawuloosuk Pɔɔsiyɛkoŋk

3Pɔɔsa Waakoyo naak oko sinɛ kɔnu koɓukuɗak, 4saa ɗanɗamaaɗa ɓɛɛnyɔwɛ gɛɛŋk baŋɛ agut iinakik baŋɛ, nɛ ɗanɗamaaka yaakat 5agut a tukiɗik ɓeny sinaanɛkan tuktank nɔ mɛlɛɛɗa ɓɛɛnyɔwase, agut sinɔ kɔnyɛɛrkanti Pɛɛnii sinɔɔnɛ Ɓɛlkɛɛstank agut omoŋ. 6Sinɛkan tuke ijaag sinɔ mentanŋɔŋk iinakɛk, ɗegera kɛ diilekoy mɛlɛɛɗa pediya ɓɛɛnyɔwa sinaanakoy mɛlkiɗ Yeese Kereseek. 7Ɔɔtɛ sineene arkiɗa godeey korkoɗɔɔnoŋk sisɔk, a ɓɔrɛ inkanti kɛɛ korkoɗɛɛ, agut sinɔtu kɔnyɛrɗɔ iinak baŋɛ, milkii sinaanɛkanta gaɓɛ Waakoyot wookaan nɛɛkɛkik, kɛnɔ koola eekeer Pɛɛni sinɔ Bɛlkɛɛstank, ɛ ara kɛnɔ in ɓaŋkaawurk, nɛ atukari ɓɛɛnyɔwɛ gɛɛŋk baŋɛ ɓayaay naakɛk. 8Sinɛ kɔna lakiɗa ŋɔɗɔk iinak baŋɛ mɛyin Yeese Kereseek ɗegeera Waakoyo.

9-11Saa ɓɛɛlɛɛɗ oko sinikik kɛnɔ mermenari any sinɛ dɔɔsuk nɔ ɗegerariɗ, nɔkoy kɔnu laŋɛɛ a mentaanakari a kɛɛ any sinɔ kɔne keerɛɛk, ɓeny saakoy mɛlkiɗ kɛnɔ enyaakari taamɛ mentankaatoŋk, sigɔ laŋɛɛ goy Yeese Kereseek, nɛkɔɔ kɔne laŋɛɛ pɔɔsiyɛ a eemɛyɔn Waakoyota, ɗanɗamaaka kɛnɔ mɛyin noŋk obulur ɛ in ɓɔlɔɔrɛɛ ɗegerɔɔn a koɓiiɗ baŋɛ.

Bɛɛlɛ Kerese Beeɗita

12Iinak manyaakak eeta any sinɛkan laŋkaak baŋɛ, ɗɛya kɛnɔ ɗegerari kɛ arikan kɛnɔ bakaanyir Pɛɛni sinɔ Ɓɛlkɛɛstank a kaalɛŋ. 13Agut sini ɗegerar koortaana gode maŋgistiyoŋk, a joop ɔgɔɔk baŋɛ kɛ korkoɗɛɛ kanti agut Keresee. 14Agut korkoɗɔn naak manyaakakɛ eeta sigaagɛ ŋaadtaanakik a ɓɔɔkaaŋ, ŋaadiɗikɔ Suumii, nɛkɔ laŋir ɓaŋkaawurɔn nɔ waasɛr Pɛɛni Waakoyotoŋk diirikent a kir ɓuriit.

15Waasɛr joop ɔgɔɔk pɛɛni Yeeseek agut nyeken a lɔlɔs, ma joop ɔgɔɔk waasɛr koɓiiɗ sinɔɔnɛ mentanŋɔŋk. 16Waasɛr joop sigi Pɛɛni sinɔ Ɓɛlkɛɛstank ɓayaay sinɔɔnɛ eekerkank mɛyin, agut sinɔ ɗegerarɗi kɛ ɓɛɛla seedi kɛnɔ koola Pɛɛni sinɔ Ɓɛlkɛɛstank. 17Mayakana joop sigɛ waasɛr Keresee a ruruŋarŋɔŋk, ma moko koɓiiɗ sinɔɔnɛ ɓɛɛlɛ kɛ sɛmk, ma poriiɗ ɛkan gɛŋkik a koɓur kɛ, gunta tuukerki rakatɛ korkoɗɔɔna naaka raŋana.

18Nɛ kɛygun ɓɛlkɛ oko sinikiŋ rakatɛ nɛɛk jikon? Kɛygun waasɛɛ tagay kɛygun eekeerɛ waasɛɛ Keresee gopak baŋɛ. Nɛta yaa agut siniŋ. Ii, yaataaŋ, 19agut sinɔ ɗegerɗa any sinɛkan laŋkaak kɛ, gayɛkɔɔ wooraana naaka ɗanɗamɔɔn noŋk, a tɔkɔny wɛɛŋa sigɛkanta gaɓɛ Yeesee Kereseek. 20Koora ŋaadiyɛɛkɛ gaanɛ kɛ kɛɛte keeny a daktan, yakana tona diirikent kɛ oko sinɛ a'arɗa goorɛk ɓenyse, kɛygun rɛrkaayaŋ kɛygun kiikaaya rerin, eemɛy Kerese ɛɛk eek naakɛŋ. 21Agut Wɛɛŋa gaaŋk beeɗit Kereseek, maɓɔrɛ seekɛ rerk any sinɔ laŋiiɗɛɛ tɔkɔnyk. 22Nɛ kɛygun beeɗikaaya taareŋ, nɛ laka ijaag sinɔ lak taamɛk. Mayakana kaa ɗegerɔɔn kɛ daama won beeɗit a rer? 23Ɓakɛyɗiika sigeege pɛɛykiŋ, ɗɛya a ŋaara nɔ kɛɛɗii beeɗii a Keresee agut sinɔ dɔɔs sini jɛt, 24mayakana beeɗit naak taarek ɗɛyɛ iinaka jɛt. 25Koɓukakɔ sini nɛ ɗegera kɛ gaalɗiikakɔɔ, ɛ kɔɔ beeɗaa sooy lak iinakik baŋɛ, nɔ ɓɔlɔɔrɛɛr ŋaadiyɛɛkɛ nɔkɔna yaa. 26Saakɔɔ weeriikiɗa son lak iinakik, meri ɛɛkoŋk sinɛ latukari agut eetik, obiikɔɔ Yeese Keresee.

27Kɛygun ɓɛlkɛ ɛkiŋ, in beeɗɛɛ oko sinɛ ɗɛyɛɛɗ Pɛɛni sinɔ Ɓɛlkɛɛstank Kereseek. Kɛygun kɔrurkaaya nɔkɔnu kɛɛɗa dɛnaaŋ. Kɛygun kɔne yowɛrkaayaŋ, nɛ tiya agut iinak kɛ ɛtɛɛrnɔ agut omoŋ, nɛnɔɔ ariir ɗɔŋkɔɔlɛ wɛɛŋakɛ agut Pɛɛni sinɔ Bɛlkɛɛstank. 28Kat ɓureer joop sigɛkɔnu ɓooyurk a daktan. Ege sini yaaŋtan badɛ nɛŋkik, ma iinaka yaaŋtan bɔdɛɛɗoŋk kus sini sooy lak Waakoyok. 29Gaɓɛɛkan kɔna wookan sini agut Keresee, nɔɓɔrɛ laŋirkɔ rakatɛ agut sɛɛniŋ. Ma moko kɛnɔ ŋaadiɗiikari sɛɛne dakɛɗa. 30Sinɛkan dɛnɛɛr eeteek, sinɛ tiyɛɛr kɛ ɓɛɛlɛ sisɔ eeteek laŋirkɔɔkɔ ɗɔŋkɔɔlɛ sinɛ.

Currently Selected:

Pilipisiyoos 1: KSTM

Highlight

Copy