ኀበ ሰብአ ቆሮንቶስ 2 11

ምዕራፍ 11

በእንተ ቅንአት ዘለእግዚአብሔር

1ወርዕቱሰ ትትዐገሡኒ ኅዳጠ ከመ እንብብ በእበድየ እንዘ ትትዔገሡኒ። 2#ዮሐ. 3፥29፤ ኤፌ. 5፥26-27-32። እስመ እቀንእ ለክሙ ቅንአተ እግዚአብሔር እስመ ፈኀርኩክሙ ለአሐዱ ምት ድንግል ወንጹሕ ክርስቶስ ከመ አቅርብክሙ ኀቤሁ። 3#ዘፍ. 3፥4-13። ወባሕቱ እፈርህ ዮጊ ከመ አርዌ ምድር አስሐታ ለሔዋን በጕሕልት እንዳዒ ለእመ ይማስን ልብክሙ እምየውሃቱ ወንጽሑ ለክርስቶስ። 4#ገላ. 1፥8-9። ሶበሁ ኮነ ዘይመጽእ ኀቤክሙ ዘጸውዐክሙ ኀበ ካልእ ኢየሱስ ዘኢሰበክነ ለክሙ ወእመ ቦ ካልእ መንፈስ ዘትነሥኡ ዘኢነሣእክሙ ወእመኒ በካልእ ትምህርት ዘኢተመሀርክሙ ርቱዕ ትጽንሑነ። 5#12፥11፤ 1ቆሮ. 15፥10፤ ገላ. 2፥6-9። ወባሕቱ እትሔዘብ አልቦ ዘአሕጸጽኩክሙ እምዘባዕዳን ሐዋርያት።

በእንተ ምህሮ ወንጌል ዘእንበለ ዐስብ

6ወእመኒ አብድ አነ በቃልየ አኮኬ በልብየ ወባሕቱ እከሥት ለክሙ ኵሎ ውስተ ኵሉ። 7#1ቆሮ. 9፥12-18። ወሚመ አበስኩኑ እንጋ ዘአሕመምኩ ርእስየ በኵሉ ከመ አንትሙ ትትለዐሉ እስመ በከንቱ መሀርኩክሙ ትምህርተ እግዚአብሔር። 8#ፊልጵ. 4፥10-15። ወባዕደሰ ቤተ ክርስቲያን ቀሠጥኩ ወነሣእኩ ለሲሳይየ ከመ እትለአክሙ። 9#12፥13። ወአመሂ ሀለውኩ ኀቤክሙ ኢተሰቈቁ ንዋየክሙ እንዘ እጼነስ ወኀበሂ ኢያእከልኩ ሰለጡ ሊተ አኀዊነ በጺሖሙ እመቄዶንያ ወበኵሉ ተዐቀብኩ ከመ ኢያክብድ ላዕሌክሙ ወእትዐቀብሂ። 10#1ቆሮ. 9፥15። እስመ ጽድቁ ለክርስቶስ ይሄሉ ምስሌየ ወኢተዐጽወተኒ ዛቲ ፍሥሓየ በደወለ አካይያ። 11በእንተ ምንት እስመሁ እንጋ ኢያፈቅረክሙኑ እንከሰ እግዚአብሔር የአምር ዘንተ። 12#1ቆሮ. 9፥12። ወባሕቱ ዘሂ ገበርኩ ወዘሂ እገብር ከመ እክልኦሙ ምክንያተ ለእለ ይፈቅዱ ምክንያተ ከመ ኢይርከቡ እሙንቱሂ በዘይትሜክሑ ከማነ። 13እስመ ሀለዉ ሐሳውያን ገበርተ ዐመፃ እለ ይትሜየኑ ወይትሜሰሉ ሐዋርያተ ክርስቶስ። 14ወዝኒ አኮ ለአንክሮ እስመ ለሊሁ ሰይጣን ይትሜሰል ከመ መልአከ ብርሃን። 15ወዝኒ ኢኮነ ዐቢየ ለእመ ይትሜሰሉ መላእክቲሁኒ ከመ መላእክተ ጽድቅ ወደኃሪቶሙሰ በከመ ምግባሮሙ።

በእንተ ትምክሕት መንፈሳዊ

16 # 12፥6። ወካዕበ እብል አልቦ ዘይሬስየኒ ከመ አብድ ወእመ አኮሰ ከመ አብድኒ ተወከፉኒ ከመ እትመካሕ አነሂ ኅዳጠ። 17ወዝኒ አኮ ዘመንገለ እግዚአብሔር ዘእነግር ዳእሙ ከመ አብድ እዘነግዕ በእንተ ዛቲ ትምክሕትየ። 18እስመ ብዙኃን እለ ይትሜክሑ በሕግ ዘሥጋ አነሂ እትሜካሕ። 19እመሰ ይኤድመክሙ አጽምዖቶሙ ለአብዳን እንዘ ጠቢባን ወነባብያን አንትሙ። 20እስመ ትትዔገሥዎሙ ለእለ ይትዔገሉክሙ ወለእለሂ የሀይዱክሙ ወለእለሂ ይትቤልዑክሙ ወለእለሂ ይትዔበዩ ላዕሌክሙ ወለዘሂ ይጸፍዐክሙ ገጸክሙ። 21እብል ዘንተ ከመ ዘያስተሐቅር ከመ ሕሙማኒሁ ንሕነ ለክሙ እብል አነሂ በእበድየ አልቦ ዘይትሀበል ላዕሌየ ዘእንበለ ዳእሙ ዘአነ እትኀበል ላዕሌሁ። 22#ፊልጵ. 3፥5። እመኒ ዕብራውያን እሙንቱ አነሂ ከማሆሙ ወእመኒ እስራኤላውያን እሙንቱ አነሂ ከማሆሙ ወእመሂ ዘርዐ አብርሃም እሙንቱ አነሂ ከማሆሙ። 23እመኒ ላእኩ ለክርስቶስ እሙንቱ አኮሁ እዘነግዕ ለርእስየ በጻማሂ አፈድፈድኩ ወበተቀሥፎሂ አፈድፈድኩ ወበተሞቅሖሂ አብዛኅኩ ወለሞትኒ ብዙኀ ተደለውኩ። 24#ዘዳ. 25፥3። ኅምሰ ቀሠፉኒ አይሁድ በበአርብዓ ዘእንበለ አሐቲ። 25#ግብረ ሐዋ. 14፥19፤ 16፥22፤ 27፥39-40። ሥልሰ ዘበጡኒ በአብትር ምዕረ ወገሩኒ በአእባን ሥልሰ ሰኰየት ሐመርየ ቤትኩ ወወዐልኩ እንዘ እጸብት ውስተ ዕመቀ ባሕር። 26ወበመንገድሂ ዘልፈ እትመነደብ ወተመንደብኩ በተከዚኒ አመንደቡኒ ፈያት አመንደቡኒ አዝማድየ አመንደቡኒ አሕዛብ ተመንደብኩ በሀገር ወተመንደብኩ በሐቅል ተመንደብኩ በባሕር አመንደቡኒ ቢጽ ሐሳውያን። 27በጻማ ወበስራሕ ወበትጋህ ብዙኅ በረኀብ ወበጽምእ በጾም ብዙኅ በቍር ወበዕርቃን። 28#ግብረ ሐዋ. 20፥18-20። ወዘእንበለ ዝ ብዙኅ ባዕድ ዘረከበኒ ኵሎ አሚረ እንዘ እኄሊ ቤተ ክርስቲያናት። 29#12፥6-10፤ ገላ. 1፥11-17። መኑ ዘይደዊ ወኢየሐምም አነ ወመኑ ዘይስሕት ወኢይደነግፅ። 30#12፥5። ወእመሰ ይደሉ ተመክሖ አነኒ እትሜካሕ በሕማምየ። 31#1፥23። የአምር እግዚአብሔር አቡሁ ለእግዚእነ ኢየሱስ ክርስቶስ ዘውእቱ አምላክ ቡሩክ ለዓለመ ዓለም ከመ ኢይሔሱ። 32በሀገረ ደማስቆ መልአከ አሕዛብ ዘእምታሕተ አርስጣስዮስ ንጉሥ ዐቃቤ ሀገር ደማስቆናዊ ፈቀደ የአኀዘኒ። 33#ግብረ ሐዋ. 9፥24-25። ወአውረዱኒ በሰብሳብ እንተ መስኮት እምአረፍት ወአምሠጥኩ እምእዴሁ።

Currently Selected:

ኀበ ሰብአ ቆሮንቶስ 2 11: ሐኪግ

Highlight

Copy