1 ቆሮ 3
3
ቆሮንቶ̈ስ ዎ̈ሳ ኬ̈ን ጋርታ̇ ዲንዲ̇ኖ ፋጊቲ
1ቴ ኢሺንታን! ዪንቲ̇ ዓና̇ ኣላሚን ጋልዳ ዎ ኣሳንፌ̈ንኬ ክርስቶ̈ሳባር ሚ̈ጛካዮ ቢርት ኣቂሊ ናኢፌ̈ኒ ማ̈ቂ̇ኖኮታ̇ቦ ቴ ኣማ̇ናባር ሚ̈ጚኖ ኣሳን ታማ̈ርሳዚንዲፌ̈ኒ ዪንታ̇ ታማ̈ርሳ̇ንዳብ ዳንዳኣካ̇ዬ። 2ዪንቲ̇ ሚ̈ን ፊ̈ሽ ሞ̈ንዳብ ዳንዳኣምፔ̇̈ን ባዮ̇ ቢርት ኣቂሊ ናኢፌ̈ን ማ̈ቂ̇ኖኮታ̇ቦ ማ̈ ዪንታ̇ ሻ̈ሺንቻ̇ዴ፤ ዓታ̇ር ማ̈ቂ̇ን ዪንቲ̇ ሚ̈ን ፊ̈ሺ ሞ̈ንዳቦ ዳንዳኣካ̇ዬ። 3ዪንቲ ዓታ̇ር ዓኒ ኣላሚን ጋልዳ ዎ ኣሳን ኦ̈ዚንዲፌ̈ኒ ኦ̈ሬ። ዪንታ̇ ጊዳ ቂና̈ታኬ ዋ̈ቺ ዎ̈፤ ዪዚ ዪንቲ ዓኒ ኣላሚን ጋልዶ ፋባ̈ሶ ኣሳን ኦ̈ዚንዲፌ̈ን ኦ̈ሙታ̇ ዎን ባዝ ዪን ኤርሲባ̈ሳ? 4ኣባ ጌይን ፔታ̇ና̈ዲ “ታ̈ኒ ጳዉሎ̈ሴዬ” ጌይን ሜላ̈ዲ “ታ̈ኒ ኣጵሎ̈ሴዬ” ጌይን ዪዚ ዪንቲ̇ ዪኒ̇ፌ̈ን ጌይርኮ̇ ዪንቲ̇ ዓኒ̇ ኣላሚን ጋልዶ ኣሳንፌ̈ን ማ̈ቂ̇ኔ ጌንት ጊዳካ̇ያ?
5ዪዚ ኣጵሎ̈ሲ ኣብዛ? ማ ጳውሎ̈ሲሽ ኣብዛ? ኢንቲ ዪንቲ ዬሱ̈ሳ ኣማ̇ናምፔ̈̇ን ዎቲኖ ጾ̈ሳ̇ ኣሽካራ፤ ኢንቲ ጎዳ ኢንታ̇ ቆሚ̇ን ቆሚ̇ን ኢንታ̇ብ ኢሚ̇ኖ ኦ̈ሲንዲፌ̈ኒ ኦ̈ዝ ኣሴ። 6ቴ ቶካ̇ዴ፤ ኣጵሎ̈ሲ ዋ̈ ኡሺ̇ዴ፤ ዎቲናካር ዲቺ̇ዛ̈ዲ ጾ̈ሳ̇̇̈ዳ። 7ዪ̈ኮታ̇ቦ ኦ̈ሲ̇ምቦ ዋ̈ና̇̈ዲ ማርቲ̇ን ቶኪ̇ኖ̈ዲ ዎይ ዋ̈ ኡሺኖ̈ዲ ጊዳካ̇ዬ ዲቺ̇ኖ ጾ̈ሳ̇ዳ። 8ቶኪ̇ኖዳር ማ̈ቂን ዋ̈ ኡሺኖ̈ዳር ዎልፌ̈ኔ። ኢንቲ̇ ፌ ቆሚ̇ን ቆሚ̇ን ፌ ኦ̈ሲንዲፌ̈ን ፌ̈ኮን ኤኪ̇̈ሬ። 9ኑ̈ኒ ጾ̈ሳ̇̇̈ቦ ዎልኣ ኦ̈ዝ ኣይላን፤ ዪንታ̇ሬ ጾ̈ሳ̇̈̇ቦ ዎት ጋዴ ማ ጾ̈ሳ̇̇̈ቦ ኬ̈። 10ጾ̈ሲ ታ̈ብ ኢሚ̇ኖ ኤሪንዲፌ̈ኒ ሹቻ ኬ̈ ኮሺንቺ ኬ̈ጺዝ ኣስፌ̈ኒ ጻኖ ማሳራቲንዶ̇ ሹችባራ ኮሺንቻ ኦ̈̈ዴ። ሜላን ቴ ኦ̈ኖ ማሳራቲን ጋልዳ ኬ̈ን ኬ̈ጺ̇̈ሬ፤ ዎቲናካሬ ኬ̈ጺዝ ኣሳን ዎይ ማሳራቲን ኢዝ ጋልዳ ዎዛርፌ̈ን ኮሺንቻ̇ር ኬ̈ጻ̇ንዳብ ኮሺ̇̈ርኮ ኤራንዳብ ኮሺ̈ሬ። 11ፔቲ̇ ቶ̈ህ ኦ̈ንቲ̇ኖ ማሳራቲምፖ ኦ̈ናካር ማ̈ቂ̇ን ሜላ ማሳራታ ኦ̈ንዳብ ዳንዳኢባ̈ሴ፤ ዪ̈ዳሬ ማሳራታ ጌዪንቲ̇ኖዲ ዬሱ̈ስ ክርስቶ̈ሳ። 12ዪ̈ ማሳራታ ጋልዳ ዎርቃባር ማ̈ቆ፥ ዎይ ቢራባር ማ̈ቆ̇፥ ዎይ ኣል̇ኣ ሹችባር ማ̈ቆ̇፥ ዎይ ሚ̈ባር ማ̈ቆ፥ ዎይ ማ̈ታባር ማ̈ቆ፥ ዎይ ዓዉላባር ማ̈ቂን ኬ̈ጺዝ ኣሲ ዎኮ 13ኢ ኦ̈ኖ ኦ̈ሲንዳ ፋላ̇ ጋልዳ ኬስካ̇ራ ፊርዲንቲ̇ዝ ቃሚ̇ ዬይሬ፤ ዪና̇ ኢዝ ቃሚ̇ንባራ ኣስ ዎይ ኦ̈ሲንዳ ኣፌ̈ንኮ ታማ ጋርታ ጌላ ኬስካ̇ራ ፋላ̇ ጋልዳ ቤንታ̇̈ሬ። 14ማሳራቲን ጋልዳ ኬ̈ጺኖ ፔቲ̇ ኣሲ ኢ ኬ̈ን ታማ ጋርታ̇ ጌላሪ ሚጫ̇ካ̇ይዶር ሚ̈ጛር ኤቄ̇ጌዪንዶ ኬ̈ን ኬ̈ጺ̇ኖ ና̈ሳ̈ዲ ሺሊማ̈ታ ኤኪ̇̈ሬ። 15ኢ ኦ̈ኖ ኦ̈ሲን ታማ ጋርታ ሚጫ̇ ዬጌዪንዶ ኬ̈ጺ̇ኖ ናሳ ሜላ̇ ኣቲ̇̈ሬ፤ ኢ ፌ ቆሚ̇ንዳር ታማ ጋርታ ጌላር ሚጫካ̇ይ ኣቲ̇ኖ ኣስፌ̈ን ማ̈ቃ̇ር ፋጺ̈ሬ።
16ዪንቲ̇ ጾ̈ሳ̇̇ ኬ̈ ማ̈ቂ̇ኖንዲኬ ጾ̈ሳ̇ ኣያ̇ና ዪንታ̇ ጋርታ ዶኣዚን ዪንቲ̇ ኤሪባ̈ሳ? 17ዪዚ ኣሲ ጾ̈ሳ̇ ኬ̈ን ኢ̈ሲ̇ ይሲ̇ዝ ባዝ ማ̈ቄ̇ጌዪንዶ ጾ̈ሳ̇̇ ኢያ ይሲ̇̈ሬ። ጾ̈ሳ̇ ኬ̈ዲ ጌ̈ሼ̇፤ ዪና̇ር ጾ̈ሳ̇ ኬ̈ ጌዪንቲ̇ዛን ዪንታ̇።
18ኦ̈ናካሬ ፌ̈ና ማቃ̇ፖ̇ ጋ̈ቤ፤ ዓኒ̇ ኣላሚን ጋልዳ ዎ ኤሪንባራ ፌ̈ና ኤራ ጌይዝ ኣሲ ዎ̈ኮ ጾ̈ሳ̇̇̈ኮን ኪን ኤሪቲን ዲጛንዳቦ ፌ̈ና ዳሻ ኣስ ማሆ ጋ̈ቤ። 19ዓኒ̇ ኣላሚን ጋልዶ ኤሪቲንዳ ጾ̈ሳ̇ ቲ̈ን ዳሺቲ፥ ዪ̈ዳሬ “ጾ̈ሲ ኤራን ኢንታ ዉጪምባ̇ራ ኢንታ̇ ኤ̈ሬ” ጌዪ ጻ̈ፊንቲ̇ኖንዲፌ̈ኔ። 20ዪና̇ ኢዝፌ̈ኒ “ጎዳዲ ኤራን ቆፊን ሜላ̇ ዓሪ ማ̈ቂ̇ኖን ኤሪ̈ሬ” ጋ̈ሪ ጻ̈ፊንቲ̇ኔ። 21ዪዚ ዎይ ባዚ ዪንቴ̇ይ ማ̈ቂ̇ኖኮታ̇ቦ ኦ̈ናካሬ ኣሳባር ኣማ̇ኒንታ̇ፖ̇። 22ጳውሎ̈ሳር ማ̈ቂ̇ን፣ ኣጵሎ̈ሳር ማ̈ቂ̇ን፣ ጴ̈ጥሮ̈ሳር ማ̈ቂ̇ን፣ ዓና̇ ኣላሚንዳ̇ር ማ̈ቂ̇ን፣ ሼምፓር ማ̈ቂ̇ን፣ ዓይቃር ማ̈ቂ̇ን፣ ዓት ዎዳር ማ̈ቂ̇ን፣ ጋስ ዬዪዛ̈ዳር ማ̈ቂ̇ን፣ ዎይ ባዚ ዪንቴ̇ዬ። 23ዪንቲ̇ ክርስቶ̈ሴዬ፤ ክርስቶ̈ሳር ጾ̈ሳ̇ዬ።
Currently Selected:
1 ቆሮ 3: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
