ግብረ ሐዋርያት 21

ምዕራፍ 21

በእንተ አንሶስዎቶሙ ውስተ በሐውርት

1ወሖርነ ንሕነሂ ወእሙንቱሂ አተዉ ወረዊጸነ በጻሕነ ብሔረ ቆስያ ወበሳኒታ ወረድነ ሩድ ወእምህየ ሖርነ ለጳጥራ። 2ወረከብነ ሐመረ ዘየሐውር ፊንቄ ወዐረግነ ውስቴታ። 3ወነገድነ ወርኢናሃ ለቆጵሮስ ወኀደግናሃ በፀጋምነ ወሖርነ ወነገድነ ለምድረ ሶርያ ወወረድነ ጢሮስ እስመ ህየ አውረዱ ኵሎ ዘውስተ ሐመር።

በእንተ አርድእት እለ ውስተ ጢሮስ

4ወበህየ ረከብናሆሙ ለአርድእት ወነበርነ ኀቤሆሙ ሰቡዐ መዋዕለ ወይቤልዎ እሙንቱ ለጳውሎስ በመንፈስ ቅዱስ ኢይዕርግ ኢየሩሳሌም። 5ወእምድኅረዝ ወፃእነ ለፍኖት ወአስተፋነዉነ ኵሉ አንስትኒ ወደቂቅኒ ለአፍኣ ሀገር ወሰገድነ በብረኪነ ኀበ ጽንፈ ባሕር ወጸለይነ ወተአማኅነ በበይናቲነ ወተፋነውነ። 6ወእምዝ ዐረግነ ሐመረ ወእሙንቱሂ አተዉ አብያቲሆሙ። 7ወንሕነሰ ነገድነ እምጢሮስ ወይእቲ ሱር ወበጻሕነ ሀገረ አካ ወተአማኅናሆሙ ለአኀዊነ ወነበርነ ኀቤሆሙ አሐተ ዕለተ። 8#6፥5፤ 8፥5። ወበሳኒታ ወፃእነ ወሖርነ ቂሳርያ ወቦእነ ቤተ ፊልጶስ ዜናዊ አሐዱ እምሰብዐቱ አኀው ዲያቆናት። 9#2፥17። ወሀለዋ ኀቤሁ አርባዕ ደናግል አዋልዲሁ ወይትኔበያ።

በእንተ ትንቢቱ ለአጋቦስ

10 # 11፥28። ወነበርነ ብዙኀ መዋዕለ ኀቤሁ ወወረደ አሐዱ ነቢይ እምይሁዳ ዘስሙ አጋቦስ። 11#1፥23። ወመጽአ ኀቤነ ወነሥአ ቅናቶ ለጳውሎስ ወተአስረ ለሊሁ እደዊሁ ወእገሪሁ ወይቤ ከመዝ ይቤ መንፈስ ቅዱስ ለእግዚአ ዝ ቅናት ከመዝ የአስርዎ አይሁድ በኢየሩሳሌም ወያገብእዎ ለአሕዛብ። 12ወዘንተ ሰሚዐነ አስተብቋዕናሁ ለጳውሎስ ምስለ ሰብአ ውእቱ ብሔር ከመ ኢይዕርግ ኢየሩሳሌም።

በእንተ አውሥኦተ ጳውሎስ

13 # 20፥24። ወተሰጥወ ጳውሎስ ወይቤ ለምንት ከመዝ ትገብሩ ወትበክዩ ወትሰብሩኒ ልብየ አንሰኬ አኮ ባሕቲቶ ማሕመሜ#ቦ ዘይቤ «ማኅሜ» ወመዋቅሕተ ዘእሴፎ ዓዲ ለመዊትኒ ጥቡዕ አነ በኢየሩሳሌም በእንተ ስመ እግዚእነ ኢየሱስ። 14ወሶበ አበየ አርመምነ ወኀደግናሁ ወንቤ ዘፈቀደ እግዚአብሔር ለይኩን።

በእንተ ዐሪግ ውስተ ኢየሩሳሌም

15ወእምድኅረ እማንቱ መዋዕል አስተዳሎነ ወዐረግነ ኢየሩሳሌም። 16ወቦ እምነ አርዳእ እለ መጽኡ ምስሌነ እምቂሳርያ ወሖርነ ወኀደርነ ኀበ ምናሶን ዘሀገረ ቆጵሮስ ዘእምአርድእት ቀዳማውያን። 17ወበጺሐነ ኢየሩሳሌም ተቀበሉነ አኀዊነ በፍሥሓ። 18#15፥13፤ ገላ. 1፥19። ወበሳኒታ ቦእነ ምስለ ጳውሎስ ኀበ ያዕቆብ ወኀበ ኵሎሙ ቀሲሳን ወሰላመ ንቤሎሙ። 19ወተአምኆሙ ጳውሎስ ወዜነዎሙ ኵሎ ዘገብረ እግዚአብሔር በውስተ አሕዛብ በመልእክተ ዚኣሁ።

በእንተ አውሥኦተ ሐዋርያት

20 # 15፥1። ወሰሚዖሙ አእኰቱ እግዚአብሔርሃ ወይቤልዎ ትሬኢኑ ኦ እኁነ ሚመጠን አእላፍ በውስተ አይሁድ እለ አምኑ ወኵሎሙ ምሁራነ ኦሪት። 21#16፥3፤ ሮሜ 10፥4። ወዳእሙ ይቤልዎሙ በእንቲኣከ ከመ ዘኢይከውን ትሜህር ወታኀድጎሙ ሕገ ሙሴ ወትከልኦሙ ለአሕዛብ ወለኵሎሙ እለ አምኑ እምውስተ አይሁድ ኢይግዝሩ ደቂቆሙ ወኢይግበሩ ሕገ ኦሪት። 22ወይእዜኒ ሀለዎሙ ይስምዑ ከመ መጻእከ ዝየ ወይትጋብኡ። 23ወከመዝ ግበር ዘከመ ንብለከ ሀለዉ ኀቤነ አርባዕቱ ዕደው እለ ቦሙ ብፅዐት ያንጽሑ ርእሶሙ።#ቦ ዘኢይጽሕፍ «ያንጽሑ ርእሶሙ» 24#18፥18። ንሥኦሙ ወሰዶሙ ወአንጽሕ ርእሰከ ምስሌሆሙ ወአስተዋፅእ በእንቲኣሆሙ ከመ ይትላጸዩ ርእሶሙ ወያአምሩ ኵሎሙ ከመ ሐሰት ውእቱ ዘየሐምዩከ ወከመ ተዐቅብ አንተሂ ሕገ ኦሪት።

በእንተ አሕዛብ እለ የአምኑ

25 # 15፥20-29። ወበእንተሰ አሕዛብ እለ የአምኑ ንሕነ አዘዝነ ከመ ይትዐቀቡ ዘይትሔረሙ እምዘ ይዘብሑ ለአማልክት ወእምዝሙት ወእማውታ ወደም። 26#ዘኍ. 6፥13። ወነሥኦሙ ጳውሎስ ለእሙንቱ ዕደው ወተቀደሰ ምስሌሆሙ ወቦአ ምኵራበ ወነገሮሙ መዋዕለ ዕድሜ ንጽሖሙ እስከ ያበውኡ መሥዋዕተ ለለ አሐዱ እምኔሆሙ።

በእንተ አይሁድ እለ ሰከይዎ ለጳውሎስ

27ወአመ ሰቡዕ መዋዕል ርእይዎ አይሁድ እለ መጽኡ እምእስያ ለጳውሎስ በምኵራብ ወአስተጋብኡ ላዕሌሁ ኵሎ ሕዝበ ወአኀዝዎ። 28#6፥14፤ ሕዝ. 44፥7። ወዐውየዉ ወይቤሉ አንትሙ ሰብአ እስራኤል ርድኡነ ነዋ ዝ ብእሲ ዘይገብር ማዕሌተ ወየሀውክ ሕዝበ በኵለሄ ወየዐሉ ኦሪተ ወምኵራበ ወይሜህር ለኵሉ ወዓዲ አረሚኒ አብአ ምኵራበ ወአርኰሰ ቤተ መቅደስ። 29#1፥4፤ 2ጢሞ. 4፥1። እስመ ርእይዎ ለጥሮፊሞስ ዘሀገረ ኤፌሶን ምስሌሁ ውስተ ሀገር ወመሰሎሙ ዘአብኦ ጳውሎስ ምኵራበ። 30ወተሀውከ ኵሉ ሀገር ወሮጹ ኵሉ ሕዝብ ወሰሐብዎ ለጳውሎስ ወአውፅእዎ እምኵራብ ወዐጸዉ ኆኅተ። 31ወፈቀዱ ይቅትልዎ ወዘበጥዎ ብዙኀ ወበጽሐ መልእክት ኀበ መልአከ ሰጲራ ከመ ተሀውከት ኵላ ኢየሩሳሌም። 32ወተንሥአ መልአክ ሶቤሃ ወሮጸ ኀቤሆሙ ምስለ ወዓሊሁ ወሶበ ርእይዎ ለመልአክ ምስለ ወዓሊሁ ኀደጉ ዘቢጦቶ ለጳውሎስ። 33#1፥23። ወእምዝ ቀርበ መልአክ ወአኀዞ ወአዘዘ ይእስርዎ በክልኤ መኣስር ወሐተተ ምንት ውእቱ ወምንተ ገብረ። 34ወይኬልሑ ሕዝብ ወስእነ መልአክ አእምሮ ጥዩቀ በእንተ ዘይትሀወክ ሰብእ ወአዘዘ ያዕርግዎ ውስተ ዐውድ።

በእንተ ዕርገቱ ውስተ ዐውድ

35ወሶበ ዐርገ መዓርገ አዕረግዎ እንዘ ይጸውርዎ ወዓልት እስመ ይጸዐቅ ሰብእ። 36ወይተልውዎ ብዙኃን ወይኬልሑ ሕዝብ ወይብሉ አእትትዎ።

በእንተ ተዋሥኦተ መልአክ ወጳውሎስ

37ወሶበ በጽሐ ኀበ ዐውድ ይቤሎ ጳውሎስ ለመልአክ ታበውሐኒኑ እንግርከ ወይቤሎ መልአክ ተአምርኑ ጽርዐ። 38አንተሁ እንጋ ዝኩ ግብጻዊ ዘቀዲሙ ገበርከ ማዕሌተ ወአውፃእከ ውስተ ገዳም አርብዓ ምእተ ብእሴ ዘሕዝበ ሲቃርዮን። 39#9፥11። ወይቤሎ ጳውሎስ አንሰ ብእሲ አይሁዳዊ ዘሀገረ ጠርሴስ ዘቂልቅያ ሀገር እምርት እንተ ተወለድኩ ባቲ አስተበቍዕ ኀቤከ ከመ ታብሐኒ እንግሮሙ ለሕዝብ። 40#12፥17፤ 13፥16። ወሶበ አብሖ ቆመ ውስተ መዓርግ ጳውሎስ ወአንሥአ እዴሁ ኀበ ሕዝብ ወይቤሎሙ አርምሙ ወእምዝ ሶበ አርመሙ ከልሐ ጳውሎስ በነገረ ዕብራይስጥ ወይቤ።

Currently Selected:

ግብረ ሐዋርያት 21: ሐኪግ

Highlight

Copy