ኀበ ሰብአ ቆሮንቶስ 2 13

ምዕራፍ 13

በእንተ ምጽአቱ ሣልሳይ

1 # ዘዳ. 19፥5፤ ማቴ. 18፥16። ወናሁ ሣልስየ ዝንቱ እንዘ እመጽእ ኀቤክሙ አኮኑ በአፈ ክልኤቱ ወሠለስቱ ሰማዕት ይቀውም ኵሉ ነገር። 2ወአቅደምኩ ነጊረ እምትካት ወአቀድም ወእነግር ዓዲ በከመ እቤለክሙ እንዘ ሀሎኩ በቀዳሚ ከማሁ እንዘ ኢሀሎኩ በሣልስ እነግር ለእለ አበሱ ቀዲሙ ወለባዕዳንሂ ከመ አመ መጻእኩ ኢይምሕክ እንከ ካዕበ። 3እስመ ተኀሥሡ መከራሁ ለክርስቶስ ዘይነብብ በላዕሌየ ውእቱ አልቦ ዘይሰአኖ በኀቤክሙ ዘእንበለ ዳእሙ ኵሉ ዘይትከሀሎ። 4እስመ ዘሐመ ወተሰቅለ በድካም ሕያው ውእቱ በኀይለ እግዚአብሔር ወንሕነኒ ንደክም ምስሌሁ ወነሐዩሂ ምስሌሁ በኀይለ እግዚአብሔር በእንቲኣክሙ። 5#1ቆሮ. 11፥28፤ ፊልጵ. 1፥10። ወርእሰክሙ አመክሩ ለእመ ሀለውክሙ በሃይማኖት ወርእሰክሙ ሕቱ ለእመ ቦ ዘኢተአምሩ ለሊክሙ ወኢትጤይቁ ከመ ሀሎ ክርስቶስ ምስሌክሙ ወለእመሰ ኢኮነ ከመዝ ምኑናን አንትሙ። 6ወእትአመን አንሰ ታእምሩ ከመ ኢኮነ ምኑናነ ንሕነኒ። 7ወንጼሊ ኀበ እግዚአብሔር ከመ ኢይግበር እኩየ ላዕሌክሙ ወኢምንተኒ ወአኮሰ ከመ ንሕነ ኅሩያነ ንኩን አላ ዳእሙ ከመ አንትሙ ሠናየ ትግበሩ ወንሕነሰ ከመ ምኑናን። 8እስመ ኢንክል ወፂአ እምጽድቅ ዘእንበለ ዳእሙ በጽድቅ። 9ወእትፌሣሕ ሶበ ንሕነ ነሐምም ከመ አንትሙ ትጽንዑ ወትትፈሥሑ ወዝ ውእቱ ጸሎትነ ከመ አንትሙ ታርትዑ ልበክሙ። 10#10፥8፤ 1ቆሮ. 9፥18። ወበእንተዝ ዘንተ እጽሕፍ ለክሙ እንዘ ኢሀሎኩ ኀቤክሙ ከመ አመ መጻእኩ ምቱረ ኢይግበር በላዕሌክሙ ከመ ዘሥልጣን ቦ በዘአኰነነኒ እግዚአብሔር ለሐኒጽ ወአኮ ለነሢት። 11#ፊልጵ. 4፥4፤ ሮሜ 15፥33። ተፈሥሑ እንከሰ አኀዊነ አጥብዑ ወተዐገሡ ወተሰናዐዉ ወአምላከ ሰላም ወፍቅር የሀሉ ምስሌክሙ። 12#1ቆሮ. 16፥20። ተአምኁ በበይናቲክሙ በአምኃ ቅድሳት አምኁክሙ ኵሎሙ ቅዱሳን። 13ጸጋሁ ለእግዚእነ ኢየሱስ ክርስቶስ ወፍቅረ እግዚአብሔር ወሱታፌ መንፈስ ቅዱስ የሀሉ ምስለ ኵልክሙ አሜን።

ተፈጸመት መልእክት ዳግሚት ኀበ ሰብአ ቆሮንቶስ ወተጽሕፈት በፊልጵስዩስ ዘመቄዶንያ ወተፈነወት በእደ ቲቶ ወሉቃስ።

ወስብሐት ለእግዚአብሔር አሜን።

Currently Selected:

ኀበ ሰብአ ቆሮንቶስ 2 13: ሐኪግ

Highlight

Copy