ኀበ ሰብአ ቆሮንቶስ 2 12

ምዕራፍ 12

በእንተ ራእይ ዘርእየ ጳውሎስ

1ወናሁ ይረትዕ ሊተ ተመክሖ ወባሕቱ ኢኮነ ሠናየ ንግባእ ካዕበ ወንዘክር ራእየ ዘከሠተ እግዚአብሔር። 2አአምር ብእሴ ምእመነ በክርስቶስ እምቅድመ ዐሠርቱ ወአርባዕቱ ዓመት እመሂ በሥጋሁ ወእመሂ ዘእንበለ ሥጋሁ እንዳዒ እግዚአብሔር የአምር ወመሠጥዎ ለውእቱ ብእሲ እስከ ሣልስ ሰማይ። 3#11፥11። ወአአምሮ ለውእቱ ብእሲ እመሂ በሥጋሁ ወእመሂ ዘእንበለ ሥጋሁ እንዳዒ እግዚአብሔር የአምር። 4ወመሠጥዎ ውስተ ገነት ወሰምዐ በህየ ነገረ ዘኢይተረጐም ዘኢይከውኖ ለዕጓለ እመሕያው ይንብብ። 5#11፥30። ወበእንተ ዝንቱኬ በዘከመዝ እትሜካሕ በርእስየሰ ኢይትሜካሕ ዘእንበለ በሕማምየ። 6#10፥8፤ 11፥16። ወእመኒ ፈቀድኩ እትመካሕ ኢኮንኩ አብደ እስመ ጽድቀ እነግር ወባሕቱ እምህክ ከመ ኢይትሐዘቡኒ በዘርእዩኒ ወበዘሰምዑኒ ፈድፋደ። 7#ኢዮብ 2፥6። ወበእንተዝ ከመሰ ኢይትዐበይ በብዙኅ ራእይ ተውህበኒ መልአከ ሰይጣን ዘይደጕጸኒ ሥጋየ ወይኰርዐኒ ርእስየ። 8ወአስተብቋዕክዎ ለእግዚእየ ሥልሰ በእንቲኣሁ ከመ ያእትቶ እምኔየ። 9ወይቤለኒ የአክለከ ጸጋየ ወኀይልሰ በደዌ የሐልቅ ወሠመርኩ እትመካሕ በሕማምየ ከመ ይኅድር ኀይለ ክርስቶስ ላዕሌየ። 10#ፊልጵ. 4፥13። ወበእንተ ዝንቱ ሠመርኩ በሕማምየ በተጽእሎሂ ወበምንዳቤሂ ወበተሰዶሂ ወበተጽናስሂ በእንተ ክርስቶስ እስመ ሶበ አሐምም ሶቤሃ እጸንዕ።

በእንተ ቅሥት ዘላዕለ ሰብአ ቆሮንቶስ

11ወናሁ ኮንኩ አብደ በተመክሖትየ በዘአንትሙ አገበርክሙኒ ወሊተሰ ርቱዕ እክበር በኀቤክሙ ወትኩነኒ ሰማዕትየ እስመ አልቦ ዘአሕጸጽኩክሙ እምዘኵሉ ሐዋርያት ወእመኒ ከመ ወኢምንት አነ። 12#11፥5። ትምእርተ ሐዋርያትሰ ተገብረ ለክሙ በኵሉ ትዕግሥት ወበተአምራት ወመንክራት ወኀይላት። 13#11፥9። ወምንትኑ ዘአሕጸጽኩክሙ ወዘአኅጣእኩክሙ እምኵሉ ቤተ ክርስቲያናት ዘእንበለ ዛቲ እንተ ኢመጻእኩ ኀቤክሙ አስርሕክሙ ጸግዉኒያ ለዛቲ አበሳየ። 14#13፥1። ናሁ ሣልስየ ዝንቱ እንዘ አስተዳሉ እምጻእ ኀቤክሙ ወኢተፋጠነኒ እስመ ኪያክሙ እፈቅድ ወአኮ ንዋየክሙ እስመ ርቱዕ አበው ይዝግቡ ለውሉዶሙ ወአኮ ውሉድ ለአዝማዲሆሙ። 15#ፊልጵ. 2፥12። ወአንሰ ምክዕቢተ አስተዋፃእኩ ወእሜጡ ሥጋየ በእንተ ነፍስክሙ ወእመኒ ፈድፋደ አፍቀርኩክሙ ርእስየ አፍቀርኩ። 16ወአንሰ ኢያክበድኩ ላዕሌክሙ ወባሕቱ መስተመይነ ከዊንየ ነሣእኩክሙ በጕሕሉት። 17ቦኑ እንጋ ዘፈነውኩ ኀቤክሙ ወቦኑ ዘተዐገልኩክሙ። 18#8፥6። ናሁ አስተብቋዕክዎ ለቲቶ ወፈነውክዎ ለካልእ እኁነ ምስሌሁ ቦኑ ዘገፍዐክሙ ቲቶ አኮኑ በውእቱ መንፈስ ዘይረውጽ በላዕሌሁ ቦቱ ሖርነ ወአሠረ ዚኣሁ ተለውነ። 19ትትሔዘቡነሁ ከመ ንሕነ ንትዋቀሠክሙ ዘሂ ንነግር በቅድመ እግዚአብሔር በእንተ ክርስቶስ ንነግር ወዝንቱሰ ኵሉ አኀዊነ ከመ ትትሐነጹ። 20#10፥2፤ 1ተሰ. 4፥6። ወባሕቱ እፈርህ ለእመ ቦ ከመ አመ መጻእኩ ወኢረከብኩክሙ በከመ እፈቅድ ወአነሂ እከውነክሙ ከመ ዘኢትፈቅዱ ወዮጊ ይከውን ውስቴትክሙ ተዝኅሮ ወተቃንኦ ወተምዕዖ ወተሣልቆ አው ተሓምዮ ወተሀውኮ ወአዕብዮ ልብ። 21#2፥1፤ 13፥2። ዮጊ ካዕበ መጺእየ ኀቤክሙ ያሐምመኒ እግዚአብሔር በእንቲኣክሙ ወእላሕዎሙ ለብዙኃን እለ አበሱ ወኢነስሑ በእንተ ኀሣሮሙ ወምርዓቶሙ ወዝሙቶሙ ዘገብሩ።

Currently Selected:

ኀበ ሰብአ ቆሮንቶስ 2 12: ሐኪግ

Highlight

Copy