ግብረ ሐዋርያት 20

ምዕራፍ 20

በእንተ ፀአቱ ለጳውሎስ እምነ ኤፌሶን

1 # 1ጢሞ. 1፥3። ወእምድኅረ ኀልቀ ሀከክ ጸውዐ ጳውሎስ አርዳኢሁ ወመሀሮሙ ወሰዐሞሙ ወወፅአ ወሖረ መቄዶንያ። 2ወኀለፈ እንተ ውእቱ በሐውርት ወብዙኀ መሀሮሙ በቃሉ ወእምዝ ሖረ ኤልዳ። 3ወነበረ በህየ ሠለስተ አውራኀ ወተማከሩ አይሁድ ዲቤሁ ወፈቀደ ይሑር ብሔረ ሶርያ ወመከረ ይሠወጥ መቄዶንያ። 4#17፥10፤ 19፥29። ወሖሩ ምስሌሁ ሱሲ ጴጥሮስ ዘሀገረ ቤርያ ወእምተሰሎንቄ አርስጥሮኮስ ወሲኮንዱስ ወጋይዮስ ደርቤያዊ ወጢሞቴዎስ ዘእምልስጥራን ወእምእስያ ቲኪቆስ ወጥሮፊሞስ። 5#16፥8፤ 2ቆሮ. 2፥12። ወእሙንቱ ሖሩ ቅድሜነ ወጸንሑነ ውስተ ጢሮአዳ።

በእንተ ንግደቶሙ እምፊልጵስዩስ

6ወንሕነሰ ነገድነ እምድኅረ ፋሲካ እምፊልጵስዩስ ወበጻሕነ ኀቤሆሙ ውስተ ጢሮአዳ በባሕር በኀምስቱ ዕለት ወነበርነ ህየ ሰቡዐ መዋዕለ። 7#2፥42-46፤ 1ቆሮ. 16፥2። ወበዕለተ እሑድ እንዘ ጉቡኣን ንሕነ ከመ ንባርክ ማእደ ወይነግሮሙ ጳውሎስ እስመ በሳኒታ ይገይሥ ወአንኀ ነገረ እስከ መንፈቀ ሌሊት። 8ወብዙኅ መኃትው ውስተ ውእቱ ጽርሕ ኀበ ሀሎነ ጉቡኣን።

በእንተ ወልድ ዘስሙ አውጤክስ

9ወእንዘ ይነብር አሐዱ ወልድ ወሬዛ ውስተ መስኮት ዘስሙ አውጤክስ ደቀሰ ወኖመ ዐቢየ ንዋመ ወእንዘ ይነግር ጳውሎስ ብዙኀ ጐንደየ ወእምኀበ ይነውም ውእቱ ወልድ ጸድፈ እምተሥላስ ታሕተ ወአንሥእዎ በድኖ። 10#1ነገ. 17፥21። ወወረደ ጳውሎስ ወነሥኦ ኀቤሁ ወይቤሎሙ ኢትደንግፁ ሀለወት ነፍሱ ላዕሌሁ። 11ወእምዝ ዐርገ ወአዕረጎ ምስሌሁ ወነበረ ወባረከ ማእደ ወወሀቦ ለወሬዛ እምነ ማእድ ወብዙኀ ነገሮሙ ወጐንደየ እስከ ጎሕ። 12ወእምዝ ወፅአ ጌሠመ ወአወፈዮሙ ውእተ ወልደ ሕያዎ ወተፈሥሑ ፈድፋደ።

በእንተ እለ ተቀበልዎ ለጳውሎስ

13ወንሕነሰ ዐረግነ ሐመረ ወሖርነ አሶን እስመ እምህየ ፈቀድነ ንትቀበሎ ለጳውሎስ እስመ ከመዝ ተናገረነ ከመ ይመጽእ በእግር ወተቀበልናሁ። 14ወበጻሕነ አሶን ወነሣእናሁ ዲበ ሐመር ወሖርነ ሚልጢኒን። 15ወእምህየ ነገድነ በሳኒታ ወበጻሕነ አንጢቅክስዩ ወበሳኒታ ኀለፍነ እንተ አሞን ወነበርነ ትሮጊሊዮም ወእምድኅረ ውእቱ ዕለት በጻሕነ መሊጡ።

በእንተ በዓለ ጰንጠቈስጤ

16 # 18፥21፤ 21፥4-12። እስመ አጥብዐ ጳውሎስ ከመ ይሑር ኤፌሶን ከመ ኢይጐንዲ ውስተ እስያ ወጐጕአ ለእመ ይትከሃሎ ይብጻሕ ኢየሩሳሌም ለጰንጠቈስጤ። 17ወእምነ መሊጡ ለአከ ኤፌሶን ይጸውዕዎሙ ለቀሲሳን እለ ቤተ ክርስቲያን።

በእንተ ተሰናእሎ

18 # 18፥19፤ 19፥10። ወበጺሖሙ ኀቤሁ ይቤሎሙ ለሊክሙ ተአምሩ እምአመ መጻእኩ እስያ ዘከመ ነበርኩ ኀቤክሙ በኵሉ መዋዕል። 19እንዘ እትቀነይ ለእግዚአብሔር ወእሰርሕ በኵሉ ሕማም ወአንብዕ ወመንሱትሂ ዘረከበኒ እምአይሁድ። 20ወአልቦ ዘሰወርኩክሙ እምኵሉ ዘይደልወክሙ ዘኢነገርኩክሙ ወዘኢመሀርኩክሙ። 21እንዘ አሰምዖሙ ለአይሁድ ክሡተ ወለአረሚኒ በአፍኣኒ ወበውስጥኒ ከመ ይትጋነዩ ወይነስሑ ለእግዚአብሔር ወይእመኑ በእግዚእነ ኢየሱስ ክርስቶስ።

በእንተ ዘክሮተ ሕማሙ

22 # 18፥21፤ 19፥21። ወይእዜኒ ናሁ ተዐሠርኩ በመንፈስየ እሑር ኢየሩሳሌም ወኢየአምር ዘይረክበኒ በውስቴታ። 23#16፥21፤ 4፥11። ወባሕቱ አስምዐ ሊተ መንፈስ ቅዱስ በበአህጉር እንዘ ይብል ሕማም ወመዋቅሕት ይጸንሐከ። 24#21፥13። ወባሕቱ ኢየሐስባ ለነፍስየ ወኢምንተኒ ዳእሙ ከመ እፈጽም መልእክትየ ወእሰልጥ ግብርየ ዘነሣእኩ እምኀበ እግዚእነ ኢየሱስ ክርስቶስ ከመ እምሀር ወእስብክ ወንጌለ ጸጋሁ ለእግዚአብሔር። 25ወይእዜኒ ናሁ አነ አእመርኩ ከመ ኢትሬኢዩኒ ገጽየ እንከ አንትሙ ኵልክሙ እለ ሰበኩ ለክሙ በእንተ መንግሥተ እግዚአብሔር።

በእንተ አንቅሆ ኖሎት

26 # 18፥6። ወናሁ አሰምዕ ለክሙ ዮም በዛቲ ዕለት ከመ ንጹሕ አነ እምደመ ኵልክሙ። 27ወአልቦ ዘኀባእኩክሙ ወዘኢነገርኩክሙ ኵሎ ምክሮ ለእግዚአብሔር። 28#1ጢሞ. 4፥16፤ 1ጴጥ. 5፥2። ወይእዜኒ ዕቀቡ ርእሰክሙ ወኵሎ መራዕየ ዘሎቱ ሤመክሙ መንፈስ ቅዱስ ጳጳሳተ ከመ ትርዐዩ ቤተ ክርስቲያኑ ለእግዚአብሔር እንተ አጥረያ በደሙ። 29#ማቴ. 7፥15። ወአነ አአምር ከመ ይመጽኡ እምድኅሬየ ተኵላት መሠጥ እለ ኢይምህክዋ ለመርዔት። 30ወእምውስቴትክሙ ይትነሥኡ ዕደው እለ ይሜህሩ ጠዋየ ነገረ ከመ ያግብእዎሙ ለአርድእት#ቦ ዘይቤ «ለአሕዛብ» ኀቤሆሙ። 31ወይእዜኒ ትግሁ ወተዘከሩ ከመ ሠለስተ ዓመተ ኢነትገ አንብዕየ ሌሊተ ወመዓልተ እንዘ እሜህረክሙ ለኵልክሙ። 32ወይእዜኒ አማሕፀንኩክሙ ኀበ እግዚአብሔር ወለቃለ ጸጋሁ ዘይክል ሐኒጾተክሙ ወየሀብክሙ ርስተ ምስለ ኵሎሙ ቅዱሳን።

በእንተ ተዐቅቦ እምፍቅረ ንዋይ

33 # ማቴ. 10፥9፤ 1ቆሮ. 9፥12፤ 1ሳሙ. 12፥3። ተአምሩ ከመ ኢተሰቈቁ ንዋየክሙ ኢወርቀ ወኢብሩረ ወኢአልባሰ ኢነሣእኩ ወኢ እምኀበ አሐዱሂ እምኔክሙ። 34#18፥3፤ 1ቆሮ. 4፥12፤ 1ተሰ. 2፥9። ለሊክሙ ተአምሩ ኢለትካዝየ ወኢለእለ ምስሌየ አላ ተቀንያ እላንቱ እደውየ። 35#ማቴ. 5፥7፤ 24፥40-46። እስመ ከማሁ ይደልወነ ከመ በጻማነ ወበተግባርነ ንትወከፎሙ ለድኩማን ወዘንተ መሀርኩክሙ ተዘከሩ ቃሎ ለእግዚእነ ዘይቤ «ብፁዕ ዘይሁብ እምዘይነሥእ።»

በእንተ እለ አስተፋነውዎ

36 # 21፥5። ወዘንተ ብሂሎ ሰገደ ወጸለየ ምስለ ኵሎሙ እለ ሀለዉ ምስሌሁ። 37ወብዙኀ በከዩ ኵሎሙ ወሐቀፍዎ ክሣዶ ለጳውሎስ ወሰዐምዎ እንዘ ይቴክዙ ወፈድፋደሰ እስመ ይቤሎሙ ኢትሬእዩኒ እንከ ገጽየ። 38ወአስተፋነውዎ ወዐርገ ሐመረ።

Currently Selected:

ግብረ ሐዋርያት 20: ሐኪግ

Highlight

Copy