1 ቆሮ 4
4
ክርስቶ̈ሳ ኣሽካራን
1ዪዚ ኑ̈ኒ ክርስቶ̈ሳ ኣሽካራ ማ̈ቂኖንዲኬ ዓኒ̇ፖ ቲ̈ን ኣሳብ ኤሪንታ̇ካ̇ዮ ጾ̈ሳ̇̇̈ ሚስጢሪን ኣሳብ ሶ̈ላምፔ̈ኒ ጾ̈ሲ̇ ዓዳራ ኑ̈ብ ኢሚ̇ኖን ኣሲ ኤራንዳቦ ኮሺ̇̈ሬ። 2ዓዳራ ኢ̈ብ ኢሚ̇ንቲ̇ኖ ኣሲ ኣማ̇ኒንቲ̇ኖ ማ̈ቃ̇ር ቤንታ̇ንዳ̇ብ ኮሺ̇̈ሬ። 3ታ ጋልዳ ዪንታ̇ር ማ̈ቆ ዎይ ሜላ ኣሳንር ማ̈ቆ ኦ̈ናካር ፊርዲዝ ባዝ ማ̈ቄ̇ጌይን ታ̈ብ ኣባካር ማይጺባ̈ሴ፤ ታ̈ኒ ሜላ ኣቲ̇ን ታ ጋልዳ ፊርዳንዳብ ዳንዳኣባሴ። 4ቴ ቡ̈ዲን ኤራዚምባር ቴ ኢ̈ት ኦ̈ኖ ባዚ ታ̈ብ ኤሪንቲ̇ዛ ባዬ̇፤ ዎቲናካር ዪ̈ዲ ታ̈ና ጺላ̇ ማ̈ሲባ̈ሴ። ታ ጋልዳ ፋራ̇ዲዛዲ ጎዳ ሙታ̇። 5ዪ̈ኮታ̇ቦ ኬ̈ሊን ዬላ̇ካይዶን ጎዳዲ ፊርዳብ ዬናፖ ቲ̈ን ዪንቲ ኣሳ ጋልዳ ፊርዳፒ̇ቴ። ኢ ዬ̈ሪ ም ጊዳ̇ ጌ̈ሚታር ዎ ባዝ ፎኢን ጋልዳ ኬሲ̇̈ሬ፤ ኣሳ ቡ̈ዳ ጋርታ̇ ኣ̈ቺ̇ንቲ̇ኖ ቆፊ ፋላ̇ ጋልዳ ኬሲ̇̈ሬ ዪና ኢዝባራ ኣሲ ዎይ ጾ̈ሳ̇ ጋልዳፖ ፌ ኣንጂን ኤኪ̇̈ሬ።
6ቴ ኢሺንታ̇ን! ታ̈ኒ ዪንታ̇ ማ̈ዳ̇ንዳቦ ጋ̈ራ ታ̈ናኬ ኣጵሎሳ ዪንታ̇ብ ሚሳ̈̇ሊፌ̈ን ማሃር ሶ̈ላዴ፤ ዪኖ ቴ ዎቲኖንዳ “ጻ̈ፊንቲ̇ኖንፖ ኣ̈ፔ̇” ጌይኖን ዞሪን ቢርሺቺ̇ን ዪንቲ ኑ ጋልዳፖ̇ ታማራምፔ̇̈ኔ፤ ዪዚ ፔታና̈ባር ኬርፊሙታ̇ ሜላ ና̈ሳ ሌቃ̇ንዳቦ ኮሺ̇ባ̈ሴ። 7ኔ̈ኒ ሜላ ኣሳ ጋልዳፖ̇ ኣብዝባር ሺራ? ኔ̈ብ ዎ ባዚ ዎይ ጾ̈ሳ̇̇ ጋልዳፖ ኔ ኤኪ̇ኖ ባዜ፤ ዓት ዪዲኮ ኔ ኤኪ̇ኖንዳ ጾ̈ሳ̇̇ ጋልዳፕኮ ኔ ኔ̈ፖ ኤሄይኖ ባዝፌ̈ን ኦቲርቃ̇̈ራ?
8ዓት ዪንቲ̇ ዪንታ̇̇ብ ኮሻ̇̈ዝ ባዚን ዎይ ዲጚኔ፤ ዓት ዪንቲ ዱሪቲኔ፤ ዪንቲ̇ ኑ ባዪዶን ዪንታ̇ ቆማ̇ብ ካዉቲኔ፤ ዪንቲ ኪን ካዉቲኖኮ ዎን ኮሽዶን፤ ዪኒ̇ባራ ኑ̈ናር ዪንታ̇ባር ዎልኣ ካዉቲ̈ርዶ̈ን። 9ኣባ ጌይን ኑ̈ኒ ዓኒ̇ ኣላሚን ዎይን ጋልዳ ኪ̈ታንቻን ቲ̈ንኬ ኣሳ ቲ̈ን ዎይ ካ̈ሳ̇ ባዝፌ̈ን ማ̈ቃ̇ር ኣቲ̇ኔ፤ ጾ̈ሲ ኑ̈ና ፌ ሃዋ̈ራ̈ታን ዓይቃ ፊንዲንታ̇ሪ ፌ ዓይቃ̇ዝ ቤሲ̇ን ሉኪ̇ዝ ኣሳን ጋርታ̇ፖ ዉርሲ ጋልዳ ኑ̈ና ጋዲ̇ኖ ታ̈ብ ማይጺ̈ሬ። 10ኑ̈ኒ ክርስቶ̈ሳ ጊሻ̇ቦ ጋ̈ሪ ዳሻ ማ̈ቂ̇ኔ፤ ዪንቲ ክርስቶ̈ሳባራ ኤራን ማ̈ቂ̇ኔ! ማ ኑ̈ኒ ዳቡሪኖን ማ̈ቂ̇ን ዪንቲ̇ ሚ̈ንን ማ̈ቂ̇ኔ፤ ዪንቲ ቦንቺ̇ንቲ̇ኖን ማ̈ቂ̇ኔ፤ ኑ̈ኒ ሌቂንቲ̇ኖን ማ̈ቂ̇ኔ። 11ዓታር ማ̈ቂ̇ን ዓኖ̇ ዬላ̇ር ኑ̈ኒ ጋፍሲንቲ̇̈ሬ፤ ባርሲንቲ̇̈ሬ፤ ካሊ̇ቲ̇̈ሬ፤ ቡኪንቲ̇̈ሬ፤ ዶኢዝ ኬ̈ ዪን ቁ̈ርሲንቲ̇̈ሬ። 12ኑ ኩሽ ጌ̈ቲምባር ኦ̈ ዳቡሪ̈ሬ፤ ኣሲ ኑ̈ና ባ̈ዳ̇ምባር ኑ ኢንታ̇ ኣንጂ̇̈ሬ፤ ኑ̈ና ዳካ̇ምባራ ጋርዢ̈ሬ። 13ኑ̈ና ቆ̈ ኑ ሱ̈ምን ይሳ̇ምባራ ኑ ኢንታ̇ብ ኮሽ ሶ̈ላር ማሂ̈ሬ፤ ዓኖ̇ ዬሊ̇ዝ ዲራስ ዓና̇ ኣላሚን ጋልዳ ኑ̈ኒ ኬዳ̇ር ኣቲ̇ኖ ባዝኬ ቶጚንቲ̇ኖ ፊቲፌ̈ን ማ̈ቃ̇ር ዎ።
14ታ ዓኖ̇ ዪንታ̇̇ብ ጻ̈ፋዚንዳ ታ ካዝ ቴ ናኢፌ̈ን ማ̈ሃር ዪንታ̇ ዞራንዳብ ኮያ̈ርዶኬ ቴ ዪንታ̇ ዬ̈ሊ̇ንዳብ ጊዳካ̇ዬ። 15ክርስቶ̈ሳባዝ ዪንታ̇ ታማ̈ርሲ ዲቺ̇ዝ ኣሲ ዎይሊን ዪንታ̇ብ ዎካሬ ዎይሊን ባ̈ባ ዪንታ̇ብ ባዬ̇፤ ኣባ ጌይን ክርስቶ̈ስ ዬሱ̈ሳ ዎልቃባራ ዎጛላ ሳባ̇ካራ ዪንታ̇ ዬሊኖ ታ̈ና። 16ዪ̈ኮታ̇ቦ ዪንቲ ታ̈ና ማይጻር ቴ ዎሂን ዬ̇ምፔ̈ን ቴ ዪንታ̇ ጌሻ̈ሬ። 17ዪኒ̇ ጊሻ̇ቦ ቴ ካዛ̈ዲኬ ኣማ̇ኒንቲ̇ኖ፥ ጎዳባር ታ̈ብ ናኢ ማ̈ቂ̇ኖ ጢማ̈ቶ̈ሳ ቴ ዪንታ̇̇ብ ሚሺኔ፤ ታ̈ኒ ዎይ ቤስ̇ ዎ̈ሳ ኬ̈ ጋርታ̇ ታማ̈ርሳ̇ዚንዲፌ̈ኒ ኢያር ክርስቶ̈ሳ ዎሂን ቴ ዎዛርፌ̈ን ዬሙታ ዎኮ ኢ ዪንታ̇ ቆፊሲ̈ሬ።
18ዪንታ̇ ጋርታፖ̇ ፔታ̇ን ፔታ̇ናን ቴ ዪንታ̇ ቤቃንዳብ ሉካ̇ባሶ ኢንታብ ማይጺን ኦቲራባር ኩሚኖ ኣሳን ዎ። 19ማ̈ቂናካሬ ጎዳ ጌዬጌይንዶ ኡክ̇ባር ቴ ዪንታ̇ክ ሉካ̇ንዳ፤ ዪና̇ ኢዝባራ ዪን ኦቲርቂዝ ኣሳን ሶ̈ሊን ሙታ̇ ጊዳካይዶን ኢንታብ ዎ ዎልቂንዳ̇ር ታ̈ኒ ኤራንዳ̇ብ ኮያ̈ሬ። 20ጾ̈ሳ̇ ካ̈ቲቲ̇ንዳ ዎልቃባርዶኬ ኖ̈ናባር ማ̈ቂ̇ዝ ባዝ ጊዳካ̇ዬ። 21ቴ ዪንታ̇̇ክ ጉፋ ኤካ̇ራ ቡካንዳብ ዬ̈ኔቤ ዎይ ካንባርኬ ኣሽካ ቡ̈ዳባር ዬ̈ኖ? ዪንቲ̇ ዎኖ̇ ኮዪ̈ራ?
Currently Selected:
1 ቆሮ 4: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
